1 MIANANGANA 6 - Mukanda Wa Zambi 1970

Njimbu yaholokele mu meya, yayanda

¹ Limwe tangwa mbunga ya akwa munanyi ja Zambi, waze te atwama hamwe ni Elisha, yaamwamba ngwo: “Homa hano twatwama hakeha naye:

² Tutayize kama tuye ku lwiji Yordau ni kubatula yishimi, hanga tutunge homa ha kutwama.” Elisha ngwenyi: “Chibema.”

³ Umwe wa kuli ayo yamulembela hanga aye hamwe no. Elisha yatayiza,

⁴ yaya hamwe no. Muze haaheta ku Yordau, yaabutuka milimo.

⁵ Muze umwe wa kuli ayo anabatula chishimi, susumuku njimbu yenyi yiisokoka, yiiholokela mu meya. Neye yalweza Elisha ngwenyi: “Mwata, njimbu ya mbala hiyatoka. Kuchi mungulinga?”

⁶ Elisha ngwenyi: “Halihi yaholokela?” Mwe mutu yamulweza homa haze, mba Elisha yabatula mutondo, yaukonga mu meya, yiukoka ye njimbu.

⁷ Elisha yamwamba ngwenyi: “Yikoke.” Yayikoka, yayanda.

Aisraele yaakumba Asiria

⁸ Mwanangana wa Siria yasa jita ni Aisraele. Yambila miata a tujita hanga atongole kuze majikila musumba.

⁹ Alioze Elisha yatuma maliji kuli mwanangana wa Israele, yamulimwisa kuchina makundama hehi ni musumba wa Asiria, mumu te Asiria kwenako anatwaminyina Aisraele.

¹⁰ Chenacho mwanangana wa Israele alimwishine tujita waze te aliko, no yaalimuka, yaalilamwina ko yimwe yisuho.

¹¹ Mwanangana wa Siria yalibikala ha Chuma chize, yatambika miata, yaahula ngwenyi: “Iya wa kuli yenu uli ku sali lia mwanangana wa Israele?”

¹² Umwe mwata yamukumbulula ngwenyi: “Vulie mwanangana! Kukushi niumwe wa kuli yetu. Elisha mwenawo wakuhanjika ni mwanangana wa Israele, chibwe maliji eswe waze nunahanjika muchima lia zuwo.”

¹³ Mwe mwanangana ngwenyi: “Tuhukenu nuye numufupe kweswako ali, hanga numukwate.” Muze hevwa ngwo, Elisha kali mu limbo lia Dotane,

¹⁴ mwe mwanangana yatuma tujita a tachi hamwe ni tuvwalu ni malemba, yaaheta ku limbo ha ufuku, yaalijingilika.

¹⁵ Ha chichamene cheswe kavumbi ka Elisha yahinduka, yatuhuka haze, yamona mbunga ya tujita twa Asiria hamwe ni tuvwalu two ni matemba jo, haaseleka lie limbo. Mwe kavumbi yahiluka, yalweza Elisha ngwenyi: “Mamee! Mwata kutwafwa! Kuchi mutulinga kama?”

¹⁶ Elisha ngwenyi: “Kanda wivwa woma, tuli ni tujita anji anahiana ayo.”

¹⁷ Mba Elisha yalemba ngwenyi: “Aa Mwene Zambi, mulawise kama meso jenyi hanga amone!” Mwene Zambi yevwa kulemba chenyi, kavumbi ka Elisha yalaula, yamona mulundu weswe hiwazala ni tuvwalu ni matemba a kahia anajingilika Elisha.

¹⁸ Muze Asiria haakundama, Elisha yalemba ngwenyi: “Aa Mwene Zambi, tujita wano apupuchise kama meso jo!” Mwene Zambi yevwa kuliumba chenyi, yaapupuchisa meso.

¹⁹ Mba Elisha yaambila ngwenyi: “Jila hi yino ko, limbo lize nunafupu hi lino ko. Ngukaulenu, ngunulweze mutu yoze nunafupu.” Mba yaatwala ku limbo lia Samaria.

²⁰ Ha shimbu lize anjilile mu limbo, Elisha yalemba ngwenyi: “Mwene Zambi, alawise kama meso jo, hanga amone.” Mwene Zambi yevwa kulemba chenyi, yalawisa meso jo. No yaamona ngwo, kuma tuli mukachi ka Samaria.

²¹ Muze mwanangana wa Israele hamona Asiria, yahula Elisha ngwenyi: “Aa mwata, ngwashihe? Ngwashihe, nyi?”

²² Elisha ngwenyi: “Ka, kunwahashile kushiha tujita waze hinwakwata mu jita. Ahenu yakulia alie, anwe, mba nweche ahiluke kuli mwanangana wo.”

²³ Chenacho mwanangana wa Israele alingile chiteleka chinene. Hohene muze haalia, haanwa, mwe mwanangana yaahilwisa kuli mwanangana wa Asiria. Chize ku lie tangwa alio, Asiria yaalitwamina kububa yuma mu chifuchi cha Aisraele.

Asiria yaasa jita ni Asamaria

²⁴ Kulutwe lia matangwa, mwanangana Benhadade wa Siria yatuma tujita twenyi akase jita ni Aisraele, yaaseleka limbo lia Samaria.

²⁵ Kashika mu limbo mwabwile zala yinji kuhiana. Mutwe wa chimbulu yiufwika ndando prata makumi nake, ni grame kulakaji jaali ja yichokolo ya membe ndando prata jitano.

²⁶ Muze te mwanangana wa Israele anendangana helu lia chipanga cha limbo, umwe pwo yakololoka ngwenyi: “Vulie mwanangana! Ngukwasenu kama.”

²⁷ Mwanangana ngwenyi: “Nyi Mwene Zambi kakukwashile, kuma yami ngunahase kukukwasa, nyi? Kuma nguli ni tiriku hanji vinyu, nyi?

²⁸ Mulonga uka?” Pwo yakumbulula ngwenyi: “Limwe tangwa pwo yono yangwamba ngwenyi: ‘Tulie mwane musono, mba hamene mutulia mwanami.’

²⁹ Chenacho twatelekele mwana wa yami, yitumulia. Mba mukwacha ko yingumwamba ngwami: ‘Hitulie mwana wa yena,’ alioze yamusweka.”

³⁰ Mwanangana, hakwivwa chino, yevwa chinyengo, yatanuna mahina jenyi. Atu waze abwile ko yaatala, kuma mwanangana kanazala mwanji mukachi.

³¹ Mwe mwanangana yalishinga ngwenyi: “Nyi chabatwile mutwe wa Elisha musono, Mwene Zambi angushihe!”

³² Mba yatuma kanganda kuli Elisha. Ha lie shimbu alio, Elisha te kali ku mahienyi hamwe ni makulwana waze ayile ni kumunangisa. Shimbu mwe kanganda ka mwanangana kanda achiheta, Elisha yalweza e makulwana ngwenyi: “Mukwa kushiha atu yoze hatuma umwe mutu hanga angushihe! Muze maheta kuno, nwajila chajilo, kanda aheta muchima. Mwanangana iye mwene kanakaula.”

³³ Shimbu te machihanjika, mwanangana yaheta, yamba ngwenyi: “Lamba lino kuli Mwene Zambi Unakatuka! Kuchi tunamushimbwila nawa kulinga chimwe Chuma?”