1 Samuel 11 - Mukanda Wa Zambi 1970

Saulu yakumba Aamone

¹ Muze kakweji umuwika habalika, mwanangana Nahashe, wa ku chifuchi cha Amone, yatwala tujita twenyi ni kwasa jita ni akwa limbo lia Jabeshe, mu chifuchi cha Gileade. Malinga ja Jabeshe yambila Nahashi ngwo: “Kolesa Usendo ni yetu, mba tukulingile.”

² Nahashi yaakumbulula ngwenyi: “Mungukolesa nenu usendo nyi munutayiza ngunutombongone meso jenu a chindume hanga ngukolese Aisraele eswe sonyi.”

³ Miata ja Jabeshe yaamukumbulula ngwo: “Twehe matangwa shimbiali, tutume tunganda kweswe mu chifuchi cha Israele. Nyi mutu wakuhi yoze matulamwina, mutulikunjika kuli yena.”

⁴ Tunganda yaaheta ku Gibea kuze te atwama Saulu, yaambulula maliji wano, mba atu eswe yaabutuka kulila mbimbi.

⁵ Henaho Saulu te ku minda anakatuka ni ngombe, yahula ngwenyi: “Atu yika analilila chocho?” No yaamulweza maliji ja tunganda a ku Jabeshe.

⁶ Muze Saulu hevwa maliji wano, Mwiku wa Zambi yiumuhulumukina ni tachi, neye yatenuka chikolo.

⁷ Yanda ngombe aali, yaabatwola yipinji yipinji, yayituma kweswe mu Israele ku moko ja tunganda nikwamba ngwenyi: “Mweswawo kechi kukaula Saulu ni Samuel, Chenacho maakalinga ni ngombe jenyi.” Aisraele yeevwila Zambi mwongo kuhiana, eswe yaalikungulula ngwe mutu umuwika.

⁸ Saulu yaalikungulwila ku limbo lia Bezeke, malunga ja Aisraele 300,000, ja Auyda 30,000.

⁹ Saulu yambila tunganda a ku limbo lia Jabeshe ngwenyi: “Lwezenu akwa Jabeshe ngwenu, hamene muze tangwa mulibwa ha muchima hitwanupulula kulu.” Akwa Jabeshe, muze heevwa maliji wano, yaawahilila kuhiana,

¹⁰ yaambila mwanangana Nahashe ngwo: “Hamene mutukalikunjika kuli yenu, mba munuhasa kutulinga cheswacho munuzanga!”

¹¹ Saulu yahandununa tujita mu mbunga jitatu. Muze te himukucha yaanjila mu musumba wa Amone. Muze tangwa hiliaheta ha muchima, kuma haashiha kulu atu anji. Waze asalile ho yaamwangana mwamwaa.

¹² Mba Aisraele yaambila Samuel ngwo: “Aya waze ambile ngwo: ‘Saulu kechi kutuyula yetu?’ Anehenu twashihe.”

¹³ Alioze Saulu yamba ngwenyi: “Ka, kutuchi kushiha mutu niumwe musono, mumu musono Mwene Zambi hapulula Aisraele.”

¹⁴ Samuel yambila atu ngwenyi: “Tuyenu ku limbo lia Gilgale, tukafumanyishine ko nawa mwanangana wetu Saulu.”

¹⁵ Hohene atu eswe yaaya ku Gilgale, ni kufumanyisa mwanangana Saulu ku meso ja Mwene Zambi, yaalambwila ko milambu ya kulivwa ni Zambi, yaawahilila kuhiana.