1 MIANANGANA 25 - Mukanda Wa Zambi 1970

Kwenyeka cha Yerusaleme

¹ Zedekia yakatukila mwanangana Nebukanezore wa ku chifuchi cha Babilonia. Kashika Nebukanezore yeza ni tujita twenyi eswe ni kwasa jita ni akwa Yerusaleme, ha tangwa lia muchikumi lia kakweji wa muchikumi ha mwaka wa muchilivwa wa kuyula cha mwanangana Zedekia. Yaajika musumba hehi ni limbo, yaajingilika chipanga cha mawe,

² yaatwama ko ndoo ha mwaka kumi ni kashi wa kuyula cha Zedekia.

³ Ha tangwa lia muchilivwa lia kakweji wa muchiwana wa mwaka uzewene, mu limbo yimubwa zala yinji. Atu yaahona yakulia,

⁴ yaalokola chipanga cha limbo. Chibwe te tujita twa Babilonia kaanajikinyina limbo, hindu tujita twa Ayuda eswe yaachina ha ufuku. Yaabalikila mu chikolo cha hakachi ka yipanga yaali, hehi ni munda wa mwanangana, yaachina nikutalikisa ku chikulo cha Yordau.

⁵ Alioze tujita twa Babilonia yaahanga mwanangana Zedekia, yaamukwachila mu chana hehi ni limbo lia Yeriku. Tujita twenyi eswe yaamuchina.

⁶ Yaatwala Zedekia maha mwanangana Nebukanezore, mu limbo lia Ribla. Kwenako amusopesele kuli Nebukanezore.

⁷ Yaashiha ana ja Zedekia a malunga ku meso jenyi, yaalokola meso ja Zedekia, yaamukasa mu ngoji ja utale, yaamutwala ku Babilone.

Ababilonia yabuzula zuwo lia Zambi

⁸ Ha mwaka kumi ni wa muchilivwa ha tangwa lia muchishimbiali lia kakweji wa muchitano wa kuyula cha mwanangana Nebukanezore mu chifuchi cha Babilonia, Nebuzaradane, mukwa kuyula wa mwanangana kanda mwata wa tujita twenyi, yanjila mu Yerusaleme.

⁹ Yocha zuwo lia Mwene Zambi, ni lia mwanangana, ni mazuwo ja atu alemu eswe a mu limbo.

¹⁰ Tujita twenyi yaabuzula yipanga ya lie limbo.

¹¹ Mba Nebuzaradane yatwala masalila eswe a mu limbo ku chifuchi cha Babilonia, akwa utotombo, ni eswe waze alikunjikile kuli Ababilonia.

¹² Alioze mu Yuda yahichika mo amwe yiswale waze te keeshi ni yuma ya ayo ene, yaaha milimo ya kulima minda ya vinyu ni ya mbuto.

¹³ Ababilonia yaabatwola manguji a unengu a mu zuwo lia Zambi, ni matemba, ni chitende cha unengu, Yaayitwala yeswe ku Babilonia.

¹⁴ Yaambata nawa ndeho, ni yula ya kukombela uto, ni yifuko ya kujimina kahia, ni yenga, ni yikwachilo yeswe ya unengu ya ha chilumbilo.

¹⁵ Yaambata nawa yuma yeswe ya prata ni oru, ni yula, ni milondo.

¹⁶ Yuma ya unengu yize alingile mwanangana Solomone ya mu zuwo lia Zambi, manguji aali, ni matemba, ni chitende, yabwile yilemu kuhiana kuyipezala.

¹⁷ Manguji aali yaabwa chimuwika; kusuhwa cha manguji yichibwa metro nake, yaabwa ni chipangula cha unengu ha songo cha metro yimuwika ni sentimetro makumi atatu. Yachitunga ni kuchiseleka ni unengu nikuchola ni mawundu ja grenade a unengu.

Ababilonia yaatwala Ayuda funge

¹⁸ Chikwo nawa, Nebuzaradane, mwata wa tujita, yatwala mu undungo Seraya mwata wa mahako, ni Zefania yoze te wamuhata, ni akwa lutwe atatu a ku zuwo lia Zambi.

¹⁹ Mu limbo yachiza mo mwe mwata wa tujita, ni akwa kuyula ja mwanangana atano waze asalile, ni mulopo wa mwata wa tuijta yoze te wakusoneka sango ja jita, ni atu akwo alemu makumi asambano.

²⁰ Nebuzaradane yaatwala kuli mwanangana wa Babilonia, ku Ribla,

²¹ mu chifuchi cha Hamate. Kwenako aalambilile ni kwashiha kuli mwanangana. Chenacho achijile Ayuda mu chifuchi cho ni kwatwala mu undungo.

Gedaliya, mukwa kuyula mu Yuda

²² Mwanangana Nebukanezore wa chifuchi cha Babilonia yapwisa Gedaliya, mwana wa Ahikame mujikulu wa Shafane, mukwa kuyula wa Yuda, Yayula atu eswe waze kaatwalile ko mu undungo ku Babilonia.

²³ Muze miata ja tujita twa Yuda ni e tujita two waze alitunyine kulikunjika kuli mwanangana wa Babilonia haachivwa, yaalichinga ni Gedaliya ku limbo lia Mizpa. Miata te wano: Ishmaele mwana wa Netania, ni Johanane mwana wa Karea, ni Seraya mwana wa Tanhumete, wa ku limbo lia Netofa, ni Jezania wa ku chifuchi cha Maka.

²⁴ Gedaliya yaamba ngwenyi: “Kanda nuvwila miata a mu Babilonia woma. Twamenu mu chifuchi chino, lingilenu mwanangana wa Babilonia, mba yuma yeswe muyibwa kanawa.”

²⁵ Alioze ha kakweji wa muchishimbiali ha mwaka uzewene, Ishmaele, mwana wa Natania, mujikulu wa Elishama, te wa ku jiko lia mwanangana, yaya ku Mizpa ni malunga kumi, yaasa jita ni Gedaliya, yaamushiha. Yaashiha nawa Aisraele ni Ababilonia waze abwile hamwe nenyi.

²⁶ Mba Aisraele eswe, pichi ni yiswale, hamwe ni miata ja tujita yaachinyina ku chifuchi cha Egiptu, mumu yeevwila Ababilonia woma.

Abababilonia yajitula Jehoakine

²⁷ Muze Evile Merodake amupwishile mwanangana wa chifuchi cha Babilonia, yalweza Jehoakine mwanangana wa Yuda utu, yamutuhwisa mu zuwo lia lamba. Yuma yino yabwile ha mwaka makumi atatu ni wa muchishimbiali ha tangwa makumi aali ni lia muchishimbiali lia kakweji kumi ni kashi chize haze atwalile mwe Jehoakine mu undungo

²⁸ Evile Merodake yamulingila kanawa, yamusa muhela unene Wahiana mianangana akwo waze abwile mu undungo mu Babilonia.

²⁹ Mba yamutayiza kuzula mahina jenyi a mu zuwo lia lamba ni kulia ku mesa ya mwanangana ha matangwa eswe a mwono wenyi.

³⁰ Ha matangwa eswe a mwono wenyi te kakutambula mbongo alande cheswe chize te anahono.