1 Petulu 2 - Mukanda Wa Zambi 1970

Liwe lia mwono ni atu ja Zambi

¹ Kashika mbilenu ubi weswe, ni mahuza eswe, ni ulembekese, ni ukwa, ni kushililika.

² Bwenu ngwe ana a kemba waze anasemuka haliabwila: zangenu tangwa ha tangwa yamwa yibema ya uzambi, mba munutatuka ni manulamwina muze nunayinu.

³ Mumu Mukanda wa Zambi unambe ngwo: “Hinunapake utu wa Mwene Zambi ngwe nwakupaka yakulia.”

⁴ Kundamenu kuli Mwene Yesu, liwe lia mwono lize alitunyine atu ngwe Chuma chamokomoko, alioze Zambi hanalitongola mumu walimwene ngwe lili liwe lilemu.

⁵ Kundamenu, hanga ni yenu nubwe ngwe mawe a mwono, waze Zambi matunga no zuwo lia Mwiku wa Linanga. Mu zuwo lize munubwa mahako a Zambi waze ali ni milimo ya kulambula Zambi milambu ya uzambi, yize muyikamubemena, nyi nwakuyilambula ku tachi ja Yesu Kristu.

⁶ Mumu Mukanda wa Zambi unambe ngwo: “Hinatongola liwe lilemu lize hinasa haliabwila mu limbo lia Zione ngwe liwe lia mu mbango. Yoze unashachila ha liwe lize kechi kevwa sonyi.”

⁷ Liwe lino lili lilemu liahiana kuli yenu akwa kufuliela. Alioze kuli waze keeshi kufuliela: “Liwe lize alitunyine tungi, hiliabwa liwe lia mu mbango, lize liakolesa zuwo.”

⁸ Mu Chihanda chikwo cha Mukanda wa Zambi hichinasonewa ngwo: “Liwe lize kuliakutalingisa atu, Liwe lize kuliakwalimbwisa.” Yaatalinga ha liwe lize, mumu kaafulielele ko liji lia Zambi. Chenacho Zambi aakunjikile ko.

⁹ Alioze yenu nuli atu waze Zambi atongwele, nuli mahako a Mwene, nuli lume atu ja Zambi. Hananutongola hanga nwambujole yitanga yibema ya Zambi, yoze wanutambikile ha kukatuka ku milima hanga nunjile mu pangu lienyi liahiana.

¹⁰ Hatangu kunwabwile ko vungu lia Zambi, alioze haliabwila nuli vungu lia Zambi. Hatangu kunwanyingikine keke ya Zambi, alioze haliabwila Zambi hanulweza keke.

Bwenu tuvumbi twa Zambi

¹¹ Akwetu ngunaliumbu kuli yenu, ngeji ni njize hano hashi, ngwami, lifungenu ku usolo ubi wa uutu, uze wakwasa jita ni mbunge.

¹² Bwenu ni ndako yibema hakachi ka waze hi akwa Kristu ko. Nyi nwalinga chino, chibwe maanusuma mulonga ngwo: “Nwakuvulumuna”, hindu maamona yitanga yenu yibema. Kashika maakafumanyisa Zambi ha tangwa lize makeza.

¹³ Mumu hali Mwene, Zeyelenu kuli mianangana jenu eswe: kuli mwanangana yoze uli ni chiyulo ha chifuchi cheswe,

¹⁴ ni kuli akwa kuyula eswe, waze mwanangana akutuma ha kubatwila yitanganyanyi ni ha kuchichimieka waze akulinga yibema.

¹⁵ Mumu Zambi kakuzanga ngwenyi, nukanjise maliji amokomoko a yihepuke, ku yitanga yenu yibema.

¹⁶ Bwenu akwa kutusuka. Alioze kutusuka chenu kanda chibwa ngwe hina lia kufuka yibi, alioze bwenu ngwe tuvumbi twa Zambi.

¹⁷ Senu atu eswe vumbi, zangenu akwenu akwa Kristu, vwilenu Zambi woma, Senu mwanangana wa chifuchi vumbi.

Chilweza cha lamba lia Kristu

¹⁸ Yenu ngamba, ononokenenu miata jenu ni vumbi lieswe, hi kuli abema ni yihomboloji wika ko, alioze ni kuli akalu nawa.

¹⁹ Nyi atu akwo maanumwesa lamba lize kuchalitele kumona, hindu munulihumikiza mumu nunanyingika upale wa Zambi, Zambi makanuwahisa.

²⁰ Nyi munulihumikiza ni lamba lia yitanga yenu yibi, kukunduluka chika munukabwa nacho? Alioze, nyi atu maanumwesa lamba ha yitanga yenu yibema hindu munulihumikiza, Zambi makanuwahisa.

²¹ Hananutambika ha chikuma ngwe chize, mumu Kristu iye mwene hananumwena lamba, hananuhichikila chilweza ha kuchimbulula.

²² Kavulumwine ko nichimwe. Niumwe kevwile ko nilimwe tangwa ngwo, Kristu hanahanjika mahuza.

²³ Muze amuchokele, kachokanyine ko. Muze amumwesene lamba, koomishine ko, alioze yalikunjika kuli Zambi yoze wakubatula ni ululi.

²⁴ Kristu iye mwene yambata shili yetu mu mujimba wenyi ha kulusu, hanga tufwe ku shili, ni hanga tubwe akwa ululi. Ku yilonda yenyi hinunahinduka.

²⁵ Mumu nwabwile ngwe mapanga waze haanapiasuka, alioze haliabwila hinwahiluka kuli Kafunga kanda Kalayi ka mwono wenu.