1 MIANANGANA 15 - Mukanda Wa Zambi 1970

Uzia, mwanangana wa Yuda

¹ Ha mwaka makumi aali ni wa muchishimbiali wa kuyula cha Jeroboame wa muchaali wa Israele, Uzia mwana wa Amazia yaamupwisa, mwanangana wa Yuda,

² te habwa ni miaka kumi ni yisambano. Yayula ku Yerusaleme miaka makumi atano ni yaali. Naye te Jekolia wa ku Yerusaleme.

³ Uzia yembulula tato, yalinga chize akuzanga Mwene Zambi.

⁴ Chibwe chocho kabuzwile ko yilumbilo ha milundu haze te atu akuwayila mazambi eka. Te maachilambwila ho milambu ni kwocha yuma ya vumba libema.

⁵ Mwene Zambi yalamba Uzia ni musongo ukalu wa ha chikowa (hanji mbumba) yabwa nawo ndoo ni ku kufwa chenyi. Yatwama mu zuwo ukawenyi, mba mwanenyi Jotame yayula chifuchi.

⁶ Yitanga yikwo ya mwanangana Uzia haanayisoneka mu mukanda wa Sango ja Mianangana ja Yuda.

⁷ Uzia yafwa, yaamufunda mu mafuka ja mianangana mu Limbo lia David. Mba mwanenyi Jotame yamuhinga.

Zakaria, mwanangana wa Israele

⁸ Ha mwaka makumi atatu ni wa muchinake, wa kuyula cha Uzia mwanangana wa Yuda, Zakaria mwana wa Jeroboame wa muchaali yaamupwisa mwanangana wa Israele, yayula ku limbo lia Samaria tukweji asambano.

⁹ Yavulumuna Mwene Zambi ngwe tushakulu twenyi. Yembulula ndako jibi ja mwanangana Jeroboame mwana wa Nebate, yoze wavulumwishine Aisraele.

¹⁰ Shalume mwana wa Jabeshe yamutwama punga, yamushiha mu limbo lia Ibleame, mba yamuhinga.

¹¹ Yitanga yikwo ya mwanangana Zakaria haanayisoneka mu mukanda wa Sango ja Mianangana ja Israele.

¹² Chenacho chamanunukine chilakenyo cha Mwene Zambi kuli Jehu ngwenyi: “Vungu lie, maakabwa mianangana mu Israele ndoo ku Chisemuko cha muchiwana.”

Shalume, mwanangana wa Israele

¹³ Ha mwaka makumi atatu ni wa muchilivwa wa kuyula cha Uzia mwanangana wa Yuda, Shalume mwana wa Jabeshe yaamupwisa mwanangana wa Israele, yayula ku limbo lia Samaria kakweji umuwika.

¹⁴ Menaheme mwana wa Gadi yakatuka ku limbo lia Tirza yeza ku Samaria, yashiha Shalume, mba yamuhinga.

¹⁵ Yitanga yikwo ya mwanangana Shalume, ni punga yenyi, haanayisoneka mu mukanda wa Sango ja Mianangana ja Israele.

¹⁶ Menaheme muze hakatuka ku Tirza, mu jila yenyeka liakulu limbo lia Tapwa ni yihunda ya kusulangana, yonona e atu jamo, yabulabula tufumbakaji eswe, mumu te kaasolo kumutayiza kubwa mwanangana.

Menaheme, mwanangana wa Israele

¹⁷ Ha mwaka makumi atatu ni wa muchilivwa wa kuyula cha Uzia mwanangana wa Yuda, Menaheme, mwana wa Gadi, yaamupwisa mwanangana wa Israele, yayula ku Samaria miaka kumi.

¹⁸ Yavulumuna Mwene Zambi, yembulula ndako jibi ja Jeroboame mwana wa Nebate, yoze wavulumwishine Aisraele ndoo ni ku kufwa chenyi.

¹⁹ Tiglate Pilesere, mwanangana wa Asuria, yanjila mu Israele. Mba Menaheme yamwaha mbongo ja prata kilo 34,000 hanga amukwase mu wanangana.

²⁰ Mwe Menaheme yatambwola mbongo jize kuli pichi ni tachi, mutu mweswe yahana mbongo ja prata makumi atano. Kashika Tiglate Pilesere yahiluka ku chifuchi chenyi.

²¹ Yitanga yikwo ya mwanangana Menaheme haanayisoneka mu mukanda wa Sango ja Mianangana ja Israele.

²² Menaheme yafwa yaamufunda. Mba mwanenyi Pekahia yamuhinga.

Pekahia, mwanangana wa Israele

²³ Ha mwaka makumi atano wa kuyula cha Uzia mwanangana wa Yuda, Pekahia, mwana wa Menaheme, yaamupwisa mwananga wa Israele, yayula miaka yaali ku limbo lia Samaria.

²⁴ Yavulumuna Mwene Zambi, yembulula ndako jibi ja Jeroboame mwana wa Nebate, yoze wavulumwishine Aisraele.

²⁵ Peka, mwana wa Remalia umwe mwata wa tujita twa mwanangana Pekahia, hamwe ni malunga makumi atano a ku chifuchi cha Gileade, yatwama mwanangana punga. No yaamushihila ku Samaria mu zuwo lienyi mu chibatulo cha kukoleka. Mba mwe Peka yamuhinga.

²⁶ Yitanga yikwo ya Pekahia, haanayisoneka mu mukanda wa Sango ja Mianangana ja Israele.

Peka, mwanangana wa Israele

²⁷ Ha mwaka makumi atano ni wa muchaali wa kuyula cha Uzia mwanangana wa Yuda, Peka mwana wa Remalia, yaamupwisa mwanangana wa Israele, yayula ku limbo lia Samaria miaka makumi aali.

²⁸ Yavulumuna Mwene Zambi, yembulula ndako jibi ya mwanangana Jeroboame mwana wa Nebate, yoze wavulumwishine Aisraele.

²⁹ Ha matangwa ja Peka mwanangana wa Israele, Tiglate Pilesere mwanangana wa Asuria, yatambula membo ja Ijone, ni Abele Bete Maka, ni Janoa, ni Kedeshe, ni Hazore, ni yifuchi ya Gileade, ni Galilea, ni Naftali, yaakwata atu, yaatwala funge mu chifuchi cha Asuria.

³⁰ Ha mwaka makumi aali wa kuyula cha Jotame mwana wa Uzia, mwanangana wa Yuda, Hosea mwana wa Ela yatwama Peka punga, yamushiha. Mba yalipwisa mwanangana.

³¹ Yitanga yikwo ya mwanangana Peka, haanayisoneka mu mukanda wa Sango ja Mianangana ja Israele.

Jotame, mwanangana wa Yuda

³² Ha mwaka wa muchaali wa kuyula cha Peka wa Israele, Jotame mwana wa Uzia, yaamupwisa mwanangana wa Yuda.

³³ Te habwa ni miaka makumi aali ni yitano, yayula mu Yerusaleme miaka kumi ni yisambano. Naye te Jerusha, mwana wa Zadoke.

³⁴ Jotame yembulula ndako ja tato Uzia, yalinga chize akuzanga Mwene Zambi.

³⁵ Chibwe chocho kabuzwilo ko yilumbilo ha milundu haze te atu akuwayika mazambi eka. Te maachilambwila ho milambu ni kwocha yuma ya vumba libema. Jotame mwe watungile chikolo cha Norde cha ku zuwo lia Zambi.

³⁶ Yitanga yikwo ya mwanangana Jotame haanayisoneka mu mukanda wa Sango ja Mianangana ja Yuda.

³⁷ Ha matangwa ja kuyula cha Jotame, Mwene Zambi chisuho chitangu yatuma mwanangana Rezine wa Siria ni Peka wa Israele akase jita ni Ayuda.

³⁸ Jotame yafwa, yaamufunda mu mafuka ja mianangana mu Limbo lia David. Mba mwanenyi Ahaze yamuhinga.