1 Samuel 13 - Mukanda Wa Zambi 1970

Jita ya Aisraele ni Afilistia

^1-2 Saulu yatongola malunga 3,000 ja Aisraele. Malunga 2,000 yaasala hamwe nenyi ku limbo lia Mikmashe, mu chifuchi cha milundu ya Betele. Yatuma tujita 1,000 ni mwanenyi Joanatane ku limbo lia Gibea, mu chifuchi cha vungu lia Benjamine. Malunga eswe akwo yaahilwisa ku mahio.

³ Jonatane yashiha mwata wa tujita wa Afilistia ku limbo lia Geba. Afilistia eswe yaachivwa. Mba Saulu yatuma tunganda ni kutambika Ahebreu eswe ku jita ni kwimbisa yitavwi mu chifuchi cheswe.

⁴ Aisraele eswe yeevwa ngwo, Saulu kanakashiha mwata wa tujita twa Afilistia, nawa ngwo, Aisraele haalumuka atu abi ku meso ja Afilistia. Kashika Aisraele yaatayiza kutambika chize, yaalikungulula kuli Saulu ku limbo lia Gilgale.

⁵ Afilistia yaakunguluka ni kwasa jita ni Aisraele. No yaabwa ni matemba a jita 30,000, ni akwa tuvwalu 6,000, ni tujita akwo ngwe masekeseke a ku mbumbulu ya kalunga lwiji. No yaabwa ku limbo lia Mikmashe, ku chivumbuko cha limbo lia Betavene, yaasako musumba wo.

⁶ Yaabutuka jita ya tachi ni Aisraele ni kwamwesa lamba linji. Kashika amwe yaswama mu yivwenge, akwo mu mena, hanji mukachi ka mawe, hanji mu mbongo, hanji mu mashima a meya.

⁷ Akwo yaazauka Yordau nikuchinyina mu yifuchi ya Gade ni Gileade. Saulu te kali ku Gilgale; atu eswe waze abwile hamwe nenyi yaachikima ni woma.

⁸ Saulu yashimbwila Samuel matangwa shimbiali nikulita ni liji lienyi, hindu Samuel kahetele ko. E atu yaabutuka kukatuka kuli Saulu ni kumwangana mwamwaa.

⁹ Kashika Saulu yaambila ngwenyi: “Ngunehenenu milambu ya kwocha ni ya kulivwa ni Zambi.” Neye yatambula milambu ya kwocha.

¹⁰ Te wachimanununa lume kulambula, Samuel yaheta. Saulu yaya ni kumubatwiza hanga amumeneke,

¹¹ alioze Samuel yamuhula ngwenyi: “Chika chino walinga?” Saulu ngwenyi: “Atu te kaanangumwangashana, muze yena kuwahetele ko ha tangwa lize washikile, ni Afilistia anakunguluka ku Mikmashe.

¹² Kashika nanyonga ngwami: ‘Afilistia maangulundumukina kuno ku Gilgale, shimbu yami kanda ngulembela Zambi angulweze utu,’ kashika nanyonga ngwami: ‘Changutamba kulambula mulambu wa kwocha.’ ”

¹³ Samuel yamwamba ngwenyi: “Walinga ni uhepuke. Kuwafungile ko Shimbi yize akuhele Mwene Zambi, Zambi ye. Nyi wononokene, kachi yena ni akwa jiko lie munuyula Aisraele matangwa eswe.

¹⁴ Alioze wanangana we kuuchi kulinduluka. Yena kuwalingile ko chize akwambile Mwene Zambi. Kashika malifupila mutu yoze anazange akayule atu jenyi.”

¹⁵ Samuel yakatuka ku Gilgale, yaya mu jila yenyi. Malunga waze asalile yaakaula Saulu, mwe Saulu te kanayi kuli tujita twenyi akwo. No yaakatuka ku Gilgale ni kuya ku Gibea mu chifuchi cha Benjamine. Kwenako alwilile malunga waze abwile no, te ngwe 600.

¹⁶ Saulu ni mwanenyi Jonatane ni atu jenyi yaasa musumba wo ku Geba mu chifuchi cha Benjamine. Musumba wa Afilistia te kuuli ku Mikmashe.

¹⁷ Tujita twa Afilistia te haakatuka ku musumba wo mu mbunga jitatu ni kwasa jita: mbunga yimuwika yiitalikisa mu jila ya kuya ku Ofra mu chifuchi cha Shuale,

¹⁸ mbunga yikwo yiitalikisa mu jila ya kuya ku Bete Horone, yikwo yiitalikisa ku njiza hehi ni chikulo cha Zeboime ni ku puya.

¹⁹ Mu chifuchi cheswe cha Israele te kumushi fuli niumwe, mumu Afilistia haanambe ngwo: “Ahebreu kanda alifulila kama mikwale ni makunga.” (

²⁰ Aisraele te kaakuya kuli Afilistia ni kuhela matemo jo anene ni akepe, hanji njimbu, hanji poko ja kubatula nayo mbuto.

²¹ Afilistia yeeta kalumbongo kamuwika ha kuhela njimbu ni kululika musako, ni tumbongo twaali ha kuhela matemo anene hanji akepe.)

²² Kashika ha tangwa lize lia jita kajita wa Aisraele niumwe te uli ni mukwale hanji kunga, shina lume Saulu ni mwanenyi Jonatane.

²³ Afilistia yaatuma mbunga yimuwika ya tujita ni kufunga jila mukachi ka milundu ku Mikmashe.