1 MIANANGANA 16 - Mukanda Wa Zambi 1970

Ahaze, mwanangana wa Yuda

¹ Ha mwaka kumi ni wa muchishimbiali wa kuyula cha mwanangana wa Israele Peka, mwana wa Ramalia, Ahaze, mwana wa Jotame, yaamupwisa mwanangana wa Yuda,

² te habwa ni miaka makumi aali. Yayula ku Yerusaleme miaka kumi ni yisambano. Kembulwile ko ndako jibema ja kashakulu kenyi mwanangana David; alioze yalinga chize Mwene Zambi, Zambi yenyi keshi kuzanga.

³ Yembulula ndako ja mianangana ja Israele. Chibwe mwanenyi mwene yamulambula mulambu wa kwocha kuli mahamba, nikwimbulula yizelwokeso ya atu waze Mwene Zambi ahumine mu chifuchi kulutwe lia Aisraele.

⁴ Ahaze yalambwila mazambi eka milambu ya kwocha ni ya vumba libema ha milundu, ni mushi lia mitondo yeswe ya wisu.

⁵ Mwanangana Rezine wa Siria ni mwanangana Peka wa Israele yaasa jita ni akwa Yerusaleme, alioze Ahaze kaamukumbile ko.

⁶ (Ha matangwa waze ene mwanangana wa Edome yatambula nawa limbo lia Elate, yahuma Ayuda waze te atwama mo. Aedome yaanjila mu Elate, yaatwama mo ndoo ni musono.)

⁷ Ahaze yatuma atu kuli Tiglate Pilesere, mwanangana wa Asuria, ni liji lino ngwenyi: “Yami nguli mwanenu kanda kavumbi kenu. Tweyenu hanga nungulamwine kama kuli mianangana ja Siria ni Israele, waze haangujingilika.”

⁸ Ahaze yanda prata ni oru ya mu zuwo lia Zambi ni ya mu zuwo lia mwanangana, yaayituma milambu kuli mwanangana wa Asuria.

⁹ Tiglate Pilesere yalinga nikulita ni liji lia Ahaze, yaya ni tujita twenyi ku limbo lia Damasku, yaakumba, yaashiha mwanangana Rezine, yaatwala atu funge ku Kire.

¹⁰ Muze mwanangana Ahaze ayile ku Damasku ni kutakana ni mwanangana Tiglate Pilesere, yamona ko chilumbilo, yatuma chizulie cha chilumbilo ni yeseko yacho yeswe kuli hako Uria.

¹¹ Mba Uria yatunga chilumbilo ngwe chize amulwezele, yahanga kuchimanuna shimbu te Ahaze kanda achiheta.

¹² Ahaze yakatuka ku Damasku, mba muze haheta ku Yuda yawana che chilumbilo hichahwa.

¹³ Yalambula ho milambu ya kwocha ya yimuna ni ya mbuto, yazujila ho mulambu wa vinyu ni mulambu wa manyinga wa kulivwa ni Zambi.

¹⁴ Chilumbilo cha unengu cha Mwene Zambi yichibwa hakachi ka chilumbilo chaha ni zuwo lia Zambi. Alioze Ahaze yachisa ku sali lia norde lia chilumbilo chenyi chaha.

¹⁵ Mba yambila Uria ngwenyi: “Lambwila ha chilumbilo chino chinene cha yami milambu ya kwocha ya chichamene ni milambu ya mbuto ya chingoloshi, ni milambu ya kwocha ni ya mbuto ya mwanangana ni ya atu, ni milambu ya vinyu ya atu. Muuzujila ho manyinga ja yimuna yeswe yize haalambula. Alioze ngufungile chilumbilo cha unengu hanga ngubwe ni kuhulila ko Zambi.”

¹⁶ Uria yalinga nikulita ni maliji ja mwanangana.

¹⁷ Mwanangana Ahaze yaajitwola matemba waze te akulinga no mu zuwo lia Zambi, yachiza lumbashila lwa ha matemba waze. Yachiza nawa chitende cha unengu helu lia makuji a ngombe kumi ni aali, yachisa ha chimanyino cha mawe.

¹⁸ Ha kuwahisa mwanangana wa Asuria, Ahaze yachiza nawa chimanyino cha mwanangana mu zuwo lia Zambi, yajika chajilo cha mwanangana cha kunjilila mu zuwo lia Zambi.

¹⁹ Yitanga yikwo ya mwanangana Ahaze haanayisoneka mu mukanda wa Sango ja Mianangana ja Yuda.

²⁰ Ahaze yafwa, yaamufunda mu mafuka ja mianangana mu Limbo lia David. Mba mwanenyi Ezekia yamuhinga.