1 Samuel 19 - Mukanda Wa Zambi 1970

Saulu yahungumiona David

¹ Saulu yazanga kushiha David, yalweza mwanenyi Jonatane ni akwa kuyula eswe. Alioze Jonatane yazanga David kuhiana,

² kashika yamulweza ngwenyi: “Tata kanazange kukushiha. Ukanyama hamene chichamene ukaswama homa haze hanajiki,

³ Mba yami mungukaya ngukamane hamwe ni tata kuze unaswame. Mungukahanjika ni tata hakutwala kuli yena. Nyi mungukevwa limwe liji mungukakulweza.”

⁴ Jonatane yahanjika kanawa ni tato Saulu hakutwala kuli David, ngwenyi: “Mwanangana, kanda nulinga kama kavumbi kenu David chibi, mumu iye kanulingile ko chibi. Chikwo nawa, hanukwasa kuhiana.

⁵ Hananjila mu utoji wa kufwa muze ashihile mwe Goliate mba Mwene Zambi yakwasa Aisraele kukumba kuhiana. Ni yenu nwachimwene, yinuwahilila. Mba kuchi munuvulumuna ni kushiha mutu yoze keshi chitela?”

⁶ Saulu yabanjika ku liji lia Jonatane, yalishinga ngwenyi: “Ni mwe Mwene Zambi, chichi kumushiha.”

⁷ Hohene Jonatane yatambika David, yamulweza maliji waze eswe. Mba yaneha David ku meso ja Saulu, neye yalingila mwanangana ngwe hatangu.

⁸ Yikubwa nawa jita ni Afilistia, David yatuhuka, yaya, yashiha anji kuhiana. Mba Afilistia yaachina ku meso jenyi.

⁹ Limwe tangwa mwiku ubi wa kuli Mwene Zambi yiuhulumukina Saulu ni tachi shimbu te unachitwama mu zuwo lienyi ni kunga lienyi mu kwoko, David te kanamwimbila kalialia.

¹⁰ Saulu yeseka kubalakenya David ku mbango ya zuwo ni kunga lienyi. Alioze David yalieha, mba kunga yilikwata mu mbango, David yachina.

¹¹ Ufuku uzewene Saulu yatuma tunganda ku zuwo lia David ni kumutala, hanga amushihe chichamene. Alioze Mikale pwo lienyi yamulweza ngwenyi: “Nyi musono kuwalilamwinyine, hamene kumaakushiha.”

¹² Mba Mikale yatuhwishila David ha kapenda, yachina kwenyi.

¹³ Hohene Mikale yanda umwe hamba, yamusa ha muhela, yasa musau wa wona wa pembe ku mutwe mba yamufuka ni hina lia ha muhela.

¹⁴ Mba muze Saulu hatuma tunganda akwate David, Mikale yamba ngwenyi: “Kanayiji.”

¹⁵ Ha chino Saulu yatuma nawa tunganda ni kutala David ayo ene, ngwenyi: “Ngunehenenu ye ni we muhela kumuwika hanga ngumushihe.”

¹⁶ Muze e tunganda haanjila, yaamona lume hamba mwe uli ha muhela ni musau wa wona wa pembe ku mutwe.

¹⁷ Saulu yahula Mikale ngwenyi: “Kuchi wangwonga chichize nikwecha mukwa kole yami achine?” Mikale yamukumbulula ngwenyi: “Mumu yangwamba ngwenyi! Ngweche kwami. Nyi ka, mungukushiha.”

¹⁸ David yachina, yaya maha Samuel ku limbo lia Rama, yamulumbunwina yeswe yize amulingile Saulu. Hohene David ni Samuel yaaya ni kutwama mu zuwo lia akwa munanyi.

¹⁹ Atu yaambulwila Saulu ngwo: “David mu zuwo lia akwa munanyi ali ku Rama.”

²⁰ Saulu yatuma tunganda hanga akwate David. Ayo, muze haamona mbunga ya akwa munanyi, kaanamana ni kuhanjika munanyi, ni Samuel mwe tetekeli yo, Mwiku wa Zambi yiuhulumukina tunganda ni tachi, no nawa yaahanjika munanyi.

²¹ Muze haambulwila Saulu sango jize, yatuma tunganda akwo, no nawa yaahanjika munanyi. Saulu yatuma nawa chisuho cha muchitatu, no nawa yahanjika munanyi.

²² Mba yaya iye mwene ku Rama. Yaheta ku shima linene ku Seku. Yahula ngwenyi: “David ni Samuel, kulihi ali?” Yaamulweza ngwo: “Mu zuwo lia akwa munanyi ku Rama.”

²³ Muze te anayi ko, Mwiku wa Zambi yiumuhulumukina ni tachi. Neye yaya ni kuhanjika munanyi ndoo yaheta ku zuwo lia akwa munanyi.

²⁴ Neye yazula mahina jenyi, yahanjika munanyi ku meso ja Samuel. Yabomba uselesele chize ku chichamene ndoo ku chichamene chikwo. (Kashika atu akwamba kashilikilo yoze ngwo: “Saulu neye kali mukwa munanyi nawa, nyi?”)