1 Samuel 18 - Mukanda Wa Zambi 1970

¹ Saulu yamanununa kuhanjika ni David. Chize ku tangwa lize Jonatane yazanga David kuhiana, ngwe chize akulizanga iye mwene.

² Saulu yatambula David tangwa lizeliene, hi kamutayijile ko kuhiluka nawa ku zuwo lia tato.

³ Jonatane yakolesa Usendo ni David mumu yamuzanga ni mbunge yenyi yeswe.

⁴ Jonatane yazula hina lienyi lia lubula, yalihana kuli David, yamwaha nawa mahina jenyi a jita, ni mukwale, ni uta, ni muya.

⁵ David, yalinga kanawa yuma yeswe yize Saulu amutumine ha kulinga. Kashika Saulu yamupwisa mwata wa tujita twenyi. Chino yichibemena tujita eswe ni e miata jo.

Saulu yevwila David ukwa

⁶ Alioze muze haatuhuka mu jita kuze ashihilile Goliate mapwo yaatuhuka mu membo eswe ja Aisraele ni kubatwiza mwanangana Saulu nikwimba miaso ya kuwahilila, ni kuhangana, ni kwimba miyaya ni tulialia.

⁷ E mapwo yaalitawiza ngwo: “Saulu hashiha tununu twenyi, David hashiha makumi jenyi a tununu.”

⁸ Liji lino Saulu yalivwila kubiha, yatenuka, yamba ngwenyi: “David haamwaha makumi a tununu, alioze yami haapa tununu wika. Chika chamusala? Ngwami, wanangana wika.”

⁹ Chize ku tangwa lize Saulu yabutuka kuvwila David ukwa.

¹⁰ Mukwacha mwiku ubi wa kuli Zambi yiuulumukina Saulu ni tachi, neye yahanjika ngwe kanazaluka. David te kanembi kalialia ngwe chize te akulinga matangwa eswe, Saulu te kali ni kunga lienyi mu kwoko.

¹¹ Saulu yalihanjikisa ngwenyi: “Mungumubalakenya ndusu ku mbango.” Yamukonga kunga yisuho yaali, alioze David yalieha kaali ku meso jenyi.

¹² Saulu yevwila David woma mumu Mwene Zambi yabwa hamwe nenyi, alioze Saulu yamwehuka.

¹³ Kashika Saulu yakatwisa David ku meso jenyi, yamupwisa mwata wa mbunga ya tujita kanunu. David neye yasongwela tujita twenyi mu jita,

¹⁴ yalinga yuma yeswe kanawa mumu Mwene Zambi yabwa hamwe nenyi.

¹⁵ Muze Saulu hamona ngwenyi, David kanalingi yuma yeswe kanawa, yamuvwila woma kuhiana.

¹⁶ Alioze Aisraele ni Auyda eswe yaazanga David, mumu te kali mwata wa tachi ha kukumba mu jita.

David yambata mwana wa Saulu

¹⁷ Saulu yambila David ngwenyi: “Nyi muukabwa chitakame ni mukwa kushishika ha kwashila Mwene Zambi jita, mungukakwaha Merabe mwanami wa mukulwana akabwe pwo lie.” (Saulu yanyonga ngwenyi, Chenacho Afilistia maakashiha David, hi yami ko.)

¹⁸ David yamukumbulula ngwenyi: “Vulie mwane, yami nguli iya, hanji vungu lia tata mu Israele kaali aya mba ngukabwe Ukwe wa mwanangana?”

¹⁹ Muze tangwa hiliatakana lia kuhangisa Merabe kuli David, Saulu yamuhangisa kuli Adriele wa ku limbo lia Mehola.

²⁰ Alioze Mikale, mwana wa Saulu, yazanga David. Muze Saulu hachivwa, yawahilila,

²¹ yamba ngwenyi: “Mungumwaha ye hanga akabwe muheto kuli iye. Afilistia amushihe.” Kashika Saulu yamwamba chisuho cha muchaali ngwenyi: “Yena muukabwa Ukwe wami.”

²² Saulu yatuma akwa kuyula ngwenyi: “Hanjikenu ni David ku tenga ngwenu: ‘Tala, mwanangana kanakuzange chikolo, ni e miata eswe kaanakuzange, kashika bwako Ukwe wa mwanangana.’ ”

²³ E akwa kuyula yaambulwila David maliji wano. Neye yakumbulula ngwenyi: “Nunamono ngwenu, chili chashi kubwa Ukwe wa mwanangana, nyi? Ngwami, nguli chiswale, mutu mulelu lume?”

²⁴ Akwa kuyula yaatwalila Saulu liji lize ngwo: “Evwa chize ahanjika David.”

²⁵ Saulu ngwenyi: “Mulwezenu ngwenu: ‘Mwanangana kazangile chihako chikwo shina mishosha ya Afilistia kulakaji hanga akalikale hali akwa kole jenyi.’ ” (Saulu yanyonga ngwenyi, David mamushiha kuli Afilistia.)

²⁶ Muze akwa kuyula haalweza David maliji waze, iye yevwa kuwaha ha kubwa Ukwe wa mwanangana. Muze tangwa lia umbachiso kanda liheta,

²⁷ David ni tujita twenyi yaakatuka, yaaya kwo, yaashiha kulakaji jaali ja Afilistia. Mba David yaneha mishosha yo yeswe kuli mwanangana, yayalula hanga akabwe Ukwe wenyi. Chenacho Saulu ahangishile mwanenyi Mikale kuli David.

²⁸ Saulu yanyingika ngwenyi, Mwene Zambi kali hamwe ni David. Chikwo nawa Mikale, mwana wa Saulu, yazanga David kuhiana.

²⁹ Kashika Saulu yevwila nawa David wuli kuhiana, yabwa mukwa kole yenyi matangwa eswe.

³⁰ Mianangana ja Afilistia yaatuhwoka akase jita, alioze yisuho yeswe yize ashile jita, David yakumba Afilistia kuhiana miata akwo a tujita twa Saulu, Ha chino David yafumana kuhiana.