1 Samuel 23 - Mukanda Wa Zambi 1970

David yalamwina limbo lia Keila

¹ David yevwa ngwo: “Afilistia kanase jita ni akwa limbo lia Keila, kaanabubu yizungwilo ya mbuto.”

² Mba David yahula Mwene Zambi ngwenyi: “Nguye ngukase jita ni Afilistia, nyi ka?” Neye yamukumbulula ngwenyi: “Ewa yako ukase no jita ukalamwine akwa Keila.”

³ Alioze tujita yaambila David ngwo: “Kamba kama muno mu chifuchi cha Yuda tunevu woma, ngwe kuchi mutuhasa kuya ni kwasa jita ni Afilistia ku Keila?”

⁴ Kashika David yahula nawa Mwene Zambi. Mwene Zambi ngwenyi: “Katuka, Palumuka ku Keila, mumu mungukunjika Afilistia mu moko je.”

⁵ David yaaya ni tujita twenyi ku Keila, yaasa jita ni Afilistia, yaashiha anji mukachi ko, yaabuba yimuna yo. Chenacho David alamwinyine akwa Keila.

⁶ Muze Abiatare, mwana wa Ahimeleke, hachinyina kuli David ni kuya hamwe nenyi ku Keila, te kali ni chikuto chihi cha uhako.

⁷ Saulu yevwa ngwo, David hanjila mu Keila. Mba yamba ngwenyi: “Zambi hamukunjika mu kwoko liami, mumu haliajila muze hanjila mu limbo liakukoleka.”

⁸ Saulu yatambika tujita twenyi eswe aye ku Keila ni kwasa jita ni David ni tujita twenyi.

⁹ Muze David hevwa ngwo, “Saulu kanambe kwasa ne jita,” yambila hako Abiatare ngwenyi: “Neha chikuto cha kuhula nacho Mwene Zambi.”

¹⁰ Mba David yalemba ngwenyi: “Mwene Zambi, Zambi ya Aisraele yami kavumbi ke hinevwa ngwo, Saulu kanambe kwiza hanga onone Keila mumu hali yami.

¹¹ Saulu kumeza, nyi ka? Akwa Keila maakangukunjika ku moko ja Saulu, nyi ka? Mwene Zambi, Zambi ya Aisraele ungwivwe kama!” Mwene Zambi ngwenyi: “Saulu kumeza.”

¹² David yahula nawa ngwenyi: “Akwa Keila maakangukunjika hamwe ni tujita twami mu moko ja Saulu, nyi?” Mwene Zambi yamukumbulula ngwenyi: “Ewa.”

¹³ David hamwe ni tujita twenyi yaakatuka mu Keila, yaaya ni kwendangana. Kwoka cho 600. Muze Saulu hevwa ngwo, David hachina, yalitwamina kuya ko.

David mu chifuchi cha milundu

¹⁴ David yatwama mu chifuchi cha milundu mu puya, hehi ni limbo lia Zife. Saulu yamufupafupa, alioze Zambi kamukunjikile ye.

¹⁵ David yanyingika ngwenyi: “Saulu kanambe kungushiha.” Te David uchili mu puya ku Horeshe hehi ni Zife.

¹⁶ Jonatane yaya kuli David mu puya ni kumutakamisa ngwenyi: “Mwene Zambi akufunge.

¹⁷ Kanda wivwa woma, mumu tata kechi kuhasa kukulinga chibi. Kananyingika kanawa ngwenyi, yena muukabwa mwanangana mu Israele ni yami mungukabwa chihata che.”

¹⁸ Eswe aali yaakolesa usendo ku meso ja Mwene Zambi. David yasala ku Horeshe, Jonatane neye yahiluka ku mahio.

^19-20 Hohene akwa Zife yaakanduka maha Saulu ku Gibea, ni kwambulwila Saulu ngwo: “Vulie mwanangana! David kanaswame mu chifuchi chetu, ku Horeshe, ha mulundu wa Hachila, ku sude mu puya ya Yuda. Tunanyingika ngwetu, nunazange kumukwata, Kashika tuyenu ku chifuchi chetu, mutunukunjika ye.”

²¹ Saulu ngwenyi: “Mwene Zambi anuwahise mumu hinwanguvwila keke.

²² Yeenu nukase chinyingi haze anaswame, ni yoze hamumona. Mumu ngunevu ngwo, kali chikanyame.

²³ Yeenu nukahengule kanawa kuma kuze anaswame, nukase shindakenyo, nwize nungulweze, mba mungukaya hamwe ni yenu. Nyi kwe ali ndoo ni musono, mungukamuzomba, chibwe kumufupa mu chifuchi cheswe cha Yuda.”

²⁴ No yaakatuka, yaatetekela kulutwe lia Saulu ku Zife. David ni tujita twenyi te kaali mu puya ya Maone, mu chimwe chikulo ku sude, mu puya yinene ya Yuda.

²⁵ Saulu ni tujita twenyi yaaya ni kumufupa. Alioze David yachivwa, kashika yaya kwenyi ha mulundu wa mawe mu puya ya Maone, yatwama ko, Muze Saulu hachivwa, yakaula David.

²⁶ Saulu ni tujita twenyi yaabwa sali limwe lia mulundu, David ni tujita twenyi, no yaabwa sali likwo. David te kanalipupwisa ha kuchina Saulu shimbu te ayo maachimujingilika hanga amukwate.

²⁷ Susumuku kanganda haheta ni kulweza Saulu ngwenyi: “Hilukenu nikawashi! Afilistia haanjila mu chifuchi!”

²⁸ Mba Saulu yalitwamina kuhanga David, yahiluka, yaya ni kwasa jita ni Afilistia. Kashika kuma kuze yaaluka ko jina ngwo: Mulundu wa Kulihandununa.

²⁹ David yakatuka ko, yaya ni kutwama mu chifuchi cha Engedi, yaswama ko.