1 MIANANGANA 5 - Mukanda Wa Zambi 1970

Elisha yawuka Namane

¹ Namane, mwata wa tujita twa Siria, te mukwa lufuma. Mwanangana wa Siria yamulemesa kuhiana, mumu Mwene Zambi yakwasa Asiria kukumba ni tachi ja Namane. Te kajita munene, alioze yamona lamba mumu ha musongo ukalu wa ha chikowa (hanji mbumba).

² Limwe tangwa Asiria yeeza ni kububa yuma ya Aisraele, yaambata umwe mwana pwo wa Aisraele mu undungo. Neye yabwa ndungo ya pwo lia mwe Namane.

³ Limwe tangwa mwe mwana pwo yambila pwo lia kako ngwenyi: “Nyi mwene wami maya kama kuli mukwa munanyi wa Zambi yoze watwama mu limbo lia Samaria, kachi kumamuwuka musongo wenyi.”

⁴ Muze mwe Namane hachivwa, yaya kuli mwanangana wa Siria, yamulweza chize amba mwana pwo.

⁵ Mwanangana ngwenyi: “Yako kuli mwe mwanangana wa Israele umwehe mukanda uno.” Mba Namane yakatuka, yanda mbongo 30,000 a prata, ni 6,000 a oru, ni mahina abema kumi.

⁶ Mukanda uze ambachile Namane yasoneka ho ngwenyi “Vulie mwanangana! Mukanda uno nausoneka mumu hali mwata wa tujita twami Namane. Umuwuke kama ku musongo wenyi.”

⁷ Muze mwanangana wa Israele hatanga we mukanda, yatanuna mahina jenyi ni wuli ngwenyi: “Mumu yika mwanangana wa Siria hangwamba ha kuwuka mutu yono? Kananyongo ngwenyi, yami nguli Zambi yoze ukwete chiyulo cha kushiha ni kupwisa ni mwono, nyi? Ngwami, Vunda anafupu kuli yami!”

⁸ Muze mukwa munanyi Elisha hevwa yuma yize, yatuma maliji kuli mwanangana ngwenyi: “Mumu yika unalibikala? Ngutumine mwe mutu hanga anyingike ngwenyi, kuma mu Israele muli mukwa munanyi!”

⁹ Hohene Namane yaya ni tuvwalu twenyi ni temba lienyi, yamana ku chikolo cha zuwo lia Elisha.

¹⁰ Elisha yatuma kavumbi kenyi ha kumulweza aye asane mu lwiji Yordau yisuho shimbiali, mba musongo wenyi muuhwa kanawa.

¹¹ Alioze Namane yalikasa ufwatulo ngwenyi: “Yami nanyonga ngwami, meza kuli yami hanga angulembele kuli Mwene Zambi, Zambi yenyi, ni kuhungisa haze hali musongo, hanga anguwuke!

¹² Chikwo nawa, ngiji ja Abana ni Farpare mu limbo lia Damasku, hi jibema ko kuhiana ngiji jeswe ja mu Israele, nyi? Te chahashile kusana mo ni kuhinduka, nyi?” Chenacho atewulukile, yaya ni ufwatulo.

¹³ Alioze tuvumbi twenyi yaamukundama, yaamwamba ngwo: “Lisesa tata! Nyi mukwa munanyi kakwamba nulinge chimwe Chuma chikalu, kachi kunwachilingile, nyi? Mba kuchi kunwahashile kusana, ngwe chize hamba, hanga nuhinduke?”

¹⁴ Hohene Namane yapalumuka ku Yordau, yanjila mo kajiwa yisuho shimbiali, ngwe chize amulwezele Elisha. Mba yahinduka, chikowa chenyi yichibema ngwe cha mwana kemba.

¹⁵ Yahiluka kuli Elisha hamwe ni atu jenyi eswe, ngwenyi: “Haliabwila hinanyingika ngwami, kukushi Zambi mukwo shina lume Zambi ya Aisraele. Kashika mwata, ngunaliumbu, tambulenu kama chawana chami.”

¹⁶ Elisha ngwenyi: “Ni mwe Mwene Zambi, yoze nakulingila, chichi kutambula chawana che.” Namane yamushinjila, alioze Elisha kabanjikile ko.

¹⁷ Kashika Namane yamba ngwenyi: “Nyi kuusolo kutambula chawana chami, ngutayize ngumbate tuku ja mavu ha yimbulu aali hanga nguye no ku mahiami, mumu chize ku tangwa lino chichi kulambula nawa milambu ya kwocha hanji milambu yikwo kuli mazambi eka shina lume kuli Mwene Zambi wika.

¹⁸ Ngunase ko mbunge ngwami, Mwene Zambi mangukonekena muze mungunjila ni mwanangana mu zuwo lia Rimone, zambi ya Siria, ni kumuwayila. Kota Mwene Zambi mangukonekena ha Chuma chino!”

¹⁹ Elisha ngwenyi: “Yako ni uhwimino.” Mba Namane yakatuka. Muze te henda lume kapinji kakepe,

²⁰ Gehazi, kavumbi ka Elisha, yalihanjikisa ngwenyi: “Haa puu! Mwene wami hatayiza Namane kuya, kafwetele nichimwe! Kachi te katambula chize Kasiria amba kumwaha. Ni mwe Mwene Zambi, mungumukaula fuji hanga ngumutambule chimwe Chuma.”

²¹ Mba yakatuka, yamukaula fuji. Muze Namane hamona mwe kavumbi kanamukaula, yasunuka ha temba lienyi ni kumubatwiza, yamuhula ngwenyi: “Kuchi kunawaha, nyi?”

²² Gehazi ngwenyi: “Ewa, alioze mwene wami wangutuma ha kunulweza ngwenyi, malunga aali a ku mbunga ya akwa munanyi a ku chifuchi cha milundu ya Efraime heeza. Kanazange waahe 3,000 a mbongo ja prata, ni mahina aali abema.”

²³ Namane ngwenyi: “Nalemba, tambula kama 6,000 a mbongo ja prata.” Yamushinjila kujitambula, yalongeza je mbongo mu tuku jaali, yamwaha nawa mahina aali abema, yayitwika hali ngamba aali. No yaatetekela kulutwe lia Gehazi.

²⁴ Muze haaheta ku mulundu kuze te atwama Elisha, Gehazi yatambula tuku jize jaali, yajitwala mu zuwo. Hohene yahilwisa tuvumbi twa Namane.

²⁵ Yahiluka ku zuwo, mba Elisha yamuhula ngwenyi: “Kuli wayanga?” Neye yamukumbulula ngwenyi: “Ahaa mwata nikumwe!”

²⁶ Alioze Elisha yamba ngwenyi: “Unanyongo ngwe, chabwile ko hamwe ni yena mu mwiku muze mwe mutu asunuka mu temba ni kukubatwiza, nyi? Lino hi tangwa ko lia kutambula mbongo, ni mahina, ni minda ya olive ni ya vinyu, ni mapanga, ni ngombe, ni ndungo!

²⁷ Nyingika ngwe, haliabwila muubwa ni musongo ukalu wa Namane, yena ni vungu lie ndoo ku miaka yeswe!” Muze mwe Gehazi hakatuka, musongo uze yiumukwata, chikowa chenyi yichalumuka chitoma ngwe chiwe.