1 MIANANGANA 8 - Mukanda Wa Zambi 1970

Pwo wa ku Shuneme yahiluka

¹ Elisha te halweza pwo yoze watwama mu Shuneme, yoze ukwete mwana mwe Elisha ahindwishile ku kufwa, ngwenyi: “Mwene Zambi kumatuma zala mu chifuchi; muyibwa miaka shimbiali. Kashika yako hamwe ni akwa jiko lie ni kutwama kweswako unazange.”

² Mwe pwo yononoka ku maliji ja Elisha, yaya hamwe ni akwa jiko lienyi ni kutwama mu chifuchi cha Filistia miaka shimbiali.

³ Muze miaka shimbiali hiyabalika, mwe pwo yahiluka ku Israele, yaya kuli mwanangana akamuhilwishile zuwo lienyi ni minda yenyi.

⁴ Yawana mwanangana te kanahanjika ni Gehazi, kavumbi ka Elisha. Mwanangana te kanazange kunyingika hakutwala ku yilayi ya Elisha.

⁵ Muze mwe Gehazi te analumbunwina mwanangana hakutwala kuli umwe mutu yoze Elisha ahindwishile ku kufwa mwe pwo yaheta. Gehazi yalweza mwanangana ngwenyi: “Vulie mwanangana! Yono mwe pwo ukwete mwana yoze Elisha ahindwishile ku kufwa!”

⁶ Muze mwanangana ahulile pwo sango jize, mwe pwo yashindakenya maliji a Gehazi. Mba mwanangana yatambika umwe kavumbi, yamwamba ngwenyi: “Muhilwishile yuma yenyi yeswe, ni ubite nikulita ni ndando ya ye mbuto mu miaka yize shimbiali.”

Mukwa munanyi Elisha ni mwanangana wa Siria

⁷ Limwe tangwa muze Benhadade mwanangana wa Siria abwile ni yikola, mukwa munanyi Elisha yaya ku limbo lia Damasku. Muze mwanangana hevwa ngwo, Elisha heza,

⁸ mwanangana yambila umwe mukwa lutwe Hazaele ngwenyi: “Twala chawana chino kuli mukwa munanyi wa Zambi, umuhule kumunguhinduka nyi ka.”

⁹ Mba Hazaele yatwika mihuko yeka ni yeka yibema ya mu limbo lia Damasku hali tumelu makumi awana, yaya kuli Elisha. Muze Hazaele hamutakana yamba ngwenyi: “Kavumbi kenu mwanangana Benhadade mwe wangutuma, ngwenyi: ‘Munguhinduka ku musongo uno, nyi ka?’ ”

¹⁰ Elisha ngwenyi: “Mwene Zambi hangulweza ngwenyi, ‘Kumafwa.’ ” Alioze yako Umulweze ngwe: “Muuhasa kuhinduka.”

¹¹ Mba Elisha yamuhulikila meso ni woma, ndoo ni muze Hazaele hevwa sonyi. Hohene Elisha yabutuka kulila.

¹² Hazaele yahula Elisha ngwenyi: “Mwata, kuchi mba nunalili?” Elisha yakumbulula ngwenyi: “Mumu ngunanyingika yibi yize muukalinga Aisraele, muukocha membo jo akukoleka, muukashiha akweze jo, muukanyasa ana jo a kemba, muukachacha tufumbakaji.”

¹³ Hazaele ngwenyi: “Ngwe kuchi mungukabwa ni tachi ngwe jino? Yami kavumbi kenu nguli kawa.” Elisha ngwenyi: “Mwene Zambi hanangulweze ngwenyi, yena mwe muukabwa mwanangana wa Siria.”

¹⁴ Hazaele yahiluka kuli Benhadade, mwe Benhadade yamuhula ngwenyi: “Elisha kuchi ambanga!” Hazaele ngwenyi: “Kambanga ngwenyi: ‘Kumunuhinduka.’ ”

¹⁵ Alioze muze hikwacha Hazaele yanda blankete yayichubika mu meya, yamufuka mwanangana ku meso, neye yafwa. Mba Hazaele yahinga mwanangana wa Siria.

Jehorame mwanangana wa Yuda

¹⁶ Ha mwaka wa muchitano wa kuyula cha mwanangana Jorame, mwana wa Ahabe, wa Israele, Jehorame mwana wa Yehosafate yaamupwisa mwanangana wa Yuda.

¹⁷ Te habwa ni miaka makumi atatu ni yaali, yayula mu Yerusaleme miaka nake.

¹⁸ Mwazovu wenyi te mwana wa mwanangana Ahabe. Mwe Jehorame, yembulula yitanga yibi ya mianangana ja Israele. Yavulumuna Mwene Zambi.

¹⁹ Alioze Mwene Zambi kazangile ko kwonona vungu lia Yuda, mumu te hanalakenya kulu kavumbi kenyi David ngwenyi: “Vungu lie kumaakayula ndoo ku miaka yeswe.”

²⁰ Ha matangwa a kuyula cha Jehorame, Aedome yaakatukila Ayuda, yaalitongwela mwanangana wo ene.

²¹ Kashika Jehorame yatuhuka ni matemba jenyi eswe ni kuya ku Zaire. Kwenako aajingilikile kuli tujita twa Aedome, alioze ha ufuku iye ni matemba jenyi yaatuhuka, yaachina, yaahiluka ku mahio.

²² Chize ku tangwa lize Aedome yaatusuka kuli Ayuda. Ha matangwa waze ene akwa limbo lia Libna yaakatukila nawa Ayuda, yaatusuka.

²³ Yitanga yikwo ya Jehorame haanayisoneka mu mukanda wa Sango ja Mianangana ja Yuda.

²⁴ Jehorame yafwa, yaamufunda mu mafuka ja mianangana mu Limbo lia David. Mwanenyi Ahazia yamuhinga.

Ahazia, mwanangana wa Yuda

²⁵ Ha mwaka kumi ni wa muchaali wa kuyula cha mwanangana Jorame, mwana wa Ahabe, wa Israele, Ahazia mwana wa Jehorame yaamupwisa mwanangana wa Yuda,

²⁶ muze te habwa ni miaka makumi aali ni yaali. Yayula ku Yerusaleme mwaka umuwika. Naye Atalia, mwana wa mwanangana Ahabe, mujikulu wa mwanangana Omri wa Israele.

²⁷ Mwe Ahazia yavulumuna Mwene Zambi, ngwe chize alingile akwa jiko lia tato weno Ahabe.

²⁸ Mwanangana Ahazia yalikunda ni mwanangana Jorame wa Israele hanga ase jita ni mwanangana Hazaele wa Siria. Yaasa jita ku limbo lia Ramote mu Gileade. Jorame yalemana,

²⁹ yahiluka ku limbo lia Jezrele akamuwuke yilonda yenyi. Ahazia yaya ko ni kumumeneka.