1 Petulu 3 - Mukanda Wa Zambi 1970

Mapwo ni malunga

¹ Yenu mapwo chizechene, Zeyelenu kuli malunga jenu, hanga, nyi amwe keeshi kufuliela liji lia Zambi, maakafuliela ha kumona ndako yenu yibema. Kunuchi kuhanjika no nawa limwe liji,

² mumu maakamona ndako yenu yibema ni ya vumbi.

³ Kanda nufupa kulibemesa ni ubeme wa mujimba ni yuma yeka ni yeka yize yakusoloka ku meso, ngwe kuyinda cha kambu, chibwe kuzala cha oru, ni kaliki, ni mahina ahiana kubema.

⁴ Alioze ubeme wenu ubwe wa mu mbunge, uze kuushi kuhwa, wa uhomboloji ni wa kuhola. Wenawo ulemu ku meso ja Zambi.

⁵ Chizechene mapwo a shakulu alibemesene, mapwo waze abwile akwa kushishika, ni asele mbunge kuli Zambi, ni azeyelele kuli malunga jo.

⁶ Sara neye che abwile. Te kakwononokena Abrahama ni kumuvuluka ngwenyi: “Mwata wami.” Yenu mapwo munubwa ana jenyi, nyi munulinga yibema ni kunuchi kwivwa woma ku Chuma nichimwe.

⁷ Ni yenu malunga nawa, chizechene, muze nunatwama ni mapwo jenu chanutamba kunyingika ngwenu, keeshi ni tachi ngwe yenu. Chanutamba kwaasa vumbi, mumu kumaakatambula chawana cha mwono kuli Zambi ngwe yenu. Lingenu Chenacho, hanga Chuma nichimwe kuchahashile kuvuma kulemba chenu.

Kumona lamba mu kulinga kanawa

⁸ Hakusula, eswe bwenu ni manyonga amuwika ni kulivwa chimuwika. Lizangenu ngwe ana ja tata umuwika ni mama umuwika. Bwenu akwa utu ni akwa kulikehesa.

⁹ Nyi mutu hakulinga chibi, yena kanda umuhilwisa chibi. Nyi mutu hakushililika, yena kanda umushililika nawa. Shinoho muwahise, mumu muze Zambi anutambikile, yanulakenya ngwenyi, makanuwahisa.

¹⁰ Ngwe Mukanda wa Zambi unambe: “Yoze unazange kuwahilila kanawa ni kubwa ni matangwa abema mu mwono wenyi, chamutamba kwehuka kuhanjika yibi ni mahuza.

¹¹ Chamutamba kuchina yibi ni kulinga yibema, chamutamba kufupa uhwimino ni mbunge yenyi yeswe.

¹² Mumu Mwene Zambi kakutala akwa ululi, kakwivwa kulemba cho. Alioze kakulimika ni waze akulinga yibi.”

¹³ Iya manulinga chibi, nyi nwakuzanga chinji kulinga yibema?

¹⁴ Chibwe munumona lamba ha kulinga yibema, nunawaha! Kanda nwivwa woma, kanda nulibikala.

¹⁵ Alioze lemesenu Kristu mu mbunge jenu, mupwisenu Mwene wenu. Lilulikenu matangwa eswe ha kukumbulula waze akunuhula ha kunyingika ku chize nwakusa mbunge.

¹⁶ Alioze Chilingenu ni uhomboloji ni vumbi. Bwenu ni mbunge yibema, hanga waze akunushililika ha yitanga yibema yize nwakulinga mumu nuli akwa Kristu, akevwe sonyi.

¹⁷ Shinoho kumona lamba ha kulinga yibema, nyi kuchili upale wa Zambi, hi kumona lamba ko ha kulinga yibi.

¹⁸ Mumu Kristu iye mwene hananufwila. Yafwa chisuho chimuwika lume ha kuchiza shili ya atu. Chibwe nuli yivulumunyi, alioze iye Mukwa Ululi, hananufwila ha kunutwala kuli Zambi. Atu yaashiha mujimba wenyi wa uutu, alioze yahinduka nawa ni mwono ni mujimba wa uzambi.

¹⁹ Ni mujimba uze wa uzambi yaya mu chifuchi cha afu ha kwalongesa.

²⁰ Atu waze hatangu koononokenene ko Zambi, muze alihumikijine no ni uhomboloji ha matangwa eswe waze Noa te akutunga ulungu. Atu nake wika anjilile mu ulungu, Zambi neye yaalamwina ku meya.

²¹ Meya aze kaanalifu ngwe upapachiso uze unanulamwina haliabwila. Upapachiso kuushi kuchiza majilo ja mujimba, alioze kuuli chilakenyo kuli Zambi ni mbunge yibema. Kuwakunulamwina ku uhindukilo wa Yesu Kristu ku kufwa.

²² Yesu Kristu hanazezuke mwilu, hanayi ni kutwama ku chindume cha Zambi. Kwenako akuyula tunganda a mwilu, ni akwa kuyula, ni akwa tachi akwo a mwilu.