1 MIANANGANA 20 - Mukanda Wa Zambi 1970

Kuyiza ni kuhinduka cha mwanangana Hezekia

¹ Ha matangwa waze mwanangana Hezekia yayiza, te himafwa. Mukwa munanyi Izaya mwana wa Amoze yaya ni kumumeneka, yamwamba ngwenyi: “Mwene Zambi kanakwambe ngwenyi: ‘Lulika yuma ye yeswe kanawa, mumu kuuchi kuhinduka, kumuufwa.’ ”

² Hezekia yatewuluka, yatala kunyima, yaliumba ngwenyi:

³ “Mwene Zambi, iwuluka kama chize hingunakulingila ni mbunge yimuwika ni kushishika; matangwa eswe hinguneseka kulinga chize wakuzanga.” Mba yabutuka kulila chikolo.

⁴ Mukwa munanyi Izaya yakatuka kuli mwanangana, alioze shimbu te kanda achihiana yiize ya mu zuwo lia mwanangana, Mwene Zambi yamwamba ngwenyi:

⁵ “Hiluka kuli Hezekia mukwa kuyula wa atu jami, umwambe ngwe: ‘Yami, Mwene Zambi, Zambi ya kashakulu ke David, hinevwa kuliumba che, hinamona masoji je. Mungukuwuka, mba ha tangwa lia muchitatu muuya ku zuwo lia Zambi.

⁶ Hinakuweza nawa miaka kumi ni yitano ya mwono we. Mungukupulula ni limbo lino lia Yerusaleme ku moko ja mwanangana wa Asuria. Mungufunga limbo lino mumu hali yami mwene ni mumu ha chilakenyo chize nalakenyene kavumbi kami David.’ ”

⁷ Hohene Izaya yambila tuvumbi twa mwanangana ngwenyi, ande mukuyu wa kusohola ase ha hute, mba ahinduke.

⁸ Mwanangana Hezekia yahula ngwenyi: “Chilayi chika muchingulweza ngwo, Mwene Zambi kumanguwuka ni ha tangwa lia muchitatu munguya ku zuwo lia Zambi?”

⁹ Izaya ngwenyi: “Mwene Zambi kumakwaha chilayi chize muchikulweza ngwo, kumamanununa chilakenyo chenyi. Muuzanga chizulie cha ndalo chiye kulutwe yimanyino kumi, hanji chihiluke yimanyino kumi?”

¹⁰ Hezekia ngwenyi: “Chili chashi chizulie kuya kulutwe yimanyino kumi! Achihilwise yimanyino kumi.”

¹¹ Izaya yalemba kuli Mwene Zambi, neye yahilwisa chizulie yimanyino kumi ha ndalo yize atungile mwanangana Ahaze.

Tunganda a ku Babilonia

¹² Ha matangwa waze mwanangana wa chifuchi cha Babilonia, Merodake Baladane, mwana wa Baladane, yevwa ngwo, mwanangana Hezekia kanayiji, mba yamutumina mukanda ni yawana.

¹³ Hezekia yasambilila tunganda waze, yaalweza ubite wenyi: prata, ni oru, ni mbuto, ni maji a vumba libema, ni yitwa yeswe ya jita. Mu mazuwo jenyi a kuswekela kumwasalile ko chimwe Chuma cha mu wanangana wenyi chize kaalwezele ko.

¹⁴ Mba mukwa munanyi Izaya yaya maha mwanangana Hezekia, yamuhula ngwenyi: “Atu waze kulihi anakakatuka? Yika akulwezanga?” Hezekia ngwenyi: “Ku chifuchi kusuku anakakatuka, ku Babilonia.”

¹⁵ Izaya ngwenyi: “Yika amonanga mu zuwo lie?” Hezekia ngwenyi: “Kaamonanga yuma yeswe. Kumwasalile Chuma nichimwe mu mazuwo a kuswekela chize kaamwene.”

¹⁶ Izaya yalweza mwanangana ngwenyi: “Mwene Zambi Mukwa Ndundo Jeswe kanambe ngwenyi:

¹⁷ Tangwa mulikeza lize yuma yeswe ya mu zuwo lie ni yuma yeswe yize aswekele tushakulu twe ndoo ni musono, kumaakaya nayo ku Babilonia. Nichimwe kuchichi kasala.

¹⁸ Atu amwe a ku vungu lia yena mwene kumaakaya no. Maakaatunguna akalinge milimo mu zuwo lia mwanangana wa Babilonia.”

¹⁹ Mwanangana Hezekia, yevwa ulumbunwiso uze, yanyingika ngwenyi, mukubwa uhwimino ha matangwa jenyi. Kashika yakumbulula ngwenyi: “Maliji wano hiwangulweza a kuli Mwene Zambi kaanabeme.”

Songo lia kuyula cha Hezekia

²⁰ Yitanga yikwo ya mwanangana Hezekia, ni hamu lienyi Heswe, ni chize atungile chitende, ni chize abulile jila mu mawe ya kutwala meya mu limbo, yeswe hanayisoneka mu mukanda wa Sango ja Mianangana ja Yuda.

²¹ Hezekia yafwa, mwanenyi Manase yamuhinga.