1 MIANANGANA 14 - Mukanda Wa Zambi 1970

Amazia, mwanangana wa Yuda

¹ Ha mwaka wa muchaali wa kuyula cha Jehoashe, mwana wa Jehoahaze, mwanangana wa Israele, Amazia mwana wa Joashe yaamupwisa mwanangana wa Yuda.

² Te habwa ni miaka makumi aali ni yitano. Yayula ku Yerusaleme miaka makumi aali ni livwa. Naye te Jehoadine wa ku Yerusaleme.

³ Yalinga chize akuzanga Mwene Zambi, hindu hi ngwe kashakulu kenyi mwanangana David ko, alioze yalinga ngwe chize alingile tato Joashe.

⁴ Kabuzwile ko yilumbilo ha milundu haze te atu akuwayila mazambi eka. Te maachilambwila ho milambu ni kwocha yuma ya vumba libema.

⁵ Muze hatakama mu wanangana wenyi, Amazia yashiha akwa kuyula waze ashihile tato.

⁶ Alioze kashihile ko ana jo, yafunga Shimbi ja Mose jize amuhele kuli Mwene Zambi ngwenyi: “Kuchatambile kushiha yisemi mumu ha milonga ya ana, ni ana kanda nwashiha mumu ha milonga ya yisemi. Chatamba kushiha mutu mumu ha mulonga wenyi mwene.”

⁷ Amazia yashiha tujita a mu chifuchi cha Edome 10,000 mu chikulo cha Mungwa. Yakumba limbo lia Sela, yaliluka jina ngwenyi: Joktale. Jina lino lili ndoo ni musono.

⁸ Hohene Amazia yatumina Jehoashe, mwanangana wa Israele, tunganda nikwamba ngwenyi: “Twasenu jita.”

⁹ Alioze mwanangana Jehoashe yamukumbulula ngwenyi: “Limwe tangwa mungonga wa ku milundu ya Libano yiutuma liji ku mutondo sedru ngwenyi: ‘Hangisa mwane kuli mwanami hanga amumbate.’ Alioze yikwiza umwe ngongo, yaliachila mungonga hashi.

¹⁰ Amazia yena hiwakumba Aedome, mbunge ye yinalengumuka. Hwima mbunge, twama kanawa ku mahie. Mumu yika unalikokela mulonga ni kulimwesa lamba yena ni atu je.”

¹¹ Alioze Amazia kabanjikile ko. Kashika mwanangana Jehoashe yatuhuka hamwe ni tujita twenyi, yaasa jita ni Amazia ku limbo lia Bete Shemeshe.

¹² Aisraele yaakumba Ayuda, no yaachinyina ku mahio.

¹³ Jehoashe yakwata Amazia, yaya nenyi ku Yerusaleme. Kwenako yabuzula chipanga cha limbo, chize ku chikolo cha Efraime ndoo ku chikolo cha Mbango, kusuhwa metro ngwe 200.

¹⁴ Yabuba prata ni oru yeswe yize awanyine ko, ni yikashi yeswe ya mu zuwo lia Zambi, ni ubite weswe wa mu zuwo lia mwanangana, yaya nayo ku Samaria. Yatwala nawa funge.

¹⁵ Yitanga yikwo ya mwanangana Jehoashe ni hamu lienyi mu jita ni Amazia mwanangana wa Yuda, haanayisoneka mu mukanda wa Sango ja Mianangana ja Israele.

¹⁶ Jehoashe yafwa, yaamufunda mu mafuka ja Mianangana mu Samaria. Mwanenyi Jeroboame wa muchaali yamuhinga.

Kufwa cha mwanangana Amazia

¹⁷ Muze te mwanangana Jehoashe wa Israele hafwa, Amazia mwanangana wa Yuda yatwama nawa ni mwono miaka kumi ni yitano.

¹⁸ Yitanga yikwo ya mwananangana Amazia haanayisoneka mu mukanda wa Sango ja Mianangana ja Yuda.

¹⁹ Mu Yerusaleme atu yaatwama punga ya kushiha Amazia, kashika Amazia yachinyina ku limbo lia Lakishi Alioze akwa kole jenyi yaamukaula, yaamushiha.

²⁰ Yaamuhilwisa ku Yerusaleme ha kavwalu, yaamufunda mu mafuka ja mianangana mu Limbo lia David.

²¹ Ayuda yaapwisa Uzia mwanangana, te habwa ni miaka kumi ni yisambano.

²² Muze tato hafwa, Uzia yakumba limbo lia Elate, yalitungulula.

Jeroboame wa muchaali mwanangana wa Israele

²³ Ha mwaka kumi ni wa muchitano wa kuyula cha Amazia mwana wa Joashe mwanangana wa Yuda, Jeroboame mwana wa Jehoashe yaamupwisa mwanangana wa Israele, yayula ku limbo lia Samaria miaka makumi awana ni kashi

²⁴ Yavulumuna Mwene Zambi, yembulula ndako jibi ja kashakulu kenyi Jeroboame, mwana wa Nebate, yoze wavulumwishine Aisraele.

²⁵ Yakumba chifuchi cheswe chize chabwile cha Israele hatangu, chize ku jila Hamate mukachi ka milundu ndoo ku chitende cha Kufwa ku sude. Chifuchi chize cheswe Mwene Zambi, Zambi ya Aisraele, hanachilakenya kuli kavumbi kenyi mukwa munanyi Jona mwana wa Amitai, wa ku limbo lia Gate Hefere.

²⁶ Mwene Zambi yamona lamba liahiana lia Aisraele. Niumwe kabwile ko ha kwakwasa.

²⁷ Alioze Mwene Zambi kanyongene ko akakuwise vungu lia Israele, kashika yaalamwina ku tachi ja mwanangana Jeroboame wa muchaali.

²⁸ Yitanga yikwo ya mwanangana Jeroboame wa muchaali, ni hamu lienyi lia kwasa jita, ni chize ahilwishile Damasku ni Hamate kuli Aisraele, yeswe haanayisoneka mu mukanda wa Sango ja Mianangana ja Israele.

²⁹ Jeroboame wa muchaali yafwa, yaamufunda mu mafuka ja mianangana. Mwanenyi Zakaria yamuhinga.