1 Samuel 22 - Mukanda Wa Zambi 1970

Saulu yashiha mahako

¹ Hohene David yakatuka ko, yachinyina ku chivwenge cha Adulame. Muze ayayo ni akwa jiko lienyi akwo haachivwa, yaaya ni kutwama nenyi.

² Atu waze abinjishile kuli akwo, ni akwa makongo, ni akwa lamba yaaya kuli iye. Ayo eswe kwoka cho ngwe 400 ja malunga. David yabwa tetekeli yo.

³ David yakatuka ko, yaya ku limbo lia Mizpa mu chifuchi cha Moabe. Yambila mwanangana wa Moabe ngwenyi: “Tayizenu kama tata ni mama atwame ni yenu ndoo mungunyingika chize Zambi mangulingila.”

⁴ Mba David yahichika yisemi jenyi ni mwanangana wa Moabe. Kwenako atwamine shimbu lieswe lize David aswamine mu chivwenge.

⁵ Hohene mukwa munanyi wa Zambi, Gade, yeza kuli David, yamwamba ngwenyi: “Kanda utwama hano yako nikawashi ku chifuchi cha Yuda.” Chenacho David akatukile, yaya ku usaki wa Herete.

⁶ Limwe tangwa Saulu te kali mu limbo lia Gibea, kanatwama ha mulundu mushi lia mutondo, jina liawo tamariske, kanakwata kunga mu kwoko lienyi. Miata jenyi a tujita yaamujingilika, yaamulweza ngwo: “David ni atu jenyi haamona.”

⁷ Saulu yambila e miata ngwenyi: “Banjikenu yenu Abenjamne! Kuma mwana yono wa Jese, yenu eswe manwaha minda ya mbuto ya vinyu, nyi? Yenu eswe manupwisa miata a tujita twenyi, nyi?

⁸ Kashika nwakungutwama nenyi punga, nyi? Niumwe wa kuli yenu wangulwezele kama ngwenyi: ‘Mwane halikata Usendo ni David.’ Niumwe yoze wangubanda wangulwezele kama ngwenyi: ‘David kwali akuze kanafupu mana a kukushiha.’ Hanji ngwenyi: ‘Mwane Jonatane halimwisa David.’ ”

⁹ Doege, Kaedome, te kanamana hamwe ni e miata a tujita, yamba ngwenyi: “Yami namwene mwe mwana wa Jese yaheta ku Nobe kuli Ahimeleke, mwana wa Ahitube.

¹⁰ Mba Ahimeleke yahula Mwene Zambi hakutwala kuli David ni kumwaha yakulia ni mukwale wa Goliate, Kafilistia.”

¹¹ Kashika mwanangana yatuma atu ku Nobe ni kusaka hako Ahimeleke ni akwa jiko lia tato eswe, mumu no te mahako. Eswe yaaheta ku meso ja mwanangana.

¹² Saulu yambila Ahimeleke ngwenyi: “Banjika, mwana wa Ahitube.” Iye ngwenyi: “Vulie mwanangana.”

¹³ Saulu ngwenyi: “Mumu yika hiwangutwama punga, yena ni mwe mwana wa Jese? Mumu yika hiwamwaha yakulia ni mukwale, ni kumuhulila kuli Mwene Zambi? Hangutewulukila ni kanafupu kungushiha.”

¹⁴ Ahimeleke ngwenyi: “David kali kavumbi kenu wakushishika kuhiana? Kali Ukwe wenu ni kali nawa mwata wa tujita twenu waze akunufunga, ni akwa mu chota chenu eswe kaakumulemesa.

¹⁵ Ewa ngunakamuhulila Mwene Zambi, chino hi chisuho chitangu ko. Alioze ha chikuma cha kunutwama punga, mwanangana, acho chachinyingikine kwami, chibwe akwa jiko liami.”

¹⁶ Alioze mwanangana ngwenyi: “Yena Ahimeleke kumuufwa ni akwa jiko lia tatenu eswe.”

¹⁷ Mwanangana yambila tujita waze akumufunga ngwenyi: “Shihenu mahako ja Mwene Zambi eswe! Mumu haangutwama punga hamwe ni David. Kaangulwezele ngwo: ‘David hachina,’ chibwe anakachinyingika kulu”. Alioze tufunga yaalituna kwo kushiha mahako ja Mwene Zambi.

¹⁸ Mba mwanangana yambila Doege ngwenyi: “Ashihe yena!” Doege yakatuka, yaashiha eswe, te mahako makumi nake ni atano, akwa kuzala chikuto chihi cha uhako.

¹⁹ Saulu yahana nawa Shimbi ha kushiha atu eswe a mu Nobe, limbo lia mahako: malunga, ni mapwo, ni twanuke, ni ana akemba, ni ngombe, ni yimbulu, ni mapanga; yaashiha eswe.

²⁰ Alioze Abiatare, umwe mwana wa Ahimeleke yalilamwina, yachinyina kuli David.

²¹ Abiatare yalumbunwina David chize Saulu hashiha mahako ja Mwene Zambi.

²² David ngwenyi: “Ha tangwa lize muze namwene Doege, yingunyonga ngwami, Kumalweza Saulu. Kafwa ngwe yami nashihisa usoko we eswe.

²³ Hitwama ni yami. Kanda wivwa woma. Mumu yoze unafupu kukushiha, kanafupu nawa kungushiha yami. Hamwe ni yami muutwama kanawa.”