1 Samuel 24 - Mukanda Wa Zambi 1970

David yecha mwanangana Saulu ni mwono

¹ Muze Saulu hahanga Afilistia ni hahiluka, atu yaamulweza ngwo: “David mu puya ya Engedi ali.”

² Mba Saulu yatongola tujita 3,000 twa Israele a hamu, yaaya ni kufupa David ni atu jenyi ku chivumbuko cha milundu ya Pembe a mu Yambu.

³ Mu jila yaaheta ku amwe matanga ja mapanga kuze kuli chivwenge. Mba Saulu yanjila mo, yata meya. David ni tujita twenyi te muchima lia chivwenge ali.

⁴ Tujita twa David yaamwamba ngwo: “Lino lie tangwa lize Mwene Zambi anulwezele ngwenyi: ‘Mungukakunjika mukwa kole ye mu moko je, mba muuhasa kumulinga cheswacho unazange.’ ” David yakatuka, yabatula lubula wa mwanangana Saulu, mwe Saulu kachinyingikine.

⁵ Alioze David yevwa chinyengo mumu habatula lubula wenyi,

⁶ yambila tujita twenyi ngwenyi: “Mwene Zambi angukande ha kulinga mwene wami chibi, yoze Mwene Zambi hanawayisa maji. Chahashile kumulinga chibi nichimwe mumu Mwene Zambi hanamuwayisa maji.”

⁷ Chenacho David akunwine tujita twenyi ngwenyi, kanda ashiha mwanangana Saulu. Mwe mwanangana yakatuka, yatuhuka mu chivwenge, yaya kwenyi.

⁸ Kulutwe David yakatuka, nawa, yatuhuka mu chivwenge, yatambika Saulu ngwenyi: “Vulie mwanangana!” Saulu yatewuluka, David yahetama ni kumuwayila,

⁹ yamuhula ngwenyi: “Kuchi kevwe nwakubanjika maliji ja waze akwamba ngwo: ‘David kakuzanga kunulinga chibi?’

¹⁰ Ngwami musono hinwamona ni meso jenu chize Mwene Zambi anukunjikanga mu moko jami mu chivwenge. Amwe kaangwambanga te ngunushihe, alioze nanuvwilanga keke, nambanga ngwami: ‘Chichi kunulinga chibi nichimwe, mumu Mwene Zambi hananuwayisa maji hanga nubwe mwanangana.’

¹¹ Tata, achitalenu Chipinji cha lubula wenu ku kwoko liami? Kachi te nanushiha, alioze nabatulanga lume Chipinji chino cha lubula. Chino chinahase kunukumika ngwo, yami Chishi kulimika ni yenu hanji kunulinga chibi. Shina yenu nwakunguzomba hanga nungushihe. Chibwe yami chanulingile chibi.

¹² Mwene Zambi atubatwile yenu ni yami. Mwene Zambi angukale kama kuli yenu. Alioze yami chichi kunulinga chibi.

¹³ Ngunanyingika chishima cha makulwana ngwo: ‘Shina yingulungulu enoo akulinga ungulungulu.’ Alioze yami chichi kunulinga chibi.

¹⁴ Mwanangana wa Aisraele iya nunase nenyi jita? Iya nunazombo? Kawa yoze hafwa, hanji mbwangala!

¹⁵ Alioze Mwene Zambi kali ngaji, matubatwila yenu ni yami. Anguhakwile kama, angulamwine kuli yenu.”

¹⁶ Muze David hamanununa kuhanjika, mwe mwanangana yahula ngwenyi: “Kuma yena, mwanami David, nyi?” Mba yalila mbimbi.

¹⁷ Yambila David ngwenyi: “Yena uli mukwa ululi, yami ngunahi. Yena Wangulinga yibema, alioze yami nakukulinga yibi!

¹⁸ Musono hiwangulweza chize Wangulinga yibema, mumu kuwangushihile chibwe Mwene Zambi hangukunjika mu moko je.

¹⁹ Mutu mecha mukwa kole yenyi nyi hamuyuka kulu, nyi? Mwene Zambi akuwahise ha chize hiwangulinga musono!

²⁰ Ngunanyingika ngwami, chamwenemwene yena muukayula Aisraele, ni we wanangana kumuukalinduluka mu chiyulo che.

²¹ Alioze lishinge kama ni jina lia Mwene Zambi ngwe, kuuchi kakuwisa vungu liami ni vungu lia tata.”

²² Mba David yalishinga. Mwanangana Saulu yahiluka ku mahienyi, alioze David ni tujita twenyi yaahiluka ku chiswamo cho.