1 MIANANGANA 22 - Mukanda Wa Zambi 1970

Josia, mwanangana wa Yuda

¹ Josia te habwa ni miaka nake muze amupwishile mwanangana wa Yuda, yayula ku Yerusaleme miaka makumi atatu ni kashi. Naye te Jedida mwana wa Adaya, wa ku limbo lia Bozekata.

² Josia yalinga chize te akuzanga Mwene Zambi, yembulula ndako ja kashakulu kenyi David, yafunga Shimbi Jeswe ja Zambi.

Mukanda wa Shimbi yiusoloka

³ Ha mwaka kumi ni wa muchinake wa kuyula chenyi, Josia yatuma mukwa kusoneka Shafane mwana wa Azalia, mujikulu wa Meshulame, ku zuwo lia Zambi ni maliji wano ngwenyi:

⁴ “Yako kuli Hilkia mwata wa mahako, utambule mukanda wa kwalula cha mbongo jize mahako waze akulinga ku chikolo cha zuwo lia Zambi akutambwola kuli atu.

⁵ Umulweze ahane je mbongo kuli miata waze akutala milimo ya kululieka zuwo lia Zambi. Chaatamba kufweta

⁶ akwa kusonga mabaya, ni kuli tungi, ni akwa kushinguna, ni kulanda mitondo ni mawe akululieka nayo.

⁷ Miata waze akutala ye milimo kaali amwenemwene. Kashika kanda walula mbongo jo.”

⁸ Shafane yakunjika e maliji ja mwanangana kuli Hilkia. Neye yalweza Shafane ngwenyi: “Hitwawana mukanda wa Shimbi mu zuwo lia Zambi.” Hilkia yamwaha Shafane we mukanda, neye yautanga.

⁹ Mba Shafane yahiluka kuli mwanangana, yamulweza ngwenyi: “Tuvumbi twe haanda mbongo ja mu zuwo lia Zambi, haajihana kuli miata waze akutala milimo ya kululieka zuwo lia Zambi.”

¹⁰ Mba yamba nawa ngwenyi: “Hano nguli ni mukanda uze angwahanga Hilkia.” Mba yautanga ku meso ja mwanangana.

¹¹ Muze mwanangana hevwa maliji a we mukanda yatanuna mahina jenyi ni kubihilila.

¹² Mba yambila hako Hilkia, ni Ahikame mwana wa Shafane, ni Akbore mwana wa Mikaya, ni Shafane, mukwa kusoneka, ni Asaya, chikwashi cha mwanangana ngwenyi:

¹³ “Yeenu ni kutuhulila kuli Mwene Zambi, yami ni Ayuda eswe, hakutwala ku maliji ja mukanda uno. Mwene Zambi kanatuvwila ufwatulo mumu tushakulu twetu kaalingile ko nikulita ni maliji ja mukanda uno.”

¹⁴ Chenacho Hilkia, ni Ahikame, ni Akbore, ni Shafane, ni Asaya ayile ni kuhula umwe pwo Hulda, mukwa munanyi yoze te watwama ku chota chaha cha Yerusaleme. (Lunga lienyi Shalume, mwana wa Tikva mujikulu wa Harhasa, te mukwa kufunga mahina a mu zuwo lia Zambi.) Yaamulumbunwina yuma yize yeswe.

¹⁵ Mwe pwo yaalweza ngwenyi: “Hilukenu kuli mwanangana numulweze

¹⁶ maliji wano a kuli Mwene Zambi ngwenyi: ‘Mungumwesa akwa Yerusaleme eswe lamba, ngwe chize chinasonewa mu mukanda uze mwanangana hatanga,

¹⁷ mumu haanangulituna ni haanalambula milambu kuli mazambi eka, haanangwihi hanga ngutenuke ku yeswe yize haanalingi. Ngunevwila akwa Yerusaleme ufwatulo uze kuushi kuhwa.

¹⁸ Alioze hakutwala kuli mwanangana iye mwene, yami Mwene Zambi, Zambi ya Israele, ngunambe ngwami, yena hiwabanjika maliji a mu mukanda,

¹⁹ hiwalumuka ku mbunge, hiwalikehesa ku meso jami nikutanuna mahina je nikulila, muze hiwevwa ngwe chize ngunambe kumwesa akwa Yerusaleme lamba. Limbo lia Yerusaleme mungulipwisa liahululu, atu maalivuluka mu kulishinga cho. Alioze hinevwa kulemba che,

²⁰ kashika chichi kumwesa akwa Yerusaleme lamba ndoo muze yena hiwafwa. Muukafwa ni uhwimino.’ ” Atu yaahiluka, yaalweza mwanangana Josia maliji waze.