1 Samuel 20 - Mukanda Wa Zambi 1970

Jonatane yakwasa David

¹ Hohene David yakatuka mu zuwo lia akwa munanyi ku Rama, yeza kuli Jonatane nikwamba ngwenyi: “Yika nalinga kama? Mulonga wami uka? Chibi chika nalinga kama kashika tatenu anazange kungushiha?”

² Jonatane ngwenyi: “Hi chocho ko. Kuuchi kufwa kwe. Tata keshi kulinga nichimwe chibwe chikepe chibwe chinene, shina mangulweza. Ngwe kuchi tata manguswekela Chuma chino? Hi chocho ko.”

³ Alioze David ngwenyi: “Tatenu kananyingika kanawa chize wakunguzanga. Kashika ananyongo ngwenyi: ‘Jonatane kanda anyingika Chuma chino, kuchina mevwa kubiha.’ Ni mwe Zambi ni mwe yena mwene kwangusala hakehe ni kufwa.”

⁴ Mba Jonatane yambila David ngwenyi: “Cheswacho muwamba, munguchilinga.”

⁵ David ngwenyi: “Tala, hamene lili tangwa lia chiwanyino cha Kakweji Mwaha, Changutamba kubwa ku mesa ya mwanangana. Alioze ngutayize nguye ni kuswama mu yambu ndoo mu matatu chingoloshi.

⁶ Nyi tatenu manguhula, mulweze ngwe: ‘David kanakaliumba kuli yami azomboke ku mahio ku Betleheme, akalambule mulambu wa mwaka ha mwaka hamwe ni usoko wenyi eswe.’

⁷ Nyi mamba ngwenyi: ‘Chibema,’ kuma kechi kungulinga Chuma, nyi matenuka, hinyingika ngwe, kanazange kungushiha.

⁸ Ngukwase kama, mumu hiunakolesa Usendo ni yami kavumbi kenu. Alioze nyi mulonga nguli nawo hingushihe lume yena mwene! Kuchi mba muungutwala kuli tatenu?”

⁹ Jonatane ngwenyi: “Chuma acho kanda uchinyonga nihakehe. Nyi hinanyingika ngwami, tata kanambe kukulinga chibi, mungukuswekela cho, nyi?”

¹⁰ David ngwenyi: “Iya mangulweza nyi tatenu makukumbulula ni utenu?”

¹¹ Jonatane ngwenyi: “Tuyenu ku minda.” Chenacho ayile ku minda.

¹² Jonatane ngwenyi: “Mwene Zambi ya Aisraele kali chela chami. Ha ola ngwe yino hamene hanji hamene alize, mungukahula tata. Nyi kanakwivu kuwaha, mungukakulweza.

¹³ Alioze nyi mazanga kukushiha, nyi chichi kukulweza ni kukuchinyisa, Mwene Zambi angushihe. Mwene Zambi akabwe ni yena ngwe chize abwile ni tata.

¹⁴ Nyi mungutwama ni mwono, funga kama Usendo wetu. Alioze nyi mungufwa,

¹⁵ kanda uvulama kulweza utu kuli akwa jiko liami ndoo ku miaka yeswe. Muze Mwene Zambi hashiha akwa kole je eswe,

¹⁶ ukafunga kama Usendo wetu. Nyi muukashiha Usendo wetu, Mwene Zambi makumwesa lamba.”

¹⁷ Jonatane yashingisa nawa David hakutwala ku zango lienyi, mumu te kakumuzanga ngwe chize akulizanga iye mwene.

¹⁸ Jonatane yamwamba ngwenyi: “Hamene ha tangwa lia chiwanyino cha Kakweji Mwaha kechi kukumona ku mesa.

¹⁹ Hamene alize makakufupa chikolo. Kashika ukaya kuma kuze waswamine hatangu, kunyima lia chingina cha mawe.

²⁰ Yami mungukasa mivwi yitatu ngwe liwe ngunase.

²¹ Mba mungukatuma mukweze ngwami, yako wande mivwi. Nyi namba ngwami: ‘Tala; mivwi yili sali lino, yande,’ muukanyingika ngwe kuma kunabeme; mba muuhasa kwiza. Nyi mwe Mwene Zambi, kukuchi kubwa nichimwe.

²² Alioze nyi mungukambila mukweze ngwami, ‘Tala, mivwi yili sali lize,’ mba yena hiyako mumu Mwene Zambi hakutuma.

²³ Alioze hakutwala ku chilakenyo chetu, Mwene Zambi makatukwasa kuchifunga ndoo ku miaka yeswe.”

²⁴ Chenacho David aswamine ku minda. Mba ha chiwanyino cha Kakweji Mwaha mwanangana Saulu yeza ka mesa.

²⁵ Yatwama ha chitwamo chenyi hehi ni mbango. Abnere yatwama ku sali lia Saulu ni Jonatane yatwama ha talanganyi ni Abnere, alioze ha chitwamo cha David hamokomoko.

²⁶ Alioze Saulu tangwa lize kambile ko nichimwe, mumu yanyonga ngwenyi, kota chimwe Chuma chamuwana, kalijilikile, kashika kejile.

²⁷ Alioze ha tangwa lia muchaali, ha chitwamo cha David hindu hamokomoko. Hohene Saulu yahula Jonatane ngwenyi: “Kuchi mba mwana wa Jese kejile ni kulia, chibwe zau chibwe musono?”

²⁸ Jonatane yamukumbulula Saulu ngwenyi: “Vulie David kanakangwita lisesa ha kuya ku Betleheme,

²⁹ ngwenyi: ‘Ngutayize nguye ku limbo lia Betleheme, mumu usoko wetu kaanalambula mulambu, ni yaya hangwamba ngwenyi, Changutamba kubwako. Kashika, nyi uli sepa liami, ngutayize ngukamone ayaya.’ Kashika kejile ku mesa ya mwanangana.”

³⁰ Mba Saulu yatenukina Jonatane kuhiana, ngwenyi: “Yena mwana wa piya. Ngunanyingika ngwami, yena unahakwila yono mwana wa Jese. Muulikolesa sonyi kumuwika ni mwe noko.

³¹ Yena kuwanyingikine ngwe, shimbu mwe mwana wa Jese matwama ni mwono, yena kuuchi kubwa mwanangana, nyi? Haliabwila yako umunehe, ngumushihe lume.”

³² Jonatane yakumbulula tato ngwenyi: “Yika mafwila mwana mbala? Chibi chika alinga?”

³³ Saulu yakonga Jonatane kunga hanga amushihe. Mba Jonatane yanyingika ngwenyi, tata hakalisa mbunge yenyi ashihe David.

³⁴ Jonatane yakatuka ku mesa ni kutenuka kuhiana, kalile nichimwe ha tangwa lize lia muchaali lia chiwanyino cha Kakweji Mwaha mumu Saulu hatuka David.

³⁵ Mukwacha Jonatane yaya ku munda kuze alilakenyene ni David, yaya ni mukweze.

³⁶ Yambila mukweze ngwenyi: “Zomboka wande mivwi yize ngunase.” Shimbu lize te mwe mukweze anazomboka, Jonatane yasa mivwi kuze kanda.

³⁷ Muze mukweze haheta kuze kwaholokelanga mivwi, Jonatane yakololoka ngwenyi: “Mivwi kuze kanda.

³⁸ Zomboka, tambuka, kanda ulaluka.” Mwe mukweze yanda mivwi, yayinehena kako.

³⁹ Alioze mukweze kanyingikine ko nichimwe, Shina lume Jonatane ni David enoo te ananyingika.

⁴⁰ Jonatane yahana yitwa yenyi yeswe kuli mukweze, ngwenyi: “Yitwale ku limbo.”

⁴¹ Muze mukweze haya, David yakatuka ku chingina cha mawe, yafulamana hashi katatu. Eswe aali yaalishisa, yaalila, alioze David yalila kuhiana.

⁴² Jonatane yambila David ngwenyi: “Yako kanawa. Hanga yetu eswe aali hitwalishinga ni jina lia Mwene Zambi, Zambi matukwasa, hamwe ni mavungu jetu, kufunga chilakenyo chetu ndoo ku miaka yeswe.” David yakatuka, yaya kwenyi, Jonatane yanjila mu limbo.