1 MIANANGANA 19 - Mukanda Wa Zambi 1970

Mwanangana yahula chiyulo kuli mukwa munanyi Izaya

¹ Muze mwanangana Hezekia hevwa sango jino, yatanuna mahina jenyi ni chinyengo, yazala mwanji, yaya mu zuwo lia Mwene Zambi.

² Mba yatuma Eliakime, kafunga ka zuwo lia wanangana, ni Shebna, mukwa kusoneka, ni makulwana ja mahako kuli mukwa munanyi Izaya mwana wa Amoze. No nawa yaazala mianji.

³ Maliji waze atumine ni kulweza Izaya wano: “Musono lili tangwa lia lamba, kanatusaula, tunevu sonyi. Tuli ngwe pwo yoze unambe kusema, alioze tachi ja kusema jakuhi.

⁴ Mwanangana wa Asuria hatuma mwata wenyi wa lutwe ni kushililika Zambi ya mwono. Mwene Zambi, Zambi ye, evwe kama kushililika chino, amwese lamba waze achamba. Kashika atu jetu waze haasala ho, alembelenu Mwene Zambi.”

⁵ Muze Izaya hevwa maliji ja mwanangana Hezekia,

⁶ yamukumbulula ni liji lia Mwene Zambi ngwenyi: “Kanda wivwila Aasuria woma ha chize anambe ngwo: ‘Mwene Zambi kahashile kunulamwina.’

⁷ Kumevwisa mwanangana wa Asuria amwe maliji waze maamuhilwisa ku chifuchi chenyi, Mwene Zambi makamushihishila ko.”

Asuria yaatoweza nawa Aisraele

⁸ Mwata wa tujita twa Asuria yevwa ngwo, mwanangana wa Asuria hakatuka ku limbo lia Lakishi haya ni kwasa jita ni limbo lia Libna; mba yaya ko ni kumuhula mana.

⁹ Aasuria yeevwa ngwo, mwanangana Tirhaka wa chifuchi cha Sudane kaneza ni tujita twa chifuchi cha Egiptu ni kwasa no jita. Muze mwe mwanangana hachivwa, yatuma mukanda kuli mwanangana Hezekia

¹⁰ wa Yuda, ni kumwamba ngwenyi: “Zambi yoze unajikijila nikwamba ngwe, kuuchi kalimbukila mu moko jami, kanda akwonga.

¹¹ Hiunevu chize mwanangana wa Asuria akulinga ku chifuchi chize anambe kwenyeka. Yena Unanyongo ngwe, muuhasa kulilamwina, nyi?

¹² Ngwami, tushakulu twami haanonona membo ja Gozane, ni Harane, ni Rezefe, ni haanashihi akwa Betedene waze te atwama mu Telasare; mazambi jo kaahashile ko kwakwasa.

¹³ Mianangana a membo ja Hamate, ni Arpade, ni Sefarvaime, ni Hena, ni Iva kuli ali?”

¹⁴ Mwanangana Hezekia yatambula we mukanda kuli tunganda, yautanga. Mba yaya ku zuwo lia Zambi, yazazulula we mukanda ku meso ja Mwene Zambi,

¹⁵ yalemba ngwenyi: “Aa Mwene Zambi, Zambi ya Aisraele, kuwatwama ha chitwamo che helu lia akwa mwono a mwilu, yena uli mwe Zambi wika, kuwakuyula mwanangana eswe a hashi. Yena watangile hashi ni lilu.

¹⁶ Mwene Zambi, tala yize hiyatuwana, Banjika kama maliji eswe waze Senakeribe anahanjika a kukusaula, yena Zambi ya mwono.

¹⁷ Mwene Zambi, yetu eswe tunanyingika chize mwanangana wa Asuria hanonona mavungu anji, hanahichika yifuchi yo yahululu,

¹⁸ hanocho mazambi jo, waze te hi mazambi ko, shina lume mahamba a mitondo ni mawe akusonga ni moko ja atu.

¹⁹ Haliabwila Mwene Zambi, Zambi yetu, tulamwine kama kuli Aasuria, hanga mavungu eswe a hashi anyingike ngwo, Mwene Zambi shina yena wika mwe Zambi.”

Maliji ja Izaya kuli mwanangana

²⁰ Mba mukwa munanyi wa Zambi Izaya yatuma maliji ni kulweza mwanangana Hezekia kumbululo lia Mwene Zambi ku kulemba chenyi,

²¹ ngwenyi: “Yena Senakeribe akwa limbo lia Yerusaleme kaanakusehe, ni kukulelesa.

²² Unanyongo ngwe, iya unasaula ni kulelesa? Hiwangulelesa yami Zambi Munangi wa Aisraele.

²³ Hiwatuma tunganda twe ni kulisamba ngwe: ‘Hinakumba milundu yisuku yahiana ya Libano ni matemba jami. Hinapakula mitondo sedru yisuku yahiana ni mitondo Shipre yibema yahiana, hinaheta mukachi ka usaki.’

²⁴ Hiwalisuta ngwe: ‘Hinafula mashima ni kunwa meya mu yifuchi ya mbala. Yiliato ya tujita twami hiyomisa lwiji Nile.’

²⁵ “Kuma kanda wivwa kama ngwo, yuma yize yeswe hingunayilulika kulu, nyi? Haliabwila mba hinayimanununa. Hingunakwehe tachi ja kukumba membo akukoleka akabwe milumba ya mawe.

²⁶ Atu waze atwama ko te keeshi tachi; yeevwa mwongo, yaalishimwoka. Yaabwa ngwe yambu mu minda, hanji yambu yamokomoko yize yakusoka ha fulumba lia zuwo yize yakulela ni fuji ya ku chivumbuko.

²⁷ “Alioze ngunanyingika yuma yeswe yakutwala kuli yena, yize wakulinga, ni kuze wakuya, ni chize wakunguvwila ufwatulo.

²⁸ Hingunatambula sango ja ufwatulo we ni kulengumuka che. Haliabwila mungusa lowa mu zulu lie, mungusa lwoji wa utale mu kanwa lie, mba mungukuhilwisa mu jila yize wejilile.”

²⁹ Mba mukwa munanyi yambila mwanangana Hezekia ngwenyi: “Chino che chilayi cha yuma yize muyikabwa. Mwaka uno ni uze muwiza ho munukalia lume mbuto ya muzumba, alioze mwaka uze ukwo munukatumba mbuto jenu ni kujibatula, ni kutumba mitondo ya vinyu ni kulia ye mihuko.

³⁰ Ayuda waze maakasala ho maakasokoloka ngwe yibuta yize yinatande miji ni kwima mihuko.

³¹ Mukukabwa atu mu Yerusaleme ni ha mulundu wa Zione waze maakasala ho, mumu Mwene Zambi Mukwa Ndundo Jeswe hanachibatula kulu.

³² “Mwene Zambi yamba hakutwala kuli mwanangana wa Asuria ngwenyi: ‘Kechi kanjila mu limbo lino hanji kukonga mo kamwe ka mwivi. Tujita niamwe keechi kakundama ni kebwe ku limbo; kechi kulumbika ko mulumba ha kulimika ni akwa limbo.

³³ Mwe mwanangana makahiluka mu jila yizeyene ejilile, kechi kunjila mu limbo lino. Yami Mwene Zambi nachamba.

³⁴ Mungufunga limbo lino ni kulilamwina, mumu hali yami mwene ni mumu ha chilakenyo chize nalakenyene kuli kavumbi kami David.’ ”

³⁵ Ha ufuku uzewene kanganda ka Mwene Zambi yaya ku musumba wa Asuria, yashiha tujita 185,000. Muze hikwacha, kuwana eswe haanafu!

³⁶ Mba Senakeribe mwanangana wa Asuria yakatuka, yahiluka ku limbo lia Ninive.

³⁷ Limwe tangwa muze te anawayila mu zuwo lia zambi yenyi Nishoroko, ana jenyi aali a malunga, Adrameleke ni Sharezere, yaamushiha ni mikwale, mba yaachinyina ku chifuchi cha Ararate, Ezare Hadone umwe wa kuli ana jenyi a malunga yamuhinga.