1 Samuel 15 - Mukanda Wa Zambi 1970

Aisraele yaasa jita ni Aamaleke

¹ Samuel yambila Saulu ngwenu “Mwene Zambi wangutumine ni kukuwayisa maji hanga akupwise mwanangana wa atu jenyi Aisraele. Kashika haliabwila banjika kanawa maliji ja Mwene Zambi Mukwa Ndundo Jeswe.

² Kanambe ngwenyi: ‘Mungumwesa Aamaleke lamba mumu tushakulu two ashile jita ni Aisraele muze atuhukile mu chifuchi cha Egiptu.

³ Kashika yako wase jita ni Aamaleke, ukenyeke yeswe yize ali nayo. Kanda wevwila keke, alioze ushiha eswe, malunga, ni mapwo, ni twanuke, ni ana akemba, ni ngombe, ni mapanga, ni tumelu, ni yimbulu.’ ”

⁴ Saulu yatambika tujita eswe, yaalula ku limbo lia Teleme. Yiikubwa tujita twa Aisraele 200,000 ni twa Ayuda 10,000.

⁵ Hohene Saulu yaya ku limbo lia Aamaleke, yaajikinyina mu chikulo

⁶ Yambila Akene ngwenyi: “Tuhukenu mukachi ka Aamaleke kuchina mungunwonona hamwe no. Mumu yenu nwasele Aisraele vumbi muze akatukile mu Egiptu.” Chenacho Akene akatukile mukachi ka Aamaleke.

⁷ Saulu yakumba Aamaleke chize ku Havwila ndoo ku Shure ku chivumbuko cha Egiptu

⁸ Yakwata Agage mwanangana wa Aamaleke ni mwono, alioze atu akwo eswe yaashiha.

⁹ Saulu ni tujita twenyi kaashihile ko Agage ni yimuna yibema hakachi ka mapanga, ni ngombe, ni yimbembe a maji, ni ana mapanga, ni yuma yeswe yikwo yibema; yaanongesa shina lume yuma yamokomoko.

Zambi yalituna Saulu kubwa mwanangana

¹⁰ Mwene Zambi yambila Samuel ngwenyi:

¹¹ “Ngunevu chinyengo chize napwishile Saulu mwanangana, mumu hangumba nyima ni hakolema Shimbi jami.” Samuel yatenuka, yalila ku meso ja Mwene Zambi ufuku weswe.

¹² Samuel yalimeneka ha chichamene atakane ni Saulu. Atu yaalweza Samuel ngwo: “Saulu haya ku chihunda cha Karmele, kuze hanalimikina luliwe lwa kumwiwulukila, mba haya ku limbo lia Gilgale.”

¹³ Samuel yaheta kuli Saulu, mba Saulu yamwamba ngwenyi: “Mwene Zambi anuwahise! Hinafunga Shimbi jenyi.”

¹⁴ Samuel yahula ngwenyi: “Mba kuteta cha mapanga ni ngombe ngunevu kuchi chinalumbunuka?”

¹⁵ Saulu ngwenyi: “Tujita twami e ayibuba kuli Aamaleke. Yaafunga mapanga ni ngombe abema kuhiana akulambula milambu kuli Mwene Zambi, Zambi yenu, akwo eswe hitwashiha.”

¹⁶ Samuel ngwenyi: “Hihola! Ngunakwambulwila chize Mwene Zambi angulwezanga ufuku.” Saulu ngwenyi: “Ngulwezenu.”

¹⁷ Samuel ngwenyi: “Chibwe yena mwene wakulimona ngwe uli mukepe, hindu uli tetekeli wa mavungu ja Aisraele. Mwene Zambi hanakuwayisa kubwa mwanangana wa Aisraele.

¹⁸ Mwene Zambi wakutumine ni kunongesa Aamaleke atu waze abi. Yamba ngwenyi: ‘Yako wase no jita ndoo maakuwa eswe.’

¹⁹ Kuchi mba kuwononokene ku maliji jenyi? Kuchi te wabubile ubite ni kulinga Chuma ngwe chize Mwene Zambi anevwila kubiha?”

²⁰ Saulu yambila Samuel ngwenyi: “Alioze hinononoka ku maliji a Mwene Zambi. Hinenda mu jila yize anakangutuma. Hinaneha mwanangana Agage, hinanongesa liakulu Aamaleke.

²¹ Alioze e tujita kaashihile ko mapanga ni ngombe, abema kuhiana, alioze yaaneha kuno ku Gilgale ha kwalambula mulambu kuli Mwene Zambi, Zambi yenu.”

²² Samuel ngwenyi: “Chuma chika Mwene Zambi akuzanga kuhiana, kumwononokena nyi, hanji kumulambula milambu ni yawana? Kumwononokena kuchahiana kumulambula milambu ya mapanga abema kuhiana.

²³ Kukolema Shimbi ya Zambi chili ngwe kupanda wanga, ni kulengumuka chili ngwe kukombelela mahamba. Muze hiwalituna Shimbi ya Mwene Zambi, neye halituna yena kubwa mwanangana.”

²⁴ Saulu ngwenyi: “Ewa, hingunavulumuna. Hingunakolema Shimbi ya Mwene Zambi ni kubangula longeso lienu, mumu nevwilile tujita twami woma ni kubanjika ku maliji jo.

²⁵ Alioze ngukonekenenu kama mulonga wami, nwize ni yami ku Gilgale, ngukawayile kama Mwene Zambi.”

²⁶ Samuel ngwenyi: “Chichi kuya ni yena, mumu hiunakolema Shimbi ya Mwene Zambi, neye halituna yena kubwa mwanangana wa Israele.”

²⁷ Samuel yalumuka hanga aye, alioze Saulu yamukwata ku songo lia kazaku, yamutanuna.

²⁸ Samuel yamba ngwenyi: “Mwene Zambi habatula wanangana wa Aisraele kuli yena musono, hauhana kuli umwe mukwenu mubema Wahiana yena.

²⁹ Chikwo nawa, Zambi Mulemu wa Aisraele keshi kuhanjika mahuza, chibwe keshi kwalumuna mbunge, mumu keshi ngwe mutu, mba malumuna mbunge.”

³⁰ Saulu ngwenyi: “Hingunavulumuna, hindu ngulemesenu kama ku meso ja miata ja atu jami ni ku meso ja Aisraele eswe. Tuyenu kama hamuwika tukawayile Mwene Zambi, Zambi yenu.”

³¹ Chenacho Samuel ayile hamwe ni Saulu, mba Saulu yawayila Mwene Zambi.

³² Hohene Samuel yamba ngwenyi: “Ngunehene Agage mwanangana wa Aamaleke.” Agage yaya kuli Samuel nikuchikima, ni kulinyonga ngwenyi: “Kufwa chili Chuma chibi.”

³³ Hohene Samuel yambila Agage ngwenyi: “Ngwe chize mukwale we hiwashiha ana ja amama anji, Chenacho nawa noko makufulwana.” Mba Samuel yabatwola Agage ku meso ja Mwene Zambi ku Gilgale.

³⁴ Mba Samuel yaya ku limbo lia Rama, ni mwanangana Saulu neye yaya ku mahienyi ku limbo lia Gibea.

³⁵ Samuel yatwama ku Rama, hi kejile ko nawa ni kutala mwanangana ndoo ni ku kufwa chenyi. Alioze yalinyenga hali Saulu. Mwene Zambi yevwa chinyengo mumu wapwishile Saulu kubwa mwanangana wa Aisraele.