1 Samuel 1 - Mukanda Wa Zambi 1970

Elkana ni akwa jiko lienyi ku Shilo

¹ Mu chifuchi cha milundu ya Efraime, mu limbo lia Rama, mwabwile umwe lunga jina lienyi Elkana, mwana wa Jerohame, mujikulu wa Elihu, wa ku jiko lia Tohu, wa ku vungu lia Zufu.

² Te kali ni mapwo aali, mwata mwali Hana, temena Penina. Penina yasema ana, alioze Hana ka.

³ Mwe Elkana te kakukatuka ku Rama mwaka ha mwaka ni kuwayila Mwene Zambi Mukwa Ndundo Jeswe ku limbo lia Shilo, ni kumulamba milambu. Kwenako te kwatwama ana ja Eli aali a malunga, Hofni ni Finehase mahako ja Mwene Zambi.

⁴ Ha tangwa lia kulambula milambu Elkana te kakuhana tumba ya yifwo kuli pwo lienyi Penina ni tumba yikwo kuli ana jenyi eswe a malunga ni a mapwo.

⁵ Yazanga Hana kuhiana alioze chibwe chocho yamwaha lume tumba yimuwika, mumu te Mwene Zambi hanamupwisa mumba.

^6-7 Mba chihalika chenyi amwihiahia mumu Mwene Zambi hanamupwisa mumba. Yachilinga mwaka ha mwaka muze te akuya ku zuwo lia Mwene Zambi. Kashika te Hana akulilalila ni kulituna kulia.

⁸ Mba lunga lienyi Elkana te kakumuhulahula ngwenyi: “Hana yika unalilila? Kuchi kuusolo kulia? Mumu yika uli ni chinyengo matangwa eswe? Yami chahianyine kumi lia ana a malunga, nyi?”

Hana ni Eli

^9-10 Limwe tangwa muze haalia mu zuwo lia Mwene Zambi ku Shilo, Hana yakatuka, yevwa chinyengo chinji, yalila muze te analembe Mwene Zambi. Hako Eli te kanatwama ha chitwamo ku chikolo.

¹¹ Hana yalakenya ngwenyi: “Mwene Zambi, Mukwa Ndundo Jeswe, tala kama luyinda wa yami kavumbi ke, ngwiwuluke, kanda unguvulama yami kavumbi ke. Nyi wangwaha kama mwana wa lunga, mungumukunjika mu moko je ha matangwa eswe a mwono wenyi, kechi katewula kambu jenyi nilimwe tangwa.”

¹² Mba shimbu lize te ananyongonona ni kulemba Zambi, Eli yatala ku kanwa lia Hana.

¹³ Hana te kanahanjika mu mbunge yenyi. Mivumbo yenyi ye yinalimwemweta, alioze liji lienyi kalivwile ko. Kashika hako Eli yanyonga ngwenyi, kota kanazengewa.

¹⁴ Yamuhula ngwenyi: “Mwiji muka muulitwamina kama kuzengewa? Echa kunwa vinyu.”

¹⁵ Hana ngwenyi: “Ka mwata, chazengewele. Nguli mukwa chinyengo. Chanwine vinyu, alioze ngunakunjika mbunge yami kuli Mwene Zambi.

¹⁶ Kanda ungunyonga ngwe nguli pwo wamokomoko. Ngunalembe mumu ha chinyengo chami.”

¹⁷ Mba hako Eli yamukumbulula ngwenyi: “Yako ni uhwimino. Zambi ya Aisraele akwehe chize hiwamwita.”

¹⁸ Hana ngwenyi: “Yami kavumbi ke, nguwane kama vumbi ku meso je matangwa eswe.” Mba yaya kwenyi, yalia, hikabwile ko nawa ni chinyengo ku meso.

Kusemuka cha Samuel ni kumukunjika kuli Zambi

¹⁹ Muze hikwacha, Elkana ni akwa jiko lienyi yaalimeneka, yaawayila Mwene Zambi, yaahiluka ku mahio ku Rama. Elkana yalimona ni pwo lienyi Hana, mba Mwene Zambi yamwiwuluka.

²⁰ Chenacho Hana amichine ufumba, yasema mwana wa lunga. Yamuluka jina Samuel, mumu ngwenyi: “Namwichile kuli Mwene Zambi.”

²¹ Tangwa yiliheta nawa hanga Elkana ni akwa jiko lienyi aye ku Shilo ni kulambula Mwene Zambi milambu ya mwaka ha mwaka, ni milambu ya chilakenyo.

²² Alioze Hana kayile ko. Yalweza lunga lienyi ngwenyi: “Muze mwana hasumuka mba mungumutwala ku zuwo lia Mwene Zambi, akatwame ko miaka yeswe.”

²³ Elkana ngwenyi: “Linga cheswacho chinakubemena. Twama ndoo muze mwana hasumuka. Mwene Zambi akakolese kama liji lienyi.” Mba Hana yatwama ni kwanwisa mwana.

²⁴ Muze mwana hasumuka, naye yamutwala hamwe ni kuji a ngombe wa miaka yitatu, ni kilo kumi lia wunga, ni tuku yimuwika ya lambu ya vinyu. Yamutwala ku zuwo lia Mwene Zambi ku Shilo, te uchili mwana mukepe.

²⁵ Muze te hashiha kuji a ngombe, yatwala mwana kuli Eli.

²⁶ Hana yamba ngwenyi: “Mwata unangunyingika, nyi? Nguli pwo yoze wamanyine kuno ku meso je, ni kulemba kuli Mwene Zambi.

²⁷ Yono mwe mwana nechile, Mwene Zambi mba hangwaha yo.

²⁸ Kashika ngunamukunjika kuli Mwene Zambi. Ha matangwa eswe a mwono wenyi makabwa niwenyi.” Mba yaawayila ko Mwene Zambi.