1 MIANANGANA 2 - Mukanda Wa Zambi 1970

Mukwa munanyi Eliya yazezuka mwilu

¹ Tangwa yiliheta lize Mwene Zambi mazezwisa Eliya mwilu mu chijimbi. Eliya ni Elisha yaakatuka ku limbo lia Gilgale.

² Eliya yambila Elisha ngwenyi: “Sala kuno. Mwene Zambi hangutuma ku limbo lia Betele.” Alioze Elisha yakumbulula ngwenyi: “Ni mwe Mwene Zambi ni mwe yena mwene, chichi kusala nihakepe.” Chenacho ayile ku Betele.

³ Kwenako te kwatwama mbunga ya akwa munanyi ja Zambi. No yeeza ni kuhula Elisha ngwo: “Unanyingika ngwe, Mwene Zambi kumakutambula mwene we musono, nyi?” Elisha ngwenyi: “Ewa ngunanyingika, alioze kanda nwamba mo.”

⁴ Mba Eliya yambila Elisha ngwenyi: “Sala kuno, mumu Mwene Zambi hangutuma ku limbo lia Yeriku.” Alioze Elisha yakumbulula ngwenyi: “Ni mwe Mwene Zambi ni mwe yena mwene, chichi kusala nihakepe.” Chenacho ayile ku Yeriku.

⁵ Kwenako te kwatwama mbunga ya akwa munanyi ja Zambi. No yeeza ni kuhula Elisha ngwo: “Unanyingika ngwe, Mwene Zambi kumakutambula mwene we musono, nyi?” Elisha ngwenyi: “Ewa ngunanyingika, alioze kanda nwamba mo.”

⁶ Mba Eliya yambila Elisha ngwenyi: “Sala kuno, mumu Mwene Zambi hangutuma ku lwiji Yordau.” Alioze Elisha yakumbulula ngwenyi: “Ni mwe Mwene Zambi ni mwe yena mwene, chichi kusala nihakepe.” Chenacho ayile ko.

⁷ Akwa munanyi ja Zambi makumi atano yaakaula ku Yordau. Eliya ni Elisha yaamana ku mbumbulu ya lwiji. E akwa munanyi yaamana kapinji.

⁸ Mba Eliya yanda kazaku kenyi, yamuvunga, yamulamba ha meya. E meya yaahandunuka, mba iye ni Elisha yaazauka hashi homu.

⁹ Muze haazauka, Eliya yambila Elisha ngwenyi: “Ngulweze chize unazange ngukulingile shimbu kanda nguchizezuka.” Elisha ngwenyi: “Ngutayize ungwehe Chihanda cha tachi je chize muchingupwisa pinga ye.”

¹⁰ Eliya yakumbulula ngwenyi: “Chuma chikalu weta. Alioze muuchitambula nyi muungumona haze Zambi manguzezwila. Alioze nyi kuwangumwene, kuuchi kuchitambula.”

¹¹ Shimbu te anayi nikuhanjika, susumuku temba ni tuvwalu a kahia yiza mukachi ko, yiizundula Eliya mwilu mu chijimbi.

¹² Elisha yachimona, yakololoka kuli Eliya ngwenyi: “Tata, tata! Chitunda, hako ya Aisraele! Kuunayi!” Hikamumwene ko nawa. Elisha yevwa chinyengo, yatanuna kazaku kenyi mu yihanda yaali.

¹³ Mba yanda kazaku ka Eliya yoze waholokele, yahiluka, yamana ku mbumbulu ya Yordau,

¹⁴ yalamba kazaku ka Eliya ha meya nikwamba ngwenyi: “Yolihi Mwene Zambi, Zambi ya Eliya?” Yamulamba nawa ha meya, mba meya yaahandunuka, neye yazauka.

¹⁵ Muze akwa munanyi makumi atano a ku Yeriku haamumona, yaamba ngwo: “Elisha habwa ni tachi ja Eliya!” Mba yaaya ni kumubatwiza, yaafulamana ku meso jenyi,

¹⁶ nikwamba ngwo: “Hano tuli malunga makumi atano a tachi. Tutayizenu tuye ni kufupa mwene wenu. Hanji Mwiku wa Mwene Zambi hiwamutwala kweka, hamusa ha mulundu hanji mumwe mu chikulo.” Elisha ngwenyi: “Ka, kanda nuya.”

¹⁷ Alioze yaamushinjila ndoo yaatayiza. Mba e makumi atano yaaya, yaamufupafupa matangwa atatu, alioze kaamumwene ko.

¹⁸ Mba yaahiluka kuli Elisha. Neye te kanaashimbwila ku Yeriku, yaahula ngwenyi: “Chanwambile ngwami, kanda nuya, nyi?”

Yilayi ya Elisha

¹⁹ Amwe malunga a ku Yeriku yaaya kuli Elisha, yaamwamba ngwo: “Mwata, ngwe chize nunanyingika, lino lili limbo libema, alioze meya kali abi, kakuchiza majimo.”

²⁰ Elisha yaamba ngwenyi: “Nehenu mungwa ha chenga chaha.” No yaamunehena wo.

²¹ Neye yaya ku shima lia meya, yamwangina mo we mungwa, yamba ngwenyi: “Mwene Zambi kanambe ngwenyi: ‘Ngunabemesa meya wano, keechi kukoka nawa kufwa hanji kuchiza majimo.’ ”

²² E meya yaabema lume liakulu, ngwe chize ambile Elisha.

²³ Elisha yatuhuka mu Yeriku ni kuya ku Betele. Muze te anayi, amwe ana malunga yaatuhuka mu limbo, yaamuseha, yaakololoka ngwo: “Kanduka mukwa lwole! Kanduka mukwa lwole!”

²⁴ Elisha yatewuluka ni kwatala, yaashinga mu jina lia Mwene Zambi. Hohene yikutuhuka ursu aali a yihwo, yaatanwona ana malunga makumi awana.

²⁵ Elisha yaya ku mulundu wa Karmele, mba yahiluka ku limbo lia Samaria.