1 Samuel 2 - Mukanda Wa Zambi 1970

Hana yasakwila Zambi

¹ Mba Hana yasakwila Zambi ngwenyi: “Mwene Zambi hananguwahisa, ngunawahilila ha yize hangulingila. Ngunasehe akwa kole jami. Ngunawahilila mumu Zambi hangukwasa!

² “Kukushi niumwe munangi ngwe Mwene Zambi, wakuhi niumwe ngwe iye. Wakuhi kafunga ngwe Zambi yetu.

³ Kanda uhanjika ni kulisuta; echenu maliji jenu akulengumuka. Mumu Mwene Zambi, Zambi ya yinyingi kakubatula yitanga yeswe ya atu.

⁴ Mata ja malunga a ndundo haanaamakuna, alioze akwa mulekeleke haanajikiza.

⁵ Waze te akukuta haalipwisa ngamba mumu ha kulia, waze te akwivwa zala keeshi kuyivwa nawa. Mumba hasema shimbiali, alioze semi hasula.

⁶ Mwene Zambi kakushiha ni kakupwisa nawa ni mwono. Kakupalumwisa atu muma mwa afu, mba kakwahindwisa nawa.

⁷ Mwene Zambi kakupwisa atu amwe yiswale, akwo pichi. Kakukehesa amwe, kakulemesa akwo.

⁸ Kakukatwisa yiswale mu fufuta, kakuchiza akwa kuhona mu lamba lio. Kakwanangamisa akatwame hakachi ka ana ja mianangana, akahinge akwa ulemu. Fundamentu ya hashi yili ya mbala ya Mwene Zambi, he hashi, hanatungu ho.

⁹ “Makafunga atu jenyi akwa kushishika, alioze yingulungulu maakatoka mu milima, mumu atu keeshi kukumba ni tachi jo ene.

¹⁰ Mwene Zambi makabatwola yipinji akwa kole jenyi, makalimika no ni kukulunguza mwilu. Mwene Zambi makabatwila akwa hashi eswe; makahana tachi kuli mwanangana wenyi, makakwasa mwanangana yoze hatongola kukumba.”

¹¹ Elkana yahiluka ku mahienyi ku Rama, alioze Samuel yatwama ku Shilo, yalingila Mwene Zambi mu chiyulo cha hako Eli.

Ana ja Eli a malunga

¹² Ana ja Eli a malunga yaabwa atu amokomoko, te keeshi kulemesa Mwene Zambi,

¹³ chibwe Shimbi jize jinalumbununa chize mahako maahasa kutambula milambu kuli atu. Ndako jo jabwile jino: muze mutu analambula mulambu, ngamba ya hako meza ni musako. Muze te machiteleka ye yifwo,

¹⁴ mayinjisa mu ndeho (yimbia) ya kwochela yifwo, mba yifwo yeswe muyikwata ku musako muyibwa ya mbala ya hako. Chenacho te akulinga mu Shilo kuli Aisraele eswe waze ahetele ko.

¹⁵ Chibwe shimbu lize kanda achocha maji, ngamba ya hako meza, mambila mukwa kulambula ngwenyi: “Ngwehe yifwo hanga hako akoche, mumu iye keshi kutambula yifwo ya kuteleka, kanazange ya wisu.”

¹⁶ Nyi ngwe mwe mukwa kulambula makumbulula ngwenyi: “Tulingenu nikulita ni Shimbi, tuliangenu kwocha maji, mba muwanda chize unazange,” ngamba ya hako mamba ngwenyi: “Ka kwami! Ngweheyo haliabwila! Nyi ka, munguyitambula ni tachi!”

¹⁷ Mulonga uno wa ana ja Eli a malunga yiubwa unene Wahiana ku meso ja Mwene Zambi, mumu mulambu wa Mwene Zambi te hiwalumuka chizelwokeso ku meso ja atu.

Samuel mu limbo lia Shilo

¹⁸ Alioze Samuel yalingila Mwene Zambi chize ku wanuke wenyi, te kakuzala chikuto chihi cha chijila.

¹⁹ Chikwo nawa, naye te kakumutongela kachikuto kabema ni kumutwalila ko muze te akuya ni lunga lienyi mu kulambula mulambu wa mwaka ha mwaka.

²⁰ Eli te kakuwahisa Elkana ni pwo lienyi nikwaamba ngwenyi: “Mwene Zambi akwehe ana ni pwo yono, mumu Samuel hiwamukunjika ku moko jenyi.” Mba muze haawahisa, ayo maahiluka ku mahio.

²¹ Mwene Zambi yawahisa Hana, neye yasema ana atatu akwo a malunga ni a mapwo aali. Mwe Samuel yatatuka nikulingila Mwene Zambi.

Eli ni ana jenyi a malunga

²² Eli yabwa kashinakaji. Te kakwivwa yeswe yize ana jenyi a malunga alingile Aisraele, ni chize te akulimona ni mapwo muze akulinga milimo ku chikolo cha zuwo lia Mwene Zambi.

²³ Eli yaamba ngwenyi: “Kuchi kevwe nwakulinga yuma yibwahaha? Mumu nakwivwa yibi yize nwakulinga atu wano eswe.

²⁴ Ana jami, echenu, mumu lufuma wenu mubi. Nwakuvulumwisa atu ja Mwene Zambi.

²⁵ Nyi mutu mavulumuna mutu ni mukwo, Zambi maamubatwila. Alioze nyi wavulumuna Mwene Zambi, iya mba mamuhakwila?” Hindu kaabanjikile ko liji lia tato, mumu te Mwene Zambi habatula twashiha.

²⁶ Alioze mukweze Samuel yatatuka mujimba, yabwa mukweze mubema. Mwene Zambi ni atu yamwivwa kuwaha.

Mukwa munanyi yahanjika hakutwala ku jiko lia Eli

²⁷ Umwe mukwa munanyi yeza kuli Eli, yamwamba maliji wano a kuli Mwene Zambi ngwenyi: “Muze kashakulu ke Arone, ni jiko lienyi, abwile ndungo ja mwanangana wa chifuchi cha Egiptu, nalisolwele kuli ayo.

²⁸ Ku mavungu eswe ja Aisraele natongwele jiko lienyi hanga akabwe mahako jami, akalingile ku chilumbilo chami, akoche mbuto ya vumba libema, akazale chikuto chihi cha uhako muze maanguhula. Nawa natayijile kwaaha Chihanda cha milambu yeswe ya kwocha ya Aisraele.

²⁹ Mba kuchi nwakutala ni kuzo ha milambu ni yawana yami yize nakuhula kuli atu jami? Kuchi mba yena Eli wakulemesa ana je kuhiana yami, wakwatayiza kulitohwesa ni kulia yipinji yibema yahiana ya milambu yize atu jami akungulambula?

³⁰ Yami Mwene Zambi, Zambi ya Aisraele, ngunambe ngwami, chamwenemwene nalakenyene ngwami, akwa jiko lie ni akwa jimo lie maakangulingila milimo ya uhako matangwa eswe. Alioze haliabwila ngunambe ngwamie, chichi kuchitayiza nawa, mumu atu waze maangulemesa ni yami mungwalemesa, alioze waze maangulelesa ni yami mungwalelesa.

³¹ Tala, tangwa mulikeza muze mungukashiha akweze je eswe a malunga a mu jimo lie ni a ku jiko lie, hanga lunga niumwe wa ku jiko lie makabwa kashinakaji.

³² Mu lamba lie muukatala ni ukwa ha yiwape ya Aisraele akwo, alioze mutu niumwe wa ku jiko lie makabwa kashinakaji.

³³ Hindu mutu umuwika wa ku vungu lie mwe makalinduluka ni mwono, kumakangulingila milimo ya uhako. Alioze makalila ni masoji anji ni chinyengo mu mbunge, ni atu akwo eswe a ku vungu lie maakafwa mu jita.

³⁴ Chino muchikabwa chilayi che ngwami, ana je aali a malunga, Hofni ni Finehase, maakafwa eswe aali tangwa limuwika.

³⁵ Mungukatongola umwe hako weka, mukwa kushishika, yoze makalinga yeswe yize yinalite ni manyonga jami. Mungukalongesa akwa jiko lienyi, no maakalingila mwanangana yoze natongwele ku miaka yeswe.

³⁶ Mutu mweswe wa ku jiko lie, yoze makasala, makaya kuli hako yoze ni kumwita lumbongo ni yimwe yakulia, ni kwamba ngwenyi, ngunalembe ungwehe kama yimwe milimo ya kukwasa mahako hanga ngukalie kama.”