1 Samuel 10 - Mukanda Wa Zambi 1970

¹ Hohene Samuel yanda kasaji ka maji a olive, yaazujila ha mutwe wa Saulu, yamushisa, yamba ngwenyi; “Mwene Zambi kanamuwayisa hanga ubwe mwanangana wa atu jenyi Aisraele. Muukaayula ni kwafunga kuli akwa kole jo. Chino che chilayi cha kutongola cha Mwene Zambi:

² musono muze muukatuka kuli yami, muutakana ni malunga aali hehi ni fuka lia Rashele ku Zelza, mu chifuchi cha Benjamine. No maakwambulwila ngwo: ‘Yimbulu waze wayile ni kufupa, haasoloka. Tatenu hachiza ko mbunge, habutuka kukunyongena yena ni kulihula ngwenyi, Kuchi mungulinga hakutwala kuli mwanami?’

³ Mba muukatuka ko, muuya ndoo muukaheta ku mutondo ku Tabore, kuze atu akuwayila. Kwenako muutakana ni malunga atatu waze anakanduka ku limbo lia Betele ni kulambula Zambi mulambu. Umwe kanatwala ana a pembe atatu, mukwo kanambata mbolo jitatu, mukwo tuku ya lambu ya vinyu.

⁴ No maakakumeneka, maakwaha mbolo jaali, ni yena ujitambula.

⁵ Mba muuya ku mulundu wa Zambi mu limbo lia Gibea. Kwenako kuli musumba wa tujita twa Afilistia. Ku chikolo cha limbo muutakana ni mbunga ya akwa munanyi ja Zambi waze anapalumuka ha mulundu, homa ha kuwayila, nikwimba tulialia ni ngoma, ni ndembo, nikuhanjika munanyi.

⁶ Susumuku Mwiku wa Mwene Zambi muukuhulumukina, mba ni yena muuhanjika munanyi hamwe no, muwalumuka mutu mwaha.

⁷ Mba muze yilayi yino muyimoneka, hilinga ngwe chize chinalite, mumu Zambi kali hamwe ni yena.

⁸ Ungutetekela ndoo ku limbo lia Gilgale. Mungukakuwana ko. Mba mungukalambula milambu ya kwocha ni ya kulivwa ni Zambi. Ungutwaminyine ko matangwa shimbiali ndoo mungukeza, hanga ngukakulweze chize muukalinga.”

⁹ Muze Saulu himalumuka ahichike Samuel, Zambi yamupwisa mutu mwaha, yilayi yeswe yize amulwezele kuli Samuel yiimoneka tangwa lioliene.

¹⁰ Muze Saulu ni ngamba yenyi haaheta ku Gibea, yaatakana ni mbunga ya akwa munanyi a Zambi. Susumuku Mwiku wa Zambi yiumuhulumukina ni tachi, neye yahanjika munanyi hakachi ko.

¹¹ Atu waze te amunyingikine, muze heevwa chize anahanjika munanyi, yaalihula ene ngwo: “Chuma chika chawana mwana wa Kishi? Kuma Saulu neye halumuka mukwa munanyi wa Zambi, nyi?”

¹² Umwe mutu wa kuzekwene yahula ngwenyi: “Kuchi nunanyongo hakutwala kuli akwa munanyi waze akwo, atato aya?” Chenacho yichibwa kashilikilo ngwo: “Kuma Saulu neye habwa mukwa munanyi wa Zambi, nyi?”

¹³ Muze Saulu hamanununa kuhanjika munanyi, yakanduka ha mulundu homa ha kuwayila.

¹⁴ Natu ya Saulu yamumona hamwe ni ngamba yenyi, yaahula ngwenyi: “Kulihi nunakaya?” Saulu yamukumbulula ngwenyi: “Mu kufupa yimbulu. Mba muze kutwaamwene, yituya kuli Samuel.”

¹⁵ Natu ngwenyi: “Mwe Samuel yika anakakulweza?”

¹⁶ Saulu ngwenyi: “Kanakatulweza ngwenyi, ‘Yimbulu haasoloka.’ ” Alioze hakutwala ku pande ja wanangana, jize ambile Samuel, kamulwezele jo.

Aisraele yaatayiza Saulu kubwa mwanangana wo

¹⁷ Samuel yatambika Aisraele akunguluke ku meso ja Mwene Zambi mu limbo lia Mizpa,

¹⁸ yaamba ngwenyi: “Mwene Zambi, Zambi ya Aisraele, kanambe ngwenyi: ‘Nanutuhwishile mu chifuchi cha Egiptu, nanulamwinyine ku moko ja akwa Egiptu ni ja mavungu eswe akwo waze anubinjishile.

¹⁹ Yami nguli Zambi yenu, nakunulamwina ku luyinda wenu mweswe ni ku lamba lienu heswe. Hindu musono hinwangulituna, hinwanguhula mwanangana. Nyi Chenacho, hilihumikizenu ku meso ja Mwene Zambi nikulita ni mavungu jenu ni maji mo jenu.’ ”

²⁰ Chenacho Samuel akundamishine vungu heswe ha Aisraele, mba Mwene Zambi yatongola vungu ha Benjamine.

²¹ Hohene Samuel yakundamisa majiko eswe a vungu ha Benjamine, yatongola jiko ha Matri. Mba malunga a ku jiko ha Matri yaakundama, yatongola Saulu mwana wa Kishi. Atu yaamufupa, alioze kaamumwene ko.

²² Yaahula Mwene Zambi ngwo: “Kwali, nyi ka?” Mwene Zambi yaakumbulula ngwenyi: “Kali akuze, kanaswame mukachi ka yikashi.”

²³ Atu yaazomboka, yaamusaka. No yaamumona ngwo, atu eswe kaanasulila ha yipaya yenyi.

²⁴ Samuel yambila e atu ngwenyi: “Talenu mutu yoze Mwene Zambi hatongola! Niumwe walifwa nenyi hakachi ketu.” Atu eswe yaakalumioka ngwo: “Vulie mwanangana!”

²⁵ Hohene Samuel yalumbununa je Shimbi ja wanangana, yajisoneka mu mukanda ni kujisa muma mwa chijila. Mba yashika atu eswe aye ku mahiahia jo.

²⁶ Saulu nawa yahiluka ku mahienyi ku Gibea. Amwe malunga akwa hamu, waze Zambi afumbile, yaaya hamwe nenyi.

²⁷ Alioze amwe atu amokomoko yaamba ngwo: “Yono ngwe kuchi mahasa kutulamwina?” Yaamulelesa, yaamumina milambu.