1 Samuel 16 - Mukanda Wa Zambi 1970

Samuel yawayisa David hanga abwe mwanangana

¹ Mwene Zambi yambila Samuel ngwenyi: “Matangwa angahi unazange kulishimwoka hali Saulu. Hinalituna ye kubwa mwanangana wa Aisraele. Alioze haliabwila anda maji a olive uye ku limbo lia Betleheme kuli Jese, mumu hinatongola umwe wa kuli ana jenyi a malunga kubwa mwanangana.”

² Samuel yakumbulula ngwenyi: “Ngwe kuchi ngunahase kuya ko? Nyi Saulu wachivwa, mangushiha!” Mwene Zambi ngwenyi: “Yako ni chimbembe wa chihwo, muwamba ngwe: ‘Ngunayi ni kulambula mulambu kuli Mwene Zambi.’

³ Ulakenya Jese eze kuze muulambwila mulambu, mba mungukulweza chize muulinga. Muuwayisa lunga yoze mungukakulweza kubwa mwanangana.”

⁴ Samuel yalinga chize amwambile Mwene Zambi, yaya ku Betleheme. Makulwana a mu limbo yaamubatwiza nikuchikima, yaamuhula ngwo: “Nuneza kama ni uhwimino, nyi?”

⁵ Iye ngwenyi: “Ewa, nguneza ni kulambula Mwene Zambi mulambu.” Yambila nawa Jese ni ana jenyi a malunga alijilike, yaalakenya aye nenyi ni kulambula mulambu.

⁶ Muze haaheta, Samuel yamona Eliabe mwana wa Jese, yalihanjikisa ngwenyi: “Mutu yono unamana hano, chamwenemwene mwenawo Mwene Zambi hatongola.”

⁷ Alioze Mwene Zambi yamwamba ngwenyi: “Kanda utala ku meso jenyi, hanji kutaluka chenyi, mumu hinalituna ye. Mutu kakutala ku meso, alioze yami nakutala mu mbunge.”

⁸ Mba Jese yatambika mwanenyi Abinadabe, yamuneha ku meso ja Samuel Samuel yamba ngwenyi: “Chibwe yono. Mwene Zambi kamutongwele.”

⁹ Mba Jese yaneha Shama. Alioze Samuel ngwenyi: “Chibwe yono Mwene Zambi kanutongwele.”

¹⁰ Chenacho Jese anehene ana jenyi a malunga shimbiali ku meso ja Samuel, alioze Samuel ngwenyi: “Ka, Mwene Zambi katongwele niumwe wa kuli ayo.”

¹¹ Samuel yamuhula ngwenyi: “Ana je a malunga eswe wa ene, nyi?” Iye ngwenyi: “Kwasala Kasulasongo, kanafungu mapanga.” Samuel ngwenyi: “Tuma mutu amusake, kutuchi kulambula mulambu ndoo meza.”

¹² Yaamusaka. Te kali lunga walimuka ku meso, chitakame. Mwene Zambi yamba ngwenyi: “Mwenau, katuka umuwayise.”

¹³ Samuel yanda mbinga ya maji a olive yamuwayisa ku meso ja ayayo. Hazehene Mwiku wa Mwene Zambi yiuhulumukina David ni tachi, newo yiubwa muli iye chize ku tangwa lize. Samuel yakatuka, yaya ku Rama.

David mu zuwo lia Saulu

¹⁴ Mwiku wa Mwene Zambi te hiwatuhuka muli Saulu, mba mwiku ubi wa kuli Mwene Zambi yiumubinjisa.

¹⁵ Ngamba ja Saulu yaamwamba ngwo: “Vulie mwanangana! Talenu, mwiku ubi wa kuli Mwene Zambi unanubinjisa.

¹⁶ Kashika, nututume tuye ni kufupa yoze Unanyingika kwimba kalialia kanawa. Mba muze mwiku ubi muunuhulumukina, iye memba kalialia, mba munuhuzuluka.”

¹⁷ Saulu yambila ngamba jenyi ngwenyi: “Ngufupilenu yoze wakwimba kanawa, nungunehene ye.”

¹⁸ Umwe ngamba yakumbulula ngwenyi: “Hinamona umwe mukweze, mwana wa Jese, wa ku Betleheme, kananyingika kwimba kanawa. Nawa kali mukwa hamu, kajita wa tachi, kalimuka, kakuhanjika kanawa, ni Mwene Zambi kali hamwe nenyi.”

¹⁹ Kashika Saulu yatumina Jese tunganda ngwenyi: “Ngutumine mwane David, yoze wakufunga mapanga.”

²⁰ Jese yanda mbolo, ni tuku ya vinyu, ni mwana pembe, yayitwika hali chimbulu. Mba yayituma kuli Saulu hamwe ni David.

²¹ David yaheta kuli Saulu, yabwa kavumbi kenyi. Mwe Saulu yamuzanga kuhiana, yamupwisa mukwa kumumbachila yitwa yenyi ya jita.

²² Saulu yatumina Jese liji ngwenyi: “Ngunaliumbu, tayiza kama David kubwa kavumbi kami, mumu ngunamuzange kuhiana.”

²³ Mba muze mwiku Ubi wa kuli Zambi wahulumukinyine Saulu, David yembamba kalialia ndoo ni muze Saulu mahwima mbunge.