1 Petulu 1 - Mukanda Wa Zambi 1970

Kumeneka

¹ Yami Petulu, kanganda ka Yesu Kristu, ngunanusonekena yenu waze Zambi atongwele, yenu njize waze nunamwangashana mu yifuchi ya Pontu, ni Galashia, ni Kapadosia, ni Asia, ni Bitinia.

² Tata Zambi hananutongola ngwe chize anyongene shimbu kanda. Hinunalumuka akwa kulinanga ku tachi ja Mwiku wenyi, hanga nwononokene Yesu Kristu, ni hanga anukose ni manyinga jenyi. Zambi anulweze utu ni anwehe uhwimino yakulumbama.

Chihinga cha akwa Kristu

³ Tusakwilenu Zambi kanda Tato ya Mwene wetu Yesu Kristu! Ku keke yenyi yinji, yatwaha mwono walia ku uhindukilo wa Yesu Kristu ku kufwa. Kashika twakusa mbunge ku chihinga,

⁴ chihinga chize Zambi anafungila atu jenyi. Chili chihinga chize kuchahashile kubola, chibwe kubwa ni majilo, chibwe kujimuka ka.

⁵ Chihinga chino chili cha yenu waze Zambi akufunga ku tachi jenyi ku ufulielo wenu. Nwakushimbwila ulamwino uno ndoo muze Zambi makausolola ku mwaka wakusula.

⁶ Nwakuwahilila mu chihinga chize, chibwe haliabwila ha shimbu likepe Chinatambe kwivwa chinyengo mumu ha yeseko yeka ni yeka.

⁷ Lamba lize liakweseka ufulielo wenu, ha kunyingika nyi uli wamwenemwene, nyi ka. Chibwe oru, yize yakutoka, hatangu kaakuyeseka ni kahia. Chizechene nawa ufulielo wenu, uze unahiana oru yibema, Zambi kakuweseka ha kunyingika nyi uli ni tachi, nyi ka. Mba muze Zambi makasolola Yesu Kristu kuli atu eswe, maakanuchichimieka ni kunuhalisa, ni kunulemesa.

⁸ Chibwe kanda nuchimona Yesu Kristu, hindu nwakumuzanga. Chibwe kunushi kumumona haliabwila, hindu nwakumufuliela. Kashika nwakuwahilila chinji, kunwahashile kuchilumbununa ni maliji,

⁹ mumu nwakutambula songo lia ufulielo wenu, we ulamwino wa mwono wenu.

¹⁰ Akwa munanyi a Zambi yaahengula hanga anyingike chikuma cha ulamwino uze, yaambulula shimbu kanda kuli atu hakutwala ku chawana chize te Zambi makanulingila.

¹¹ Mwiku wa Kristu, uze wabwile muli ayo, te wakwanyingikisa ngwo, Kristu makamona lamba hatangu, mba kulutwe makabwa ni uhenya. Te kaakuhengula hanga anyingike tangwa lika yuma yize muyikabwa ni ngwe kuchi muyikabwa ko.

¹² Alioze Zambi yasolola akwa munanyi ngwenyi, maliji waze aalwezele ha kwambujola, kaabwile ko hakutwala kuli ayo ene, alioze hakutwala kuli yenu. Mba haliabwila, sango jize hinwajitambula. Alongeshi a Sango Jibema, waze ahanjikile ku tachi ja Mwiku wa Linanga, uze watumiwine mwilu, haananulweze jo. Chibwe tunganda a mwilu kaanazange kunyingika Sango jino.

Bwenu akwa kulinanga

¹³ Kashika jikizenu mu kunyonga chenu. Kanyamenu, nuse mbunge ku yiwape yize Zambi makanwaha muze Kristu makasoloka.

¹⁴ Ononokenenu Zambi. Kanda nutayiza usolo ubi uze nwalingile hatangu muze te nwakwalajala.

¹⁵ Alioze bwenu akwa kulinanga mu ndako jenu jeswe ngwe chize Zambi, yoze wanutambikile kali munangi.

¹⁶ Mumu Mukanda wa Zambi unambe ngwo: “Bwenu akwa kulinanga, mumu yami nguli munangi.”

¹⁷ Nwakuvuluka Zambi ngwenu: “Tata”, muze nwakumuwayila. Neye keshi katonde, kakubatwila mutu mweswe nikulita ni yitanga yenyi. Kashika, ha shimbu lize nuli hano hashi, musenu vumbi.

¹⁸ Mumu nunanyingika chize Yesu Kristu anukulile ku ndako yamokomoko yize anuselele tushakulu twenu. Kanukulile ko ni yuma yize yikwete ulemu ha shimbu likepe ngwe prata ni oru.

¹⁹ Alioze yanukula ni ndando yahiana, e manyinga a Kristu, ngwe mwana panga yoze keshi kapalia chibwe chibeka.

²⁰ Zambi yahanga kutongola Kristu muze te kanda achitanga hashi, yamusolola mumu hali yenu ku miaka yino yakusula.

²¹ Ku tachi ja Yesu Kristu nwakufuliela Zambi, yoze wamuhindwishile ku kufwa ni wamuhele uhenya. Ha chino, nwakufuliela Zambi, ni nwakumusa mbunge.

²² Nwabemesene mbunge jenu ha kwononokena umwenemwene. Kashika nwakuzanga akwenu akwa Kristu. Lizangenu kuhiana ni akwenu, ni mbunge jenu jeswe.

²³ Mumu hinwasemuka chaha, hi ngwe kuli atatenu ko waze akufwa. Alioze hinwasemuka ku mbuto yize kuyishi kufwa, ku liji lia Zambi, lize likwete mwono wa miaka yeswe.

²⁴ Ngwe chize Mukanda wa Zambi unambe: “Atu eswe kaali ngwe yambu. Uhenya wo weswe ngwe yitemo ya mafwo. Nyi mafwo hooma, yitemo muyiholoka hashi.

²⁵ Alioze maliji a Mwene Zambi kaakulinduluka ndoo ku miaka yeswe.” Lino lie liji lize haananwambulwila lio mu Sango Jibema.