1 Samuel 21 - Mukanda Wa Zambi 1970

David yachina Saulu

¹ David yaheta ku limbo lia Nobe, kuli hako wa Zambi Ahimeleke. Neye yabatwiza David nikuchikima, yamuhula ngwenyi: “Kuchi mba nuneza chichize ukawenu?”

² David ngwenyi: “Mwanangana hangwaha yimwe milimo, alioze yangwamba ngwenyi: ‘Kanda ulweza niumwe sango ja milimo yino ngunakwehe.’ Hakutwala kuli tujita twami ngunakaashika tukalitakane kumwe kuma.

³ Chika nuli nacho kama cha kulia? Penu jimwe mbolo jitano hanji cheswe Chuma chiliko.”

⁴ Hako ngwenyi: “Chishi ni jimwe mbolo jikwo shina ja chijila. Muuhasa kuya najo, nyi tujita twenu kaalimwene ko ni mapwo.”

⁵ David ngwenyi: “Kutwalimwene kwetu ni mapwo, mumu matangwa eswe tujita twami kaakulijilika muze twakuya mu jila. Chibichibi muze tuli mu jila yilemu ngwe musono.”

⁶ Chenacho hako amuhele mbolo ja chijila mumu te kali lume ni jize jakutumbieka ku meso ja Mwene Zambi, jize haachiza ku mesa ni kusalakanyisa ho mbolo jaha. (

⁷ Ha tangwa lize te kuli umwe mwata wa tufunga twa Saulu, jina lienyi Doege te heza ni kuwayila Zambi.)

⁸ David yahula Ahimeleke ngwenyi: “Kuushi ni kunga hanji mukwale ungwehe kama, nyi? Chambachile mukwale hanji yitwa mumu milimo ya mwanangana chatamba kuyilinga fuji.”

⁹ Hako ngwenyi: “Nguli lume ni mukwale wa Goliate, Kafilistia yoze washihile mu chikulo cha Ela. We mukwale uli wakuvunga mu hina kunyima lia chikuto chihi cha uhako. Kutushi ni ukwo kuno, nyi unazange yako nawo.” David ngwenyi: “Kukushi ukwo walifwa nawo, ngwehenu wo!”

¹⁰ Hohene David yakatuka, yachina Saulu, yaya maha Akishe, mwanangana wa limbo lia Gate.

¹¹ Akwa kuyula yahula Akishe ngwo: “Au hi David ko, mwanangana wa chifuchi cha Aisraele, nyi? Tunambe ngwetu, mwenau mapwo embile muze te anahangana ngwo: ‘Saulu hashiha tununu twenyi, David hashiha makumi jenyi a tununu.’ ”

¹² David yevwila mwanangana Akishe woma muze hevwa maliji wano.

¹³ Ha chino yalionga kuzaluka ku meso jo, yalumuna kwenda chenyi, yasoneka Soneka ku yajilo ya limbo, yazulumiona yileji ha wevu wenyi.

¹⁴ Mba Akishe yambila akwa kuyula ngwenyi: “Kutala! Ngwami kanazaluka. Kuchi mba nwamunehanga kuli yami?

¹⁵ Te yizaluke Chishi no, kashika nwangunehenanga yono hanga alinge yitanga yenyi ya sonyi ku meso jami, nyi?”