1 MIANANGANA 4 - Mukanda Wa Zambi 1970

¹ Umwe pwo, wa ku mbunga ya akwa munanyi ja Zambi, yaya kuli Elisha, yamba ngwenyi: “Mwata, lunga liami hanafu! Te kavumbi ka Zambi, ngwe chize nunanyingika. Alioze umwe mukwa kongo heza ni kwanda ana jami aali hanga aye no mu undungo mumu ha kongo lia mukwetu lunga.”

² Elisha yakumbulula ngwenyi: “Chika unazange ngukulingile? Ngulweze chika uli nacho mu zuwo lie.” Pwo ngwenyi: “Nichimwe, shina lume mulondo ukepe wa maji a olive.”

³ Elisha ngwenyi: “Yako utambule yikashi yeswe yize enyembo je maakwaha.

⁴ Mba yena ni ana je a malunga njilenu mu zuwo, ajilenu chajilo, nubutule kulonga maji mu yikashi. Chikashi cheswe chize muchizala nuchisa ku tenga.”

⁵ Hohene mwe pwo yanjila mu zuwo lienyi hamwe ni ana jenyi a malunga, yajila chajilo, yanda we mulondo uze wabwile ni maji a olive, yalonga maji mu yikashi nikulita ni chize anenyi a malunga amunehenene yo.

⁶ Muze halonga maji mu yikashi yeswe, yahula nyi yikashi yikwo yili ko nawa. Mwanenyi yamukumbulula ngwenyi: “Chakusula chichene.” Mba maji yaabatuka.

⁷ Mwe pwo yahiluka kuli mukwa munanyi Elisha. Neye yamwamba ngwenyi: “Lanjisa maji hanga ufwete kongo lie. Waze maasala ho nulikwase no.”

Elisha ni umwe pwo pichi

⁸ Limwe tangwa Elisha yaya ku limbo lia Shuneme, kuze te kwatwama umwe pwo pichi. Mwe pwo yalakenya Elisha ni kulia ku zuwo lienyi. Chize ku tangwa lize Elisha te kakuya ku Shuneme, kwenako te akulila.

⁹ Mwe pwo yambila lunga lienyi ngwenyi: “Ngunanyingika ngwami, lunga yono wakwiza ni kutulila kuno kali munangi wa Zambi.

¹⁰ Tumululikile chimwe chibatulo helu lia zuwo, hanga tusemo muhela, ni mesa, ni chitwamo, ni ndeya. Mwe lunga abwe ni kubomba mo muze meza ni kutunangisa.”

¹¹ Limwe tangwa Elisha yaya nawa ku Shuneme, yakanduka ku chibatulo chenyi, yahwima.

¹² Yambila kavumbi kenyi Gehazi atambike mwe pwo. Muze heza,

¹³ Elisha yambila Gehazi ngwenyi: “Muhule yika chatamba kumulingila kama mumu ha lamba lize anamono ha kutukwasa. Nguye kuli mwanangana hanji kuli mwata wa tujita ha kumuhanjikila nyi habwa ni chimwe Chuma, nyi ka.” Pwo yakumbulula ngwenyi: “Nguli kanawa mukachi ka usoko wami.”

¹⁴ Elisha yahula Gehazi ngwenyi: “Nyi chocho, yika mungumulingila?” Gehazi ngwenyi: “Keshi mwana wa lunga, ni mwe lunga lienyi habwa kashinakaji.”

¹⁵ Elisha ngwenyi: “Mutambike eze.” Mwe pwo yeza, yamana ku chikolo.

¹⁶ Elisha yamwamba ngwenyi: “Mwaka wa kulutwe ha kakweji yono mwene, mwana wa lunga muukakwata mu kondo.” Mwe pwo yakumbulula ngwenyi: “Ahaa! Mwata nalemba, kanda nungwonga chocho. Yenu nuli mutu wa Zambi!”

¹⁷ Ha mwaka wa kulutwe ha kakweji yoze mwene, mwe pwo yasema mwana wa lunga nikulita ni maliji ja Elisha.

¹⁸ Yimwe miaka kulutwe, ha matangwa a kuhela mihuko, mwe mwana yatuhuka, yaya ni kulitakana ni tato ha chichamene. Te kali ku minda hamwe ni ngamba jenyi.

¹⁹ Susumuku mwana yateta kuli tato ngwenyi: “Mama mutwe wamie! Mama mutwe wamie!” Mba tato yambila umwe ngamba ngwenyi: “Twala mwana kuli naye.”

²⁰ Neye yamutwala. Naye yamusa ha molu. Mba muze tangwa hiliaheta ha muchima, mwe mwana yafwa.

²¹ Naye yamutwala mu chibatulo cha Elisha, yamubombesa ha muhela, yatuhuka, yajila chajilo.

²² Mba yatambika lunga lienyi, yamwamba ngwenyi: “Ngutumine umwe ngamba ni chimbulu. Changutamba kuya kuli mukwa munanyi Elisha. Munguhiluka nawa nikawashi.”

²³ Lunga lienyi ngwenyi: “Mumu yika unayila musono? Mumu hi tangwa lia kuhwima ko hanji chiwanyino cha Kakweji Mwaha.” Pwo ngwenyi: “Kuheshi Chuma.”

²⁴ Mba yakashila mahina ha chimbulu, yambila mwe ngamba ngwenyi. “Wendesa chimbulu fuji, kanda wendesa makoke shina muze mungukulweza.”

²⁵ Mwe pwo yatuhuka, yaya ku mulundu wa Karmele, kuze te atwama Elisha. Elisha yamona mwe pwo kaneza muze te achili kusuku, yambila kavumbi kenyi Gehazi ngwenyi: “Tala, pwo wa ku Shuneme kaneza!

²⁶ Zomboka nikawashi umubatwize umuhule nyi iye mwene ni lunga lienyi ni mwanenyi kaanahinduka, nyi?” Mwe pwo yakumbulula Gehazi ngwenyi: “Ewa, tunahinduka.”

²⁷ Alioze muze hakundama kuli Elisha, yafulamana ku meso jenyi, yamukwata ku molu. Gehazi te himamukatwisa ko, alioze Elisha ngwenyi: “Mweche, kuwamumwene kali ni chinyengo, nyi? Mwene Zambi kangulwezele cho nichimwe.”

²⁸ Mwe pwo ngwenyi: “Mwata, kuma nanuhulile ngwami, ngwehe mwana wa lunga, nyi? Chanwambile ko ngwami kanda nungwonga, nyi?”

²⁹ Elisha yatewuluka kuli Gehazi nikwamba ngwenyi: “Lijichike muya we, anda lukanda wami, yako. Kanda umana ni kumeneka mutu mu jila. Nyi umwe makumeneka, yena kanda Umukumbulula. Yako ku zuwo, sako lukanda hali mwana.”

³⁰ Mwe pwo yambila Elisha ngwenyi: “Ni mwe Mwene Zambi ni yenwene, chichi kunuhichika!” Elisha yakatuka, yaya nenyi.

³¹ Gehazi te hatetekela kulutwe, yasa lukanda hali mwe mwana, alioze kevwile ko liji nilimwe, chibwe kamwene ko chimwe chinyingi cha mwono. Kashika yahiluka kuli Elisha, yamba ngwenyi: “Mwana kahindukile.”

³² Muze Elisha haheta, yanjila ukawenyi mu chibatulo, yamona mwana hanafu, hanamubombesa ha muhela.

³³ Yajila chajilo, yalemba kuli Mwene Zambi.

³⁴ Mba yafulamana hali mwe mwana, yasa kanwa lienyi ku kanwa lia mwana, ni meso ha meso ja mwana, ni moko ha moko ja mwana. Yalihulika lume nee ha mujimba wa mwana. We mujimba wa mwana yiubutuka kuvuma.

³⁵ Elisha yakatuka, yendangana mu chibatulo cha zuwo, mba yafulamana nawa hali mwe mwana. Hohene mwana yachehula yisuho shimbiali, yalaula.

³⁶ Elisha yatambika Gehazi, ngwenyi: “Tambika naye ya mwana.” Muze naye heza, yamwamba ngwenyi: “Mwane au.”

³⁷ Mwe pwo yafulamana ku molu ja Elisha, mba yatambula mwanenyi, yaya kwenyi.

Yilayi yikwo yaali

³⁸ Umwe mwaka, muze mu chifuchi cheswe mwabwile zala, Elisha yahiluka ku limbo lia Gilgale. Muze te analongesa mbunga ya akwa munanyi ja Zambi, yambila kavumbi kenyi anangike lundeho (yimbia) ha jiko atelekele akwa munanyi yimwe yakulia.

³⁹ Umwe wa kuli ayo yaya ni kuhela mihuko mu yambu, yahela mazungu waze analite ni kumbata. Yaaneha, yaateleka mu lundeho, alioze kanyingikine ko chize abwa.

⁴⁰ No yaazambula mazungu hanga akwa munanyi alie. Alioze muze haapaka, yaalweza Elisha ngwo: “Mala, ulembe ulimo!” Kaahashile ko kwaha.

⁴¹ Elisha yeta wunga, yaulakumwina mu lundeho, yamba ngwenyi: “Ahenu alie.” Hi kumwabwile ko nawa ulembe.

⁴² Limwe tangwa likwo, umwe lunga yakatuka ku Bale Shalisha, yanehena Elisha mbolo makumi aali ya ku mihuko yitangu ya mwaka, ni tuku ya chivwale cha wisu. Elisha yalweza mwe kavumbi kenyi ha kwaha akwa munanyi yakulia yize.

⁴³ Alioze kavumbi kenyi yakumbulula ngwenyi: “Yenu nunanyongo ngwenu, yino muyizuka ha kulisa malunga kulakaji, nyi?” Elisha ngwenyi: “Atetele yo alie, mumu Mwene Zambi kanambe ngwenyi: Kumaalia ni kumuyisala ho.”

⁴⁴ Mba mwe kavumbi yaatwalila ye yakulia. Eswe yaalia, yaakuta. Yakulia yiilisala ho ngwe chize ambile Mwene Zambi.