1 MIANANGANA 21 - Mukanda Wa Zambi 1970

Manase, mwanangana wa Yuda

¹ Manase te habwa ni miaka kumi ni yaali, muze amupwishile mwanangana wa Yuda, yayula ku Yerusaleme miaka makumi atano ni yitano. Naye te Hefziba.

² Yavulumuna Mwene Zambi, yembulula yizelwokeso ya mavungu waze Mwene Zambi ahumine mu chifuchi kulutwe lia atu jenyi.

³ Yatungulula yilumbilo ha milundu haze te atu akuwayila mazambi eka yize tato Hezekia abuzwile. Yatunga yilumbilo ya kuwayila zambi Bale, yalinga tuponya twa zambi wa pwo Ashera, ngwe chize alingile mwanangana wa Israele Ahabe. Manase yawayila nawa matongonoshi.

⁴ Yatunga yilumbilo ya mazambi eka mwe mu zuwo lia Zambi, haze Mwene Zambi ambile ngwenyi: “Henaho atu maakabwa ni kunguwayila.”

⁵ Mu maaze aali a zuwo lia Mwene Zambi yatunga mo yilumbilo ya kuwayila matongonoshi.

⁶ Yalambula mwanenyi wa lunga mulambu wa kwocha. Yataha ngombo, yapanda wanga, yalinga tufutafuta. Yavulumuna Mwene Zambi kuhiana, yamuvwisa ufwatulo.

⁷ Yamika kaponya wa zambi wa pwo Ashera mu zuwo lia Mwene Zambi, muze Mwene Zambi ambilile David ni mwanenyi Solomone ngwenyi: “Muno mu Yerusaleme, mu zuwo lino, muli muma muze natongwele mukachi ka mavungu kumi ni aali ja Israele muze atu maabwa ni kunguwayila.

⁸ Nyi Aisraele maalinga yuma yeswe yize nambile, ni kufunga Shimbi jami jeswe jize aahele kuli kavumbi kami Mose, mba chichi kutayiza akwa kole jo kwaahuma mu chifuchi chize nahanyine kuli tushakulu two.”

⁹ Alioze Ayuda koononokene ko kuli Mwene Zambi, ni Manase yaavulumwisa kuhiana mavungu waze Mwene Zambi ahumine mu chifuchi kulutwe lia atu jenyi.

¹⁰ Mwene Zambi yambila tuvumbi twenyi akwa munanyi ngwenyi:

¹¹ “Mwanangana Manase halinga yuma yino ya kuzelwokesa, yuma yibi yahiana ya Akanana. Ni mahamba jenyi hashinjika Ayuda kulinga yibi.

¹² Kashika yami Mwene Zambi, Zambi ya Aisraele, mungukamwesa akwa Yerusaleme ni Ayuda lamba linji. Mweswawo makevwa ko makalishimwoka.

¹³ Mungukamwesa akwa Yerusaleme lamba ngwe chize yami nalingile ni akwa Samaria, ngwe chize nalingile nawa kuli Ahabe, I mwanangana wa Aisraele ni vungu lienyi. Mungukakusumuna akwa Yerusaleme ngwe chize mutu akukusumuna chenga ni kuchifulumika.

¹⁴ Waze haasala ni mwono mungukehuka, mungukaakunjika mu moko ja akwa kole jo. Eno maakaakumba ni kububa yuma ya mu chifuchi cho.

¹⁵ Mungukalinga chino kuli atu jami mumu hanangulingi yibi ni hananguvwisa ufwatulo chize kuze tushakulu two atuhukile mu chifuchi cha Egiptu ndoo ni musono.”

¹⁶ Manase yashiha atu anji waze keeshi yitela. Majila ja Yerusaleme yaazala ni manyinga. Yibi yino yayiwezela ku yibi yize yakushinjika Ayuda kukombelela mahamba ni kulingila Mwene Zambi.

¹⁷ Yitanga yikwo ya mwanangana Manase, chinge ni yibi yize alingile, haanayisoneka mu mukanda wa Sango ja Mianangana ja Yuda.

¹⁸ Manase yafwa, yaamufunda mu munda wa mwanangana, te munda wa Uza. Mwanenyi Amone yamuhinga.

Amone, mwanangana wa Yuda

¹⁹ Amone te habwa ni miaka makumi aali ni yaali muze amupwishile mwanangana wa Yuda, yayula mu Yerusaleme miaka yaali. Naye te Meshulemete, mwana wa Haruze wa ku limbo lia Jotba.

²⁰ Ngwe tato Manase, yavulumuna Mwene Zambi.

²¹ Yembulula yitanga ya tato, yakombelela mahamba waze akombelelele tato.

²² Yalituna Mwene Zambi, Zambi ya tushakulu twenyi, yakolema Shimbi ja Mwene Zambi.

²³ Akwa lutwe ja Amone yaamutwama punga, yaamushihila mu zuwo lienyi.

²⁴ Ayuda yaashiha waze ashihile Amone, mba yaapwisa mwanenyi Josia mwanangana.

²⁵ Yitanga yikwo ya mwanangana Amone haanayisoneka mu mukanda wa Sango ja Mianangana ja Ayuda.

²⁶ Amone yaamufunda mu fuka lia mu munda wa Uza. Mwanenyi Josia yamuhinga.