1 MIANANGANA 18 - Mukanda Wa Zambi 1970

Hezekia mwanangana wa Yuda

¹ Ha mwaka wa muchitatu wa kuyula cha mwanangana wa Israele Hoshea mwana wa Ela, Hezekia mwana wa Ahaze, yaamupwisa mwanangana wa Yuda,

² te habwa ni miaka makumi aali ni yitano. Yayula mu Yerusaleme miaka makumi aali ni livwa. Naye te Abija, mwana wa Zakaria.

³ Yembulula ndako ja kashakulu kenyi David, yalinga chize akuzanga Mwene Zambi.

⁴ Yabuzwola yilumbilo ya mahamba ha milundu, yabuzwola yingina ya mawe, yabatwola mahamba ja zambi wa pwo Ashera, yafwenya nawa kapela wa unengu yoze afulile Moze, yoze akuvuluka ngwo, Nehushtana. Ha matangwa waze Aisraele te kaakumulambula yuma ya vumba libema akamulemese.

⁵ Hezekia yafuliela Mwene Zambi, Zambi ya Aisraele. Mu Yuda kumwabwile ko mwanangana ngwe iye, chibwe hatangu chibwe kulutwe lienyi.

⁶ Yabwa mukwa kushishika, kakolemene ko Mwene Zambi. Alioze yafunga Shimbi jeswe kanawa jize Mwene Zambi ahanyine kuli Mose.

⁷ Kashika Mwene Zambi abwile hamwe nenyi, neye yawaha mu yeswe yize te akulinga. Yalimika ni mwanangana wa Asuria, yalituna kubwa chilolo chenyi.

⁸ Yakumba Afilistia yabuba yuma ya mu membo jo, chize ku yihunda ndoo ku membo anene anene, yachinga ko Gaza ni che chifuchi cheswe cha kujingilika.

⁹ Ha mwaka wa muchiwana wa kuyula cha Hezekia, te wa muchishimbiali wa kuyula cha Hoshea mu Israele, mwanangana Shalmanezere wa Asuria yanjila mu Israele, yaseleka limbo lia Samaria.

¹⁰ Ha mwaka wa muchitatu yakumba Samaria. Chino chabwile ha mwaka wa muchisambano wa kuyula cha Hezekia, ni ha mwaka wa muchikumi wa kuyula cha Hoshea.

¹¹ Mwanangana wa Asuria yatwala Aisraele funge mu Asuria: amwe yaatwala mu limbo lia Hala, akwo yaatwala ku lwiji Habore mu chifuchi cha Gozane, akwo mu membo ja mu chifuchi cha Media.

¹² Asuria yaakumba akwa Samaria mumu Aisraele koononokene ko kuli Mwene Zambi, Zambi yo. Yaashiha Usendo uze akolesele hamwe no, yaakolema Shimbi jeswe jize ahanyine kuli Mose, kavumbi ka Mwene Zambi. Kaajibanjikile ko ni kajononokenene ko.

Aasuria yaasaula akwa Yerusaleme

¹³ Ha mwaka kumi ni wa muchiwana wa kuyula cha mwanangana Hezekia, mwanangana Senakeribe wa Asuria yasa jita ni membo akukoleka a mu Yuda, yaakumba.

¹⁴ Hezekia yatuma liji kuli Senakeribe, te kali mu limbo lia Lakishi, ngwenyi: “Hinavulumuna nalemba, litwaminenu kama kwasa jita, mungufweta cheswacho munwita.” Senakeribe yakumbulula Hezekia ngwenyi, amutumine kilo 10,000 ja prata ni kilo 1,000 ja oru.

¹⁵ Hezekia yamutumina prata jeswe ja mu zuwo lia Zambi ni ja mu zuwo lia mwanangana.

¹⁶ Yachiza nawa oru ya ku yajilo ya zuwo lia Zambi ni oru yize iye mwene alamiekene ku yikolo, yayituma yeswe kuli Senakeribe.

¹⁷ Mba mwanangana wa Asuria, ku Lakishi, yatuma tujita anji ni kwasa jita ni Yerusaleme. Tujita yaabwa mu chiyulo cha miata jenyi atatu a lufuma. Muze haheta ku Yerusaleme, yatambula jila kuze te akwa kutunga mahina akulingila milimo yo, ku kapila yoze wakuneha meya a ku chitende cha ku tunda.

¹⁸ Yaatuma mutu ni kutambika mwanangana Hezekia. Neye yatuma miata atatu ni kwabatwiza: Eliakime mwana wa Hilkia, kafunga ka zuwo lia mwanangana; ni Shebna, mukwa kusoneka milonga; ni Joa mwana wa Asafe, mukwa kusoneka sango.

¹⁹ Umwe wa kuli miata ja Asuria yamba ngwenyi: “Mwanangana kanazange kunyingika mumu yika mwanangana Hezekia unajikiza chichize.

²⁰ Nunanyongo ngwenu, maliji wika maakwasa ngwe mana ni tachi ja tujita, nyi? Iya nunanyongo ngwenu, manukwasa ni kukatukila Asuria?

²¹ Nunajikijila hali akwa Egiptu akanukwase. Alioze chili ngwe lukanda wa lumbungu yoze mutu anajikijila ha kwenda nenyi. Nyi wa makuka, malemeka kwoko lienyi. Chenacho abwa mwanangana wa Egiptu kuli waze maamujikijila.”

²² Mwata wa tujita yaweza ho ngwenyi: “Hanji munungwamba ngwenu, nunajikijila hali Mwene Zambi, Zambi yenu, nyi? Ngwami, yili yilumbilo ya Mwene Zambi yize Hezekia abuzwile, muze ambile Ayuda ni akwa Yerusaleme kuwayila lume ku chilumbilo cha mu Yerusaleme.

²³ Mungunulingila Chuma chibema mu jina lia mwanangana wa Asuria. Mungunwaha tuvwalu 2,000 nyi munuhasa kumona malunga waze mendela ho!

²⁴ Yenu kunwahashile kukumba chibwe mwata mukepe wa hakachi ka Asuria, alioze nwakujikijila hali akwa Egiptu kunutumina matemba ni akwa tuvwalu.

²⁵ Nunanyongo ngwenu, Mwene Zambi kangukwashile ni kwasa jita mu chifuchi chenu ni kuchenyeka, nyi? Mwene Zambi mwe wangwambile kulimika nenu ni kwenyeka che chifuchi.”

²⁶ Mba Eliakime, ni Shebna, ni Joa yaambila mwe mwata ngwo: “Mwata hanjikenu kama mu arame. Twakulivwa. Kanda nutuhanjikisa mu hebreu. Nyi ka, atu eswe ha chipanga maalivwa.”

²⁷ Mwata ngwenyi: “Kuma yenu nunanyongo ngwenu, mwanangana kanakangutuma kuhanjika yuma yino yeswe shina kuli yenu ni mwanangana wenu, nyi? Ka, ngunahanjika nawa kuli waze atwama ha chipanga, waze maakalia tuji two ni maakanwa masuso jo, ngwe yenu.”

²⁸ Mba mwe mwata yakatuka, yakololoka mu hebreu ngwenyi: “Banjikenu chize mwanangana wa Asuria anambe!

²⁹ Kananukanyamisa ngwenyi, kanda nutayiza Hezekia kunwonga. Hezekia kahashile kunulamwina.

³⁰ Kanda anupiangula ni kujikijila hali Mwene Zambi. Kanda nunyonga ngwenu, Mwe ne Zambi manulamwina. Hanji ngwenu, Mwene Zambi makanjisa tujita twetu kutambula limbo lino.

³¹ Kanda nubanjika Hezekia! Mwanangana wa Asuria kanambe ngwenyi: tuhukenu mu limbo, likunjikenu kuli iye. Yenu eswe munuhasa kulia mihuko yenu ya vinyu, ni ya mikuyu, ni kunwa meya a mu mashima jenu,

³² ndoo mwanangana makanutwala mu chifuchi ngwe chino cha yenu, kuze kuli minda ya kukama vinyu, ni mbuto ya kulinga mbolo. Chili chifuchi cha olive ni maji a olive, ni wuchi. Nyi ngwe nwalinga chize mwanangana ananwambe, kunuchi kafwa. Kanda nutayiza Hezekia kunwonga ngwenyi, Mwene Zambi makanulamwina.

³³ Kuli umwe zambi wa ku chifuchi chikwo yoze hanalamwina atu jenyi ku moko ja mwanangana wa Asuria, nyi?

³⁴ Mazambi ja membo ja Hamate ni Arpade kulihi ali? Ni a membo ja Sefarvaime, ni Hena, ni Iva alihi? Umwe hanalamwina kama akwa Samaria, nyi?

³⁵ Tangwa lika mazambi a ku yifuchi yino yeswe haanalamwina kama yifuchi yo kuli mwanangana wetu? Mba ngwe kuchi nunanyongo ngwenu, Mwene Zambi mahasa kulamwina Yerusaleme?”

³⁶ Alioze atu yaahola lume kuluu, ngwe chize mwanangana Hezekia aalwezele; kaahanjikile ko liji nilimwe.

³⁷ Henaho Eliakime, ni Shebna, ni Joa yaatanuna mahina jo ni chinyengo, yaatwala sango kuli mwanangana Hezekia jize ahanjikile mwata wa tujita twa Asuria.