1 MIANANGANA 23 - Mukanda Wa Zambi 1970

Josia yabuzula yilumbilo ya mahamba

¹ Mwanangana Josia yakungulula miata eswe ja Ayuda ni a Yerusaleme.

² No yaaya ku zuwo lia Zambi, hamwe ni mahako ni akwa munanyi ja Zambi ni atu akwo eswe pichi ni yiswale. Ku meso ja atu mwanangana yatanga mukanda weswe wa Usendo uze te haawana mu zuwo lia Zambi.

³ Mwanangana yamana ku nguji lia wanangana, yakolesa Usendo ni Mwene Zambi amwononokene, ni kufunga Shimbi jenyi ni yiyulo yenyi ni mbunge yenyi yeswe ni mwono wenyi weswe, ni kufunga Usendo nikulita ni Shimbi ja mu mukanda. Atu eswe yaatayiza kufunga we Usendo.

⁴ Mba Josia yambila mwata wa mahako Hilkia, ni mahako waze akumukwasa, ni tufunga a ku chikolo cha zuwo lia Zambi hanga atuhwise mu zuwo lia Zambi yuma yeswe te akuwayila nayo Bale, ni zambi wa pwo Ashera, ni a matongonoshi. Mwanangana yochela yuma yino yeswe haze lia limbo hehi ni chikulo cha Kidrone, mba yalweza atu atwale we uto ku limbo lia Betele.

⁵ Hohene mwanangana yachiza ku milimo mahako waze mianangana ja Yuda asele akalambule milambu ha yilumbilo ya mahamba mu membo ja mu Yuda, ni hehi ni Yerusaleme. Yachiza mahako eswe waze te akulambula milambu kuli Bale, ni ku tangwa, ni ku kakweji, ni ku matongonoshi anene ni akepe.

⁶ Yachiza hamba Ashera ku zuwo lia Zambi, yaamutwala haze lia limbo ku chikulo cha Kidrone, yaamwocha, yaafwenya we uto wenyi, yaaumwangina mukachi ka mafuka.

⁷ Yaabuzula yibatulo ya mu zuwo lia Zambi muze atwamine yitanji a mapwo waze te akutunga mahina a kuwayila no Ashera.

⁸ Yaaneha ku Yerusaleme mahako waze te atwama mu membo ja Ayuda. Yaabuzwola yilumbilo yeswe mu Yuda kuze te akulambwila milambu. Yaabuzwola nawa yilumbilo ya mahamba hehi ni chikolo chize atungile mwata wa limbo Yoshua ku chimeso cha chikolo chinene cha limbo.

⁹ Mahako waze te kaahashile kulinga milimo ya mu zuwo lia Zambi, alioze yaalia mbolo yize te kuyishi yitumbo hamwe ni mahako akwo.

¹⁰ Mwanangana Josia yabuzula nawa Tofete, chilumbilo cha mahamba mu chikulo cha Hinome, hanga niumwe kechi kalambula nawa mwanenyi wa lunga hanji wa pwo kuli zambi Moleke.

¹¹ Yachiza nawa tuvwalu waze te mianangana ja Ayuda akuwayila no tangwa, yocha matemba a uwayilo uze. (Yino te yakubwa mu yiize ya zuwo lia Zambi, hehi ni chikolo ni hehi ni zuwo lia mwata Natane Meleke.)

¹² Yilumbilo yize mianangana ja Ayuda atungile ha fulumba lia zuwo lia mwanangana Ahaze, mwanangana Josia yayibuzwola, hamwe ni yilumbilo yize atungile mwanangana Manase mu maaze aali a ku zuwo lia Zambi. Yabuzwola ye yilumbilo, yayifwenya ni kuyimbila mu chikulo cha Kidrone.

¹³ Mwanangana Josia yabuzwola nawa yilumbilo yize atungile mwanangana Solomone ku chivumbuko cha Yerusaleme, ku sude lia mulundu wa Olive, ya kuwayila mahamba a yizelwokeso: Astarte zambi wa pwo wa limbo lia Sidone, ni Chemoshi zambi ya mu chifuchi cha Moabe, ni zambi ya mu chifuchi cha Amone.

¹⁴ Mwanangana Josia yabuzwola mahamba a mawe, yabalwola mahamba ja Ashera, ni kuze kweswe te aamikine, yaasalakanyisa ho yifwaha ya afu.

¹⁵ Josia yabuzula chilumbilo ha mulundu haze te akuwayila mazambi eka, ku Betele, chize atungile mwanangana Jeroboame mwana wa Nebate, yoze wavulumwishine Aisraele. Josia yabuzula chilumbilo, yachifwenya, yocha nawa mwe hamba Ashera.

¹⁶ Mba Josia yatala sali ni sali, yamona ko amwe mafuka he ha mulundu, yatuma atu hanga ande yifwaha ya mu mafuka ni kuyocha ha chilumbilo. Chenacho achishile che chilumbilo ngwe chize mukwa munanyi ahanjikile shimbu kanda ha chimwe chiwanyino muze te mwanangana Jeroboame kanamana hehi ni chilumbilo. Mwanangana Josia yatala nawa sali ni sali, yamona fuka lia mukwa munanyi yoze walongesele lie longeso lino,

¹⁷ yahula ngwenyi: “Alize fuka liaya?” Atu a mu Betele yaakumbulula ngwo: “Lino lili fuka lia mukwa munanyi yoze wakatukile ku Yuda ni kwambulula yuma yino yena unalingi ku chilumbilo chino.”

¹⁸ Mwanangana ngwenyi: “Liechenu kwalio, yifwaha yenyi yechenu chizechene.” Kashika yifwaha ya mukwa munanyi yoze kaayichijile ko, chibwe yize ya mukwa munanyi yoze wakatukile ku Samaria.

¹⁹ Mu membo eswe a mu Israele mwanangana Josia yabuzwola yilumbilo ha milundu haze te atu akuwayila mazambi eka, yize atungile kuli mianangana ja Israele, yize evwishile nayo Mwene Zambi ufwatulo. Josia yabuzwola yilumbilo yeswe ngwe chize alingile mu Betele.

²⁰ Yashiha mahako eswe a mahamba ha yilumbilo kuze te akulingila, yochacha yifwaha ya afu ha yilumbilo yeswe, mba yahiluka ku Yerusaleme.

Josia yalinga chiwanyino cha Kubalika

²¹ Mwanangana Josia yalweza atu kulinga chiwanyino cha Kubalika akakolese Mwene Zambi, Zambi yo, ngwe chize chasonewene mu mukanda wa Usendo.

²² Chize ku matangwa ja akwa kuyula, mwanangana niumwe wa Israele hanji wa Yuda walingile chiwanyino cha Kubalika ngwe chize.

²³ Alioze ha mwaka kumi ni wa muchinake wa kuyula chenyi mwanangana Josia yalinga chiwanyino chize mu Yerusaleme.

Josia yakomba mu Yerusaleme ni mu Yuda

²⁴ Mwanangana Josia yakomba mu Yerusaleme ni mu chifuchi cha Yuda tahi eswe, ni yuma yeswe yize akwa mavungu akuwayila nayo. Yachilinga akamanunune maliji a Shimbi, waze asonewene mu mukanda uze hako Hilkia awanyine mu zuwo lia Zambi.

²⁵ Ha miaka ya kunyima kukwabwile ko mwanangana yoze walifwa nenyi, yoze walingilile Mwene Zambi ni mbunge yenyi yeswe, ni manyonga jenyi eswe, ni tachi jenyi jeswe, ni kwononokena Shimbi jeswe ja Mose; chibwe kulutwe lienyi kukwabwile ko nawa mukwo walifwa nenyi.

²⁶ Alioze chibwe Josia yalinga yuma yino yeswe, hindu Mwene Zambi yevwile Ayuda ufwatulo ha chize alingile mwanangana Manase.

²⁷ Mwene Zambi ngwenyi: “Mungulinga kuli Ayuda ngwe chize nalingile kuli Aisraele: munguhanga Ayuda ku meso jami, mungulituna Yerusaleme, limbo lize natongwele, ni zuwo liami muze nambile ngwami, atu chaatamba kunguwayila.”

Songo lia kuyula cha mwanangana Josia

²⁸ Yitanga yikwo ya mwanangana Josia haanayisoneka mu mukanda wa Sango ja Mianangana ja Yuda.

²⁹ Muze te Josia kali mwanangana, mwanangana Neko wa ku chifuchi cha Egiptu yatwala tujita twenyi ku lwiji Ufrateze akwase mwanangana wa Asuria. Mwanangana Josia yeseka kukwika tujita twa Egiptu ku limbo lia Megido, alioze yaamushiha mu jita.

³⁰ Akwa lutwe jenyi yaamumbata mu temba, yaamuhilwisa ku Yerusaleme Kwenako amufunjilile mu mafuka ja mianangana. Ayuda yatongola Joahaze mwana wa Josia, yaamuwayisa maji ni kumupwisa mwanangana.

Joahaze, mwanangana wa Yuda

³¹ Joahaze te habwa ni miaka makumi aali ni yitatu muze amupwishile mwanangana wa Yuda, yayula ku Yerusaleme tukweji atatu. Naye te Hamutala, mwana wa Jeremia wa ku limbo lia Libna.

³² Yembulula ndako ja tushakulu twenyi, yavulumuna Mwene Zambi.

³³ Yayula ndoo ni muze Neko, mwanangana wa Egiptu, amutwalile funge ku limbo lia Ribla, mu chifuchi cha Hamate. Mwanangana Neko yafwetesa Ayuda prata kilo 3,400, ni oru kilo makumi atatu ni jiwana.

³⁴ Mwanangana Neko yapwisa Eliakime mwana wa Josia mwanangana wa Yuda nikusalakana Josia, yalumuna jina lienyi, yamuluka ngwenyi: Jehoakime. Alioze Joahaze yamutwala ku Egiptu, kwenako afwilile.

Jehoakime, mwanangana wa Yuda

³⁵ Mwanangana Jehoakime yatambula lijimu kuli atu nikulita ni ubite wo, hanga afunge Shimbi ya kufweta lijimu kuli mwanangana wa Egiptu.

³⁶ Jehoakime te habwa ni miaka makumi aali ni yitano muze amupwishile mwanangana wa Yuda, yayula miaka kumi ni kashi mu Yerusaleme. Naye te Zebida, mwana wa Pedaya wa ku limbo lia Ruma.

³⁷ Yembulula ndako ja tushakulu twenyi, yavulumuna Mwene Zambi.