1 MIANANGANA 3 - Mukanda Wa Zambi 1970

Jita mukachi ka Israele ni Moabe

¹ Ha mwaka kumi ni wa muchinake wa kuyula cha Yehosafate mwanangana wa Yuda, Jorame, mwana wa Ahabe, yaamupwisa mwanangana wa Israele, yayula miaka kumi ni yaali mu limbo lia Samaria.

² Yavulumuna Mwene Zambi, alioze hi kuhiana ko ngwe tato hanji naye Jezebele, mumu yabuzula hamba Bale yoze alingile tato.

³ Hindu yalinga ngwe mwanangana Jeroboame mwana wa Nebate, yoze wavulumwishine Aisraele, kechele ko kulinga yibi.

⁴ Mwanangana Mesha wa ku chifuchi cha Moabe te kabita mapanga. Mwaka ha mwaka te kakulambula kuli mwanangana wa Israele ana mapanga 100,000 ni ngona ja mapanga 100,000.

⁵ Alioze muze Ahabe mwanangagna wa Israele hafwa, Mesha yakatukila Aisraele.

⁶ Hazehene mwanangana Jorame yatuhuka mu Samaria, yakungulula tujita twenyi eswe,

⁷ yatuma maliji kuli mwanangana Yehosafate wa Yuda ngwenyi: “Mwanangana wa Moabe hangukatukila. Muwiza ungukwase kama kwasa nenyi jita, nyi?” Neye yakumbulula ngwenyi: “Ewa, mungwiza ni e tujita twami ni e tuvwalu twami.

⁸ Jila yika mutuya?” Jorame yakumbulula ngwenyi: “Mutuya mu jila ya mu puya ya Edome.”

⁹ Chenacho ayile mwanangana Jorame hamwe ni mwanangana wa Yuda ni wa Edome. Muze heenda matangwa shimbiali, yaalihiza ni kufupa meya akunwa atu ni tushitu.

¹⁰ Mwanangana Jorame yamba ngwenyi: “Lwangu lwetu mama! Mwene Zambi hatukungulula yetu mianangana atatu hamuwika ha kutwonona kuli Amoabe!”

¹¹ Mwanangana Yehosafate yahula ngwenyi: “Hano kuheshi kama umwe mukwa munanyi yoze mahasa kutuhulila kuli Mwene Zambi, nyi?” Umwe mwata wa tujita twa mwanangana Jorame, yakumbulula ngwenyi: “Elisha mwana wa Jafate hano hali, te kavumbi ka mukwa munanyi Eliya.”

¹² Yehosafate ngwenyi: “Kali mukwa munanyi wamwenemwene.” Mba e mianangana atatu yaaya kuli Elisha.

¹³ Elisha yahula mwanangana wa Israele ngwenyi: “Mumu yika Changutamba kukukwasa. Yako ukahule akwa munanyi waze te tatenu ni noko akuhula.” Jorame yakumbulula ngwenyi: “Ka, hi chocho ko! Mwe Mwene Zambi hatukungulula yetu mianangana atatu hanga mwanangana wa Moabe atunongese.”

¹⁴ Elisha yakumbulula ngwenyi: “Ni mwe Mwene Zambi, yoze nakulingila, nyi ngwe chasele mwanangana wa Yuda vumbi, kachi chahashile kukukwasa nichimwe.

¹⁵ Haliabwila ngutambikilenu umwe njimba.” Muze te mwe njimba anembi chisaji, ndundo ja Mwene Zambi yijihulumukina Elisha.

¹⁶ Neye yamba ngwenyi: “Mwene Zambi kanambe ngwenyi: ‘Fulenu mena mu chana chino cheswe.

¹⁷ Chibwe kunuchi kubwa ni fuji chibwe vula, hindu chana chino muchizala ni meya. Mba yenu, ni ngombe jenu, ni yimuna yenu munubwa ni meya anji a kunwa.’ ”

¹⁸ Elisha yawezaho ngwenyi: “Alioze chino chili chashi kuli Mwene Zambi ha kulinga. Kumanwaha tachi ha kukumba Amoabe.

¹⁹ Kumunukabuba membo jo eswe abema akukoleka, munukapakwila hashi mitondo yo yeswe ya mihuko, ni kushikila mashima jo eswe a meya, ni kwenyeka minda yo yeswe ya chinuno ni kuyilumbika mawe.”

²⁰ Muze hikwacha, ha ola ya kulambula mulambu wa chichamene, ku sali lia Edome yikwiza meya, yaazalisa chana cheswe.

²¹ Muze Amoabe heevwa ngwo, mia nangana atatu heeza ase no jita, tujita eswe a tachi, chize kuli makulwana ndoo kuli akweze, yaatuhuka, yaamanyina ku njiza.

²² Muze hikwacha mitemite ya tangwa yiikwata ha meya, e meya yaachila nge ngwe manyinga.

²³ Amoabe yaamba ngwo: “Aze manyinga! Mianangana waze atatu akwa kole jetu haalishiha ene! Tuyenu hanga tubube musumba wo!”

²⁴ Alioze muze haaheta kwe ku musumba, Aisraele yaasa no jita, yaahilwisa unyimeyime, yaahanga, yaashiha,

²⁵ yaabuzula membo jo. Muze te anabalieka mu minda ya chinuno, Kaisraele mweswe yakonga mo liwe ndoo ni muze minda yeswe yazalile ni mawe. Yaashikila nawa mashima ja meya, yaapakwola mitondo ya mihuko. Ha kusula shina lume limbo linene lia Kire Herese lie liasalile. Akwa kukonga yaalijingilika, yaalimika ni e akwa limbo.

²⁶ Muze mwanangana wa Moabe hamona ngwenyi, kutwakuwa mu jita, yanda tujita 700 akwa mukwale, yeseka kubula mukachi ka tujita twa Edome ni kuchina ku chifuchi cha Siria, alioze kahashile ko.

²⁷ Hohene yanda mwanenyi wa mukulwana, mwe pinga, yamulambula mulambu ha chipanga cha limbo kuli zambi ya Amoabe. Aisraele yeevwa mwongo kuhiana, yaahiluka unyimeyime ku chifuchi cho.