1 Samuel 14 - Mukanda Wa Zambi 1970

Jita ya Jonatane

¹ Limwe tangwa Jonatane yambila lunga yoze te wakumbata yitwa yenyi ngwenyi: “Tuchiye kama ku musumba wa Afilistia hehi ni jila mukachi ka milundu.” Alioze Jonatane kalwezele ko tato Saulu,

² yoze hajika musumba wenyi kushi lia mutondo wa grenade ku limbo lia Migrone, hehi ni limbo lia Gibea. Te kali ni malunga ngwe 600.

³ (Hako yoze wakuzala chikuto chihi cha uhako, te Ahija, mwana wa Ahitube, yayo ya Ikabode, mwana wa Finehase, mujikulu wa Eli, mwe hako wa Mwene Zambi ku limbo lia Shilo.) Malunga te kaanyingikine ngwo, Jonatane haya.

⁴ Mu jila mukachi ka milundu ku Mikmashe, yize te Jonatane chatamba kubalikila ha kuheta ku musumba wa Afilistia, mwabwile milundu ya mawe yaali, umwe sali ukwo sali, jila mukachi. Jina lia umwe ngwo Bozeze, lia ukwo ngwo Senehe.

⁵ Mulundu umwe ku norde ya jila hatalanganyi ni Mikmashe, ukwo ku sude hatalanganyi ni Geba.

⁶ Jonatane yambila lunga yoze te unambata yitwa yenyi ngwenyi: “Tuchiye ku musumba wa yilima wano Afilistia. Hanji Mwene Zambi matukwasa, mumu hi chikalu ko kuli Zambi kulamwina atu, chibwe ni anji chibwe ni akepe.”

⁷ Mwe mukweze yakumbulula ngwenyi: “Linga cheswacho unazange, nguli hamwe ni yena.”

⁸ Jonatane ngwenyi: “Chinabeme tuye, tutangunuke jila, tukasoloke kuli Afilistia.

⁹ Nyi maatwamba ngwo: ‘Manenu ndoo mutunuheta’, mba mutumana kuluu haze tuli, kutuchi kuheta ko.

¹⁰ Alioze nyi maamba ngwo: ‘Tweyenu,’ mba mutuya, mumu muchibwa chilayi ngwo, Mwene Zambi haakunjika mu moko jetu.”

¹¹ Chenacho asolokele eswe aali ku meso ja tujita twa Afilistia. No yaamba ngwo: “Talenu, Ahebreu haatuhuka mu mena jo muze te aswama.”

¹² No yaambila Jonatane ni mukweze wenyi ngwo: “Tweyenu kuno, tunulweze limwe liji.” Henaho Jonatane yambila mukweze wenyi ngwenyi: “Ngukaule, mumu Mwene Zambi haakunjika mu moko ja Aisraele.”

¹³ Jonatane yanyina ha mulundu ni kukalala, mukweze te kanakaula Muze haheta ko, Jonatane yabutuka kwasa jita ni Afilistia, yaalamba hashi, mba mukweze yaashiha.

¹⁴ Mu kushiha chize chitangu, Jonatane ni mukweze wenyi yaashiha malunga ngwe makumi aali, homa hamwe habwile ni unene wa metro makumi aali ni jitano.

¹⁵ Afilistia eswe yeevwa mwongo, chibwe tujita ni akwa kububa yaachikima ni woma, hashi yihanyika, atu yaasuswamiana chikolo.

Aisraele yaakumba Afilistia

¹⁶ Tulayi twa Saulu ku Gibea mu chifuchi cha Benjamine yaatala. Kuma Afilistia eswe te kaanamwangana mwamwaa ni kususwamiana.

¹⁷ Saulu yambila tujita twenyi: “Alulenu tujita twetu nutale waze keeshiko.” Muze haalula, kuma Jonatane ni mukweze wenyi keeshiko.

¹⁸ Saulu yambila hako Ahija ngwenyi: “Neha chikuto chihi cha uhako.” (Mumu ha matangwa waze Ahija te wakuchizala ni kutetekela kulutwe lia Aisraele.)

¹⁹ Shimbu te Saulu machihanjika ni hako, chizungozungo cha ku musumba wa Afilistia yichooka kuhiana. Saulu yambila Ahija ngwenyi: “Echa, ola yakuhi ya kuhula Mwene Zambi.”

²⁰ Hohene Saulu ni tujita twenyi yaaya ku jita. Kuma mukachi ka Afilistia kulivundangenya chinji chilimo. Atu kaanalishihi ene ni ene.

²¹ Amwe Ahebreu waze abwile hamwe ni Afilistia mu musumba wo, yaalumuka ni kulichinga ni Saulu ni Jonatane.

²² Aisraele akwo, waze te anaswame mu milundu mu chifuchi cha Efraime, muze heevwa ngwo, Afilistia kaanachinyi, no nawa yaalichinga ni akwo mu jita.

²³ Yaalitachika no ndoo yaahianyisa limbo lia Betavene. Chenacho Mwene Zambi alamwinyine Aisraele ha tangwa lize.

Jonatane yalamwina Aisraele kuli Afilistia

²⁴ Aisraele te kaanahongo kuhiana ni zala tangwa lize, mumu Saulu hamba ni Shingo ngwenyi: “Kanda nulia chimwe Chuma ndoo chingoloshi, ndoo hinalikala kuli akwa kole jami, yoze malia ashingiwe.” Kashika niumwe hakachi ka atu kalile ko Chuma.

²⁵ Tujita eswe yaaheta ku usaki, yaawana ko wuchi.

²⁶ Wuchi unji te unasotoka hashi, hindu mutu niumwe kaulesele mumu ha woma wa Shingo lia Saulu.

²⁷ Alioze Jonatane kevwile ko muze tato ashinganyine. Kashika yatata songo lia lukanda wenyi mu chishila cha wuchi, yalia, mba yamona kanawa.

²⁸ Umwe wa kuli tujita yamba ngwenyi: “Eswe tunahongo mumu ha zala, alioze tatenu kashingananga ngwenyi: ‘Mweswawo malia musono ashingiwe.’ ”

²⁹ Jonatane yakumbulula ngwenyi: “Tata kanabinjisa atu jetu. Achitalenu, muze nalesa kawuchi kano hinamona kanawa.

³⁰ Nyi te atu kaalianga yakulia yize abubanga kuli akwa kole jetu, kachi chibema, kachi haashiha Afilistia anji kuhiana.”

³¹ Tangwa lizeliene Aisraele yaakumba Afilistia, yaalitachika no chize ku limbo lia Mikmashe ndoo ku limbo lia Aijalone. Alioze te haalekumuka kulu mumu ha zala.

³² Kashika yaalundumukina ha yuma yize te haabuba ha musumba wa akwo kole jo: mapanga, ni ngombe, ni ana ngombe. Yaashihila ha mavu lume ni kwaha hamwe ni e manyinga jo.

³³ Amwe yambila Saulu ngwo: “Tala, atu kaanavulumuna Mwene Zambi ha kulia yifwo ni e manyinga jayo.” Neye yaamba ngwenyi: “Yenu yihulia, ngulangumwinenu luliwe.”

³⁴ Yaweza ho ngwenyi: “Limwangenu hakachi ka atu nikwambulwila ngwenu, mutu mwweswe angunehene panga ni ngombe yenyi. Aashihile kuno, aalile ko. Kanda avulumuna Mwene Zambi ni kulia yifwo ni manyinga jayo.” Kashika ufuku uze mutu mweswe yaheta ko ni ngombe yenyi ha kumushiha.

³⁵ Saulu yatunga ko chilumbilo cha Mwene Zambi, che chilumbilo chenyi chitangu.

³⁶ Saulu yambila tujita twenyi ngwenyi: “Tuyenu ni kwasa jita ni Afilistia ufuko uno, tulitachikenu no ndoo chichamene, twashihenu eswe.” Ayo ngwo: “Lingenu cheswacho nunazange.” Alioze hako ngwenyi: “Tuhulenu Zambi hatangu.”

³⁷ Chenacho Saulu ahulile Zambi ngwenyi: “Tuye tulitachike ni Afilistia, nyi ka? Muutukwasa kwakumba, nyi ka?” Alioze Zambi kamukumbulwile ko tangwa lize.

³⁸ Mba Saulu yambila miata ja atu ngwenyi: “Kundamenu, tumone kuze kwakatuka mulonga musono.

³⁹ Ni mwe Mwene Zambi, Chilamwina cha Aisraele, mulonga uno chibwe muubwa wa mwanami Jonatane, kumafwa kwenyi.” Alioze eswe yaahola kuluu.

⁴⁰ Saulu yaambila ngwenyi: “Yenu manenu sali limwe, yami ni mwanami Jonatane mutumana sali likwo.” Atu yaambila Saulu ngwo: “Lingenu mwane, cheswacho chinanubemena.”

⁴¹ Saulu yahula Mwene Zambi, Zambi ya Aisraele, ngwenyi: “Mwene Zambi, mumu yika kuwangukumbulwile ko musono? Mwene Zambi, Zambi ya Aisraele, ngukumbulule ku mawe a chijila. Nyi uhiso uli wa Jonatane hanji wa yami, kumbulula ku Urime. Nyi uhiso uli wa Aisraele, kumbulula ku Tumime.” Jonatane ni Saulu yaahia, atu akwo yaasamba.

⁴² Mba Saulu yamba ngwenyi: “Sakula mukachi ka yami ni mwanami Jonatane.” Jonatane yahia.

⁴³ Hohene Saulu yahula Jonatane ngwenyi: “Hingulweze chize walinga.” Jonatane ngwenyi: “Kwamba chibema nalianga kamwe kawuchi ku songo lia lukanda wami, te nguli nenyi mu kwoko. Yami uno, ngushihenu!”

⁴⁴ Saulu yamba ngwenyi: “Jonatane, Zambi angushihe nyi yena kuuchi kufwa. Kufwa, kumuufwa.”

⁴⁵ Alioze atu yaambila Saulu ngwo: “Kuma Jonatane afwe, nyi? Yoze halamwina Aisraele chichize? Hi chocho ko. Ni mwe Mwene Zambi, chibwe lukambu wa ku mutwe wenyi kechi kuholoka hashi, mumu halinga hamwe ni Zambi musono.” Chenacho atu alamwinyine Jonatane, kafwile ko.

⁴⁶ Hohene Saulu yalitwamina kukaula Afilistia, no yaahiluka ku chifuchi cho.

Wanangana wa Saulu ni akwa jiko lienyi

⁴⁷ Muze Saulu habwa mwanangana, yasa jita ni akwa kole jenyi eswe sali ni sali: Amoabe, ni Aamone, ni Aedome, ni mianangana ja Zoba ni Afilistia. Kweswako ashile jita ni atu, yaakumba.

⁴⁸ Yalinga ni hamu, yakumba chibwe Aamaleke. Yalamwina Aisraele ku moko ja waze abubile yuma yo.

⁴⁹ Wano e ana ja Saulu a malunga: Jonatane, ni Ishvi, ni Malkishua. Anenyi a mapwo wano: mukulwana Merabe, kanuke Mikale.

⁵⁰ Pwo lienyi Ahinoame, mwana wa Ahimaze. Mwata wa tujita twenyi, Abnere, mwana wa Nere, tato ya Saulu wa kanuke.

⁵¹ Tato ya Saulu Kishi, ni Nere tato ya Abnere, te eswe aali ana ja Abiele.

⁵² Ha matangwa eswe ja Saulu jita yikalu yabwile ko ni Afilistia. Kashika Saulu, muze amwene unwe mukwa hamu ni mukwa kutakama, yamupwisa kajita kenyi.