1 Samuel 12 - Mukanda Wa Zambi 1970

Maliji a Samuel akusula

¹ Samuel yambila Aisraele eswe ngwenyi: “Hinalinga yuma yeswe yize nwangwambile. Hinanwaha mwanangana wa kunuyula.

² Haliabwila iye kali tetekeli yenu. Alioze yami nguli kashinakaji ni kambu jitoma, ni ana jami a malunga kaali hakachi kenu. Hingunabu tetekeli yenu chize ku ukweze wami ndoo ni musono uno.

³ Yami uno. Nyi nalinga chimwe Chuma chibi, ngusumenu haliabwila ku meso ja Mwene Zambi ni ku meso ja mwanangana yoze iye hawayisa ni maji. Ngombe jaya natambwile kama? Hanji chimbulu chaya? Iya yoze neya mbongo? Iya nabinjisa kama? Kuli iya natambula kama ubite wa mbenga? Ambenu, ngunuhilwishile wo.”

⁴ Atu yaamukumbulula ngwo: “Kaa, kuwatwiyile, kuwatubinjishile, kuwatambwile Chuma cha mutu niumwe.”

⁵ Samuel ngwenyi: “Mwene Zambi ni mwanangana yoze hawayisa ni maji kaali yela jami musono muze nunambe ngwenu: ‘Kuushi ni chitela nichimwe.’ ” No yaakumbulula ngwo: “Ewa, Mwene Zambi kali chela chetu.”

⁶ Samuel yaweza ho ngwenyi: “Mwene Zambi yatongola Mose ni Arone, yaatuhwisa tushakulu twenu mu chifuchi cha Egiptu.

⁷ Kashika haliabwila manenu, ngunusume mulonga ku meso ja Mwene Zambi ni kunwiwulula yitanga yinene yeswe yize hanalingi muze anulamwinyine yenu ni tushakulu twenu.

⁸ Muze Yakoba ni akwa jiko lienyi ayile ku Egiptu, akwa Egiptu yaamwesa tushakulu twenu lamba, no yaakololoka kuli Mwene Zambi aakwase. Neye yaatumina Mose ni Arone waze aatuhwishile mu Egiptu ni kwatungisa mu chifuchi chino.

⁹ Alioze tushakulu twenu yaavulama Mwene Zambi yo. Kashika Zambi yatayiza Afilistia ni mwanangana wa Moabe ni Sisera, mwata wa tujita wa limbo lia Hazore, kwasa no jita ni kwakumba.

¹⁰ Hohene yaakololoka kuli Mwene Zambi aakwase ngwo: ‘Mwene Zambi, hitwavulumuna ni kukombelela mahamba ja Bale ni ja Astarte. Tulamwine kama ku moko ja akwa kole jetu, mba mutukulingila!’

¹¹ Hohene Mwene Zambi yatuma Gideone, ni Barake, ni Jefta, mba yikusula yami. Mutu ni mutu twanupulwile ku moko ja akwa kole jenu, twanuhele uhwimino.

¹² Alioze muze nwamwene Nahashi, mwanangana wa ku chifuchi cha Amone, kaneza ni kwasa nenu jita, nwalitunyine Mwene Zambi mwanangana wenu, nwangwambile ngwenu: ‘Tunazange mwanangana atuyule.’

¹³ “Kashika talenu mwe mwanangana yoze hinwatongola, hinwamwita; Mwene Zambi hanwaha ye.

¹⁴ Yuma yeswe muyibwa kanawa, nyi munuvwila Mwene Zambi, Zambi yenu, woma, ni kumulingila, ni kubanjika maliji jenyi, ni kufunga Shimbi jenyi, ni kumukaula yenu ni mwe mwanangana yoze wakunuyula.

¹⁵ Alioze, nyi kunwabanjikile maliji ja Mwene Zambi, hanji kukolema Shimbi jenyi, iye makalimika ni yenu ni mwanangana wenu.

¹⁶ “Kashika haliabwila manenu, numone Chuma chinene chize Mwene Zambi himalinga ku meso jenu.

¹⁷ Ngwami, haliabwila tuli mu lushiho, nyi kuchi? Alioze mungulemba Mwene Zambi hanga atume kukulunguza ni vula. Muze machilinga, mununyingika ngwenu, nwavulumuna Mwene Zambi kuhiana muze hinweta mwanangana.”

¹⁸ Chenacho Samuel alembele Tangwa lioliene Mwene Zambi yatuma kukulunguza ni vula. Mba atu eswe yeevwila Mwene Zambi ni Samuel woma

¹⁹ Atu eswe yaambila Samuel ngwo: “Mwata tulembelenu kuli Mwene Zambi, Zambi yenu, kanda tufwa kama Hitwanyingika ngwetu, hitwaliwezela yibi yikwo muze hitweta mwanangana.”

²⁰ Samuel ngwenyi: “Kanda nwivwa woma. Chibwe hinwalinga kulu chibi chino, hindu kanda nwehuka Mwene Zambi, alioze mulingilenu ni mbunge jenu jeswe.

²¹ Kanda nukaula mahamba amokomoko; kaahashile kunukwasa hanji kunulamwina, mumu kaali amokomoko.

²² Mwene Zambi kechi kanwehuka yenu atu jenyi, mumu ha jina lienyi linene. Hananutongola ni kunupwisa atu jenyi mwene.

²³ Chikwo nawa, chichi kulitwamina nichimwe kunulembela Zambi. Nyi nalitwamina kulemba munguvulumuna. Mungunulongesa yuma yibema ya ululi.

²⁴ Ngwami, vwilenu Mwene Zambi woma, numulingile ni umwenemwene ni mbunge jenu jeswe. Iwulukenu yuma yibwahaha hananulingila.

²⁵ Alioze, nyi mununyongonona kulinga yibi munukafwa, yenu ni mwe mwanangana wenu.”