1 Petulu 4 - Mukanda Wa Zambi 1970

Mwono Waha

¹ Kristu lamba amwene mu mujimba. Kashika ni yenu nawa, litakamisenu ni manyonga waze ene. Mumu mutu, nyi kanamono lamba mu mujimba, keshi nawa ni shili.

² Kashika, chize ku tangwa lino chanutamba kubwa ngwe chize akuzanga Zambi, hi nikulita ni usolo ubi wa uutu ko.

³ Shimbu linji nwahwishile ha kulinga ngwe waze hi akwa Kristu ko. Nwabwile akwa ujila, akwa usolo ubi, akwa kuzengewa, akwa chimbangunya, yingongo ja walwa, akwa kukombelela cha kuzelwokesa.

⁴ Alioze haliabwila waze hi akwa Kristu ko kaakulishimwoka, mumu kunushi kulichinga nawa no ha kuhungumuka ni yibi. Kashika akunushililika.

⁵ Alioze maakalilumbunwina yitanga yo kuli Zambi, yoze makabatwila a mwono ni afu.

⁶ Ha chikuma chino Kristu wayile ni kwambujola Sango Jibema kuli afu, waze Zambi hanaabatwila ngwe chize akubatwila atu eswe muze kanda achifwa. Yesu yaya ni kwalongesa Sango Jibema hanga, mu mujimba wa uzambi, atwame ni mwono ngwe chize abwa Zambi.

Mutu mweswe alinge kanawa ni chawana chize amuhele Zambi

⁷ Songo lia yuma yeswe hiliakundama. Bwenu ni manyonga waze analite, limukenu mu kulemba Zambi.

⁸ Chuma chitangu, lizangenu kuhiana ni akwenu, mumu zango kuliakuchiza chizavu cha milonga.

⁹ Zumbulenu akwenu, alioze hi ni kulinyenyeta ko.

¹⁰ Zambi kakuhana yawana yeka ni yeka kuli atu jenyi. Mutu mweswe hakachi kenu alinge kanawa ni chawana chenyi ni kukwasa nacho atu akwo.

¹¹ Yoze wakulongesa, chamutamba kulongesa maliji a Zambi. Yoze wakulingila atu akwo, chamutamba kulinga ni ngolo jize akumwaha Zambi, hanga mu yuma yeswe atu achichimieke Zambi ku tachi ja Yesu Kristu. Uhenya wenyi ni ndundo jenyi yimoneke ku miaka yeswe ni miaka yeswe! Chibwe kama Chenacho.

Lamba lia mukwa Kristu

¹² Akwetu kanda nulishimwoka muze munumona cheseko cha lamba ngwe Chuma chinene chahiana chanuwana.

¹³ Alioze wahililenu ha kwivwa limwe lamba lize evwile Kristu, hanga nukawahilile kuhiana muze uhenya wenyi muukasoloka.

¹⁴ Kunwawaha muze atu maanuchoka mumu nuli akwa Kristu. Mumu chinalumbunuka ngwo, Mwiku wa uhenya wa Zambi kuwatwama muli yenu.

¹⁵ Mutu niumwe hakachi kenu kanda amona lamba ngwe mukwa kushiha atu, hanji mwiji, hanji mukwa mahuza, hanji ngwe yoze unanjila mu milonga ya mbala.

¹⁶ Alioze nyi umwe mamona lamba mumu kali mukwa Kristu, kanda evwa sonyi, alioze chamutamba kuchichimieka Zambi mumu kakumuvuluka jina lize.

¹⁷ Tangwa hiliaheta lize Zambi mabutula kubatwila atu. Hatangu mabatwila atu jenyi. Nyi yetu tuli atangu waze mabatwila, kuchi muchibwa kuli waze akulituna kufuliela Sango Jibema ja Zambi?

¹⁸ Mukanda wa Zambi unambe ngwo: “Nyi chili chikalu akwa ululi kulilamwina, Kuchi muchikabwa hali yitanganyanyi ni yivulumunyi?”

¹⁹ Kashika, waze akumona lamba nikulita ni upale wa Zambi, chaatamba kulinga lume kanawa ni kulikunjika liakulu kuli Tangi. Kali mukwa kushishika ha yilakenyo yenyi.