1 MIANANGANA 7 - Mukanda Wa Zambi 1970

¹ Elisha ngwenyi: “Banjikenu chize Mwene Zambi anambe! Hamene ha ola yinoyene ku chikolo cha Samaria munukalanda kilo jitatu ja wunga wa tiriku wafufunuka hanji kilo jisambano ja wunga wa masa ni lumbongo umuwika wa prata.” Mwata wa tujita, hali yoze mwanangana anajikijila, yakumbulula Elisha ngwenyi: “Chibwe Mwene Zambi anokese vula mwilu haliabwila kuyichi kubwa ko.”

² Elisha yamukumbulula ngwenyi: “Muukachimona, alioze kuuchi kayilia.”

Tujita twa Siria yaachina

³ Malunga awana, akwa musongo ukalu wa ha chikowa (hanji mbumba), te kaatwama haze lia yikolo ya limbo lia Samaria, yaalihanjikisa ngwo: “Mumu yika tunashimbwila hano ndoo tufwe?

⁴ Hi chibema ko kunjila mu limbo, mumu mutufwila mo ni zala. Nyi twatwama hanohene, hindu kumutufwa. Kashika hituyenu ku musumba wa Asiria. Nyi maatushiha ashihe kwo, alioze tangwa likwo maatwecha ni mwono.”

⁵ Kashika muze te tangwa hiliatoka, yaaya ku musumba wa Asiria, Alioze muze haaheta ko, kaawanyine ko niumwe.

⁶ Mumu te Mwene Zambi heevwisa Asiria ngwe lundunjila wa tujita, hamwe ni tuvwalu ni matemba. Mba yaanyonga ngwo, mwanangana wa Israele hakamba mianangana ja Ahite ni akwa Egiptu ni e tujita two hanga ase no jita.

⁷ Kashika Asiria yaachina ha kulilamwina, yaahichika mazuwo jo a makubu, ni tuvwalu two, ni yimbulu jo, yaahichika yuma yo yeswe ha musumba.

⁸ Muze e malunga awana haaheta ku songo lia musumba, yaanjila mu limwe zuwo lia makubu, yaalia, yaanwa yize yabwile mo. Yaanda mbongo ja prata, ni oru, ni mahina waze awanyine mo, yaaya, yaayisweka. Yaanjila nawa mu zuwo likwo, yaalinga nawa chizechene.

⁹ Alioze yaalihanjikisa ngwo: “Chino tunalingi hi chibema ko! Tuli ni sango jibema, hi chibema ko kulihumikiza najo ukawetu. Nyi twashimbwila ndoo hamene chichamene mba tukajambulule, maatumwesa lamba. Tuyenu haliabwila twambulwile akwa lutwe ja mwanangana!”

¹⁰ Chenacho atuhukile mu musumba wa Asiria, yaahiluka ku limbo lia Samaria, yaakololoka kuli tufunga ku yikolo ngwo: “Twayanga ku musumba wa Asiria, kutwamwene ko mutu hanji kutwevwile ko liji nilimwe. Twawana lume tuvwalu ni yimbulu yakukasa mbembembe, ni mazuwo a makubu chizechene.”

¹¹ Tufunga yambulula je sango, atu akwo yaajitwala ku zuwo lia mwanangana.

¹² Mwanangana yahinduka, te kuchili ufuku, yambila akwa lutwe ngwenyi: “Mungunulweza chize Asiria haanyonga! Kaananyingika ngwo, tuli ni zala yinji. Kashika haatuhuka mu musumba wo, haaya ni kuswama mu yambu. Kaananyongo ngwo, mututuhuka mu limbo ni kufupa yakulia. Mba maatukwata ni mwono, hanga atambule lie limbo.”

¹³ Umwe wa kuli akwa lutwe yamba ngwenyi: “Yetu waze tuli muno mu limbo mutufwa ngwe chize akwetu waze haafwa kulu. Kashika tutumenu amwe malunga ni tuvwalu atano, waze haasala ni mwono, hanga tunyingike kanawa chize analingi.”

¹⁴ No yaanda amwe malunga, mwanangana yaatuma mu matemba aali hanga anyingike chize tujita twa Siria analingi.

¹⁵ Malunga yaaya ndoo ku Yordau. Mu jila yeswe yaamona mahina ni yitwa ya jita yize Asiria te anayi nikuholola muze anachina. Mba yaahiluka ni kwambulwila mwanangana.

¹⁶ Atu mu limbo yaatuhuka, yaabuba musumba wa Asiria. Chenacho, nikulita ni maliji ja Mwene Zambi, atu yaalanjisa kilo jitatu ja wunga wa tiriku, hanji kilo jisambano ja wunga wa masa ni lumbongo umuwika wa prata.

¹⁷ Mwanangana wa Aisraele te hahana milimo yakufunga chikolo cha limbo kuli mwata wa tujita yoze iye mwene te akujikijila. Atu yaamuliata, yafwa, ngwe chize Elisha amwambile muze mwanangana ayile ni kumutala.

¹⁸ Elisha te halweza mwanangana ngwenyi: “Hamene maakalanjisa kilo jitatu ja wunga wa tiriku wafufunuka hanji kilo jisambano ja wunga wa masa ni lumbongo umuwika wa prata.”

¹⁹ Mwata wa tujita neye te hamba ngwenyi: “Chibwe Mwene Zambi anokese vulu mwilu haliabwila kuyichi kubwa!” Ni Elisha te hamukumbulula ngwenyi: “Muukachimona, alioze kuuchi kayilia.”

²⁰ Chenacho chabwile kuli iye, yaamuliata kuli atu mu chikolo cha limbo, mba yafwa kwenyi.