1 MIANANGANA 9 - Mukanda Wa Zambi 1970

Jehu yamuwayisa maji akabwe mwanangana wa Israele

¹ Mukwa munanyi Elisha yatambika mukweze umuwika wa hakachi ka akwa munanyi, yamwamba ngwenyi: “Lilulike uye ku limbo lia Ramote mu Gileade. Yako ni kasaji kano ka maji.

² Muze muuheta ko, ukafupa Jehu, mwana wa Yehosafate, mujikulu wa Nimshi. Ukaya nenyi mu chibatulo cha muchima,

³ ukamuzujila maji wano a olive ha mutwe nikwamba ngwe: ‘Mwene Zambi ngwenyi, ngunakuwayisa maji hanga ubwe mwanangana wa Israele.’ Hohene ukatuhuka, ukachina nikawashi.”

⁴ Chenacho mwe mukweze mukwa munanyi ayile ku Ramote,

⁵ yawana ko miata a tujita te kaali ku punga, yamba ngwenyi: “Mwata, maliji nguli no ni yenu.” Jehu ngwenyi: “Ni iya?” Iye ngwenyi: “Mwata, ni yenu mwane.”

⁶ Mba eswe aali yaanjila mu zuwo. Hohene mukweze mukwa munanyi yamuwayisa maji ha mutwe nikwamba ngwenyi, “Mwene Zambi, Zambi ya Aisraele, kanambe ngwenyi: ‘Ngunakuwayisa maji ubwe mwanangana wa atu jami Aisraele.

⁷ Chatamba kushiha mwene we mwanangana, mwana wa Ahabe. Chenacho mungumwesa lamba Jezebele mumu hanamwange manyinga ja akwa munanyi jami ni tuvumbi twami akwo.

⁸ Akwa jiko lia Ahabe eswe, ni: vungu lienyi eswe kumaakafwa. Malunga eswe, akweze ni makulwana kumaakafwa.

⁹ Mungukalinga kuli akwa jikwo lienyi ngwe chize nalingile kuli akwa majiko ja mianangana ja Aisraele Jeroboame ni Basha.

¹⁰ Jezebele kechi kamufunda; tuwa a mu chifuchi cha Jezrele kumaakalia mujimba wenyi.’ ” Muze hamba chino, mwe mukweze mukwa munanyi yatuhuka, yachina.

¹¹ Jehu yatuhuka, yahiluka kuli tujita ni akwo. No yaamuhula ngwo: “Kuchi, yuma yeswe yinawaha, nyi? Au chizaluke yika akulweza?” Iye yakumbulula ngwenyi: “Nunanyingika chize anazange.”

¹² No ngwo: “Ka, kutwanyingikine. Tulweze chize amba.” Neye ngwenyi: “Kangulweza ngwenyi, Mwene Zambi kanambe ngwenyi: ‘Ngunakuwayisa maji hanga ubwe mwanangana wa Israele.’ ”

¹³ Hazehene tujita ni akwo yaanda tuzaku two, yaala ha ukandukilo hanga Jehu amane ho. Mba yeemba yitavwi, yaakololoka ngwo: “Vulie, mwanangana Jehu!”

Jehu yashiha Jorame mwanangana wa Israele

^14-15 Hohene Jehu yatwama mwanangana Jorame punga. Jorame te kali mu limbo lia Jezrele, kuze ayile akamuwuke yilonda yize amulemekene ku jita yize ashile ni mwanangana Hazaele wa Siria ku limbo lia Ramote. Mba Jehu yambila tujita ni akwo ngwenyi: “Nyi kunuli hamwe ni yami, talenu kanawa, niumwe kanda atuhuka mu Ramote ni kuya ni kukanyamisa atu mu Jezrele.”

¹⁶ Mba Jehu yanyina ha temba lienyi, yaya ku Jezrele. Mwe Jorame te kanda achihinduka, ni mwanangana Ahazia wa Yuda kwenako abwile, te heza ni kumumeneka.

¹⁷ Kafunga ka chikolo te kanamana ha zuwo lisuku lia kukoleka ha chipanga cha Jezrele, yamona Jehu ni tujita twenyi kaaneza ha tuvwalu. Yakololoka ngwenyi: “Mbunga ya tujita ngunamono kaaneza!” Jorame ngwenyi: “Tuma umwe kajita ha kavwalu hanga atale kaali akwetu, nyi akwa kole jetu.”

¹⁸ Mwe kanganda yaheta kuli Jehu yamuhula ngwenyi: “Mwanangana kana zange kunyingika, nuneza ni uhwimino, nyi ka?” Jehu ngwenyi: “Hi mulonga we ko; ngukaule.” Mwe kafunga ha zuwo lisuku yaalweza ngwenyi: “Kanganda kaheta, alioze kasolo kuhiluka.”

¹⁹ Jorame yatuma nawa kanganda mukwo, yahula Jehu chihula chizechene nawa. Jehu yakumbulula nawa ngwenyi: “Hi mulonga we ko; ngukaule.”

²⁰ Mwe kafunga yaalweza nawa ngwenyi: “Kajita haheta ku mbunga, alioze kasolo kuhiluka.” Yaweza ho nawa ngwenyi: “Mwe mwata wa mbunga kanendesa temba lienyi ngwe chizaluke, ngwe chize akwenda Jehu!”

²¹ Mwanangana Jorame ngwenyi: “Lujikenu temba liami nikawashi.” Yaachilinga, mba iye ni mwanangana Ahazia yabwila mu jila, mutu mweswe mu temba lienyi atakane ni Jehu. Yaamutakana ku munda wa Nabote,

²² yaamuhula ngwo: “Jehu uneza ni uhwimino, nyi?” Jehu ngwenyi: “Ngwe kuchi muukubwa uhwimino nyi noko Jezebele kanapande wanga ni kukombelela mahamba chichize?”

²³ Jorame yakololoka ngwenyi: “Punga! Ngwami punga!” yatewulula temba lienyi, yachina.

²⁴ Jehu yanana uta wenyi ni tachi jenyi jeswe, yamwasa Jorame mwivu ha yipaya ndusu ni ku mbunge. Jorame yalimbukila mu temba, yafwa kwenyi.

²⁵ Jehu yambila chikwashi chenyi Bidkare ngwenyi: “Anda Jorame umumbile mu munda wa Nabote. Iwuluka muze yena ni yami twendele hamuwika kunyima lia mwanangana Ahabe, tato ya Jorame. Lie tangwa Mwene Zambi ahanjikile maliji wano hakutwala kuli Ahabe ngwenyi:

²⁶ ‘Zau ngunakamona chize atu anakashiha Nabote ni ana jenyi a malunga. Chamwenemwene mungukakumwesa lamba mu munda uno wene.’ Kashika anda Jorame umumbile mu munda wa Nabote ngwe chize Mwene Zambi ambile.”

Tujita twa Jehu yaashiha Ahazia, mwanangana wa Yuda

²⁷ Muze mwanangana Ahazia hachimona, yachinyina mu temba lienyi ku limbo lia Bete Hagane. Jehu yamukaula, yambila tujita twenyi ngwenyi: “Neye mushihenu!” No yaamulemeka muze te anendesa temba lienyi mu jila ya kuya ku Guru, hehi ni limbo lia Ibleame. Alioze yalikoleleza ndoo ku limbo lia Megido, mba yafwa kwenyi.

²⁸ Akwa lutwe yaamwanda yaamuhilwisa ku Yerusaleme mu temba, yamufunda mu mafuka ja mianangana mu Limbo lia David.

²⁹ Ahazia kabutwile kuyula mu Yuda ha mwaka kumi ni kashi wa kuyula cha Jorame, mwana wa Ahabe, mwanangana wa Israele.

Jehu yashiha mwanangana wa pwo Jezebele

³⁰ Jehu yaheta ku limbo lia Jezrele. Jezebele te hevwa yeswe yize yabalikile, yalifufununa ku meso ni kuyinda kambu jenyi, yamana mu zuwo ni kutalila ha kapenda ku makono ja jila.

³¹ Muze te Jehu ananjila mu chikolo, mwe pwo yakololoka ngwenyi: “Yena Zimri! Mukwa kushiha atu! Mumu yika uli kuno?”

³² Jehu yahetuka, yakololoka ngwenyi: “Akwetu iya uli kama hamwe ni yami?” Kwabwile akwa lutwe a mwanangana aali hanji atatu, yaamutalila mu kapenda.

³³ Jehu yaamba ngwenyi: “Munyasenu hashi!” No yaamunyasa hashi. Manyinga jenyi yasapukila ha zuwo ni ha tuvwalu. Jehu yaliataliata mwe pwo ni tuvwalu twenyi ni temba lienyi.

³⁴ Hohene yanjila mu zuwo lia mwanangana, yalia, yanwa. Mba yamba ngwenyi: “Andenu pwo yoze hashingiwa kuli Mwene Zambi, numufunde, mumu kali, mwana wa mwanangana.”

³⁵ Alioze atu waze ayile ni kumufunda kaawanyine ko Chuma nichimwe shina lume kola, ni yifwaha ya ha mbanda kwoko ni ya ku tusendengele.

³⁶ Muze hamulweza cho, Jehu yamba ngwenyi: “Chino che chinalumbununa maliji waze Mwene Zambi ahanjikile ni kanwa lia kavumbi kenyi Eliya ngwenyi: ‘Tuwa kumeza kalia Jezebele mu chifuchi cha Jezrele.

³⁷ Yifwaha yenyi maakayimwanga ngwe pinga, hanga mutu niumwe kechi kahasa kuyimona nawa.’ ”