1 MIANANGANA 24 - Mukanda Wa Zambi 1970

¹ Ha matangwa ja kuyula cha mwanangana Jehoakime, mwanangana Nebukanezore wa chifuchi cha Babilonia yanjila mu chifuchi cha Yuda, yayula ni tachi. Ha miaka yitatu Jehoakime yamwononokena, mwabwamuze yamukatukila.

² Mwene Zambi yatuma mbunga yeka ni yeka ya tujita alimike nenyi hanga onwone Ayuda: Ababilonia, ni Asiria, ni Amoabe, ni Aamone. Yachilinga amanunune maliji waze ambilile tuvumbi twenyi akwa munanyi akalweze atu.

³ Chino chabwile chize Mwene Zambi ambile ha kuhuma Ayuda ku meso jenyi mumu ha yibi yeswe yize mwanangana Manase alingile.

⁴ Chibichibi mumu washihile atu anji waze te keeshi yitela. Mwene Zambi te kahashile kumukonekena Chuma chize.

⁵ Yitanga yikwo ya mwanangana Jehoakime haanayisoneka mu mukanda wa Sango ja Mianangana ja Yuda.

⁶ Jehoakime yafwa, mwanenyi Jehoakine yamuhinga.

⁷ Mwanangana wa Egiptu ni tujita twenyi kaatuhukile ko nawa mu chifuchi cho, mumu ha matangwa waze mwanangana wa Babilonia te hatambula chifuchi cheswe chize chabwile cha Egiptu, chize ku lwiji Ufrateze ndoo ku njiza ya Egiptu ku norde.

Jehoakine, mwanangana wa Yuda

⁸ Jehoakine te habwa ni miaka kumi ni nake muze amupwishile mwanangana wa Yuda, yayula ku Yerusaleme tukweji atatu. Naye te Nehushta, mwana wa Elnatane wa ku Yerusaleme.

⁹ Yembulula ndako ja tato, yavulumuna Mwene Zambi.

¹⁰ Ha matangwa ja kuyula chenyi, tujita twa Babilonia, mu chiyulo cha miata ja tujita twa mwanangana Nebukanezore, yeeza ku Yerusaleme, yaasa jita ni akwa limbo.

¹¹ Muze te achili ko, mwanangana Nebukanezore yeza iye mwene ku Yerusaleme.

¹² Mba mwanangana Jehoakine, hamwe ni naye, ni ana jenyi a malunga, ni e miata jenyi a tujita, ni akwa kuyula a mu zuwo lia mwanangana, yaalikunjika kuli Ababilonia. Ha mwaka wa muchinake wa kuyula cha Nebukanezore yakwata mwe Jehoakine, yamutwala funge.

¹³ Yatwala ku Babilone yuma yeswe ya ndando yinji ya mu zuwo lia Zambi ni ya mu zuwo lia mwanangana. Ngwe chize Mwene Zambi aliangile kuchamba, Nebukanezore yabatwola yikashi yeswe ya oru yize afulile mwanangana Solomone akalinge nayo mu zuwo lia Zambi.

¹⁴ Nebukanezore yatwala akwa Yerusaleme funge, akwa wanangana eswe, ni atu alemu eswe, kwoka cho te 10,000. Yatwala nawa akwa milimo eswe a mana, ni e fuli. Yahichika lume yiswale mu Yuda.

¹⁵ Nebukanezore yatwala Jehoakine funge ku Babilone hamwe ni mwe naye, ni e mapwo jenyi, ni akwa lutwe jenyi, ni miata ja mu Yuda.

¹⁶ Nebukanezore yatwala akwa lufuma eswe, yaya no ku Babilonia. Kwoka cho te 7,000, ni akwa milimo a mana 1,000, kuchinga ni fuli, ni eswe waze te ali ni tachi ha kubwa tujita.

¹⁷ Mba mwanangana Nebukanezore yasalakanyisa Matania tato wa kanuke wa Jehoakine mu muhela wenyi. Jina lienyi yalialumuna ngwenyi, Zedekia.

Zedekia, mwanangana wa Yuda

¹⁸ Zedekia te habwa ni miaka makumi aali ni kashi muze amupwishile mwanangana wa Yuda, yayula ku Yerusaleme miaka kumi ni kashi. Naye te Hamutala, mwana wa Jeremia wa ku limbo lia Libna.

¹⁹ Mwanangana Zedekia yavulumuna Mwene Zambi, ngwe chize alingile mwanangana Jehoakime.

²⁰ Mwene Zambi yevwila akwa Yerusaleme ni Ayuda ufwatulo kuhiana, kashika yaahuma ku meso jenyi.