1 MIANANGANA 13 - Mukanda Wa Zambi 1970

Jehoahaze, mwanangana wa Israele

¹ Ha mwaka makumi aali ni wa muchitatu wa kuyula cha Joashe mwana wa Ahazia, mwanangana wa Yuda, Jehoahaze mwana wa Jehu yaamupwisa mwanangana wa Israele, yayula mu limbo lia Samaria miaka kumi ni shimbiali.

² Yalinga ngwe chize alingile mwanangana Jeroboame, yavulumuna Mwene Zambi, yavulumwisa nawa Aisraele. Kechele ko yitanga yenyi yibi.

³ Kashika Mwene Zambi yatenukina Aisraele, yaakunjika mu moko ja Hazaele ni mwanenyi Benhadade, mianangana ja Siria hanga aakumbe nawa ni nawa mu jita.

⁴ Alioze Jehoahaze yalemba kuli Mwene Zambi. Neye yamona lamba lize mwanangana wa Siria amwesene Aisraele, yevwa kulemba chenyi.

⁵ Kashika Mwene Zambi yaatumina umwe chilamwina, yoze waalamwinyine kuli Asiria. Mba Aisraele yaatwama mu uhwimino ngwe hatangu.

⁶ Alioze chibwe chocho keechele ko yitanga yize mwanangana Jeroboame avulumwishine nayo Aisraele, yaanyongonona mo. Kaachijile ko hamba wa pwo Ashera mu Samaria.

⁷ Jehoahaze kabwile ko ni tujita shina lume makumi atano waze akwenda ha tuvwalu, ni akwa kwenda hashi 10,000 ni matemba a jita kumi, mumu mwanangana wa Siria yanongesa akwo eswe, yaafwita ngwe fufuta ya hashi.

⁸ Yitanga yikwo ya mwanangana Jehoahaze ni hamu lienyi Heswe, haanayisoneka mu mukanda wa Sango ja Mianangana ja Israele.

⁹ Yafwa, yaamufunda mu Samaria. Mwanenyi Jehoashe yamuhinga.

Jehoashe, mwanangana wa Israele

¹⁰ Ha mwaka wa makumi atatu ni wa muchishimbiali wa kuyula cha Joashe mwanangana wa Yuda, Jehoashe mwana wa Jehoahaze yaamupwisa mwanangana wa Israele, yayula ku limbo lia Samaria miaka kumi ni yisambano.

¹¹ Neye nawa yavulumuna Mwene Zambi, yembulula ndako jibi ja mwanangana Jeroboame, yoze wavulumwishine Aisraele.

¹² Yitanga yikwo ya Jehoashe, ni hamu lienyi mu jita ni Amazia mwanangana wa Yuda, haanayisoneka mu mukanda wa Sango ja Mianangana ja Israele.

¹³ Jehoashe yafwa, yaamufunda mu mafuka ja mianangana mu Samaria. Mwanenyi Jeroboame wa muchaali yamuhinga.

Kufwa cha mukwa munanyi Elisha

¹⁴ Mukwa munanyi Elisha yayiza musongo wa kufwa. Muze te anabombo, mwanangana Jehoashe wa Israele yaya ni kumumeneka. Yalila ngwenyi: “Mama tate, mama tate! Chitunda cha Aisraele!”

¹⁵ Mwe Elisha yambila mwanangana Jehoashe ngwenyi: “Anda uta ni yimwe mivwi,” Jehoashe yayanda.

¹⁶ Elisha yamwamba akwate uta. Mwanangana yalinga Chenacho. Elisha yasa moko jenyi ha moko ja mwanangana.

¹⁷ Mba nikulita ni maliji ja mukwa munanyi, mwanangana yazulula kapenda ku sali lia Siria. Elisha yamwamba ngwenyi: “Konga mwivi!” Neye yaukonga. Elisha ngwenyi: “Yena uli mwivi wa Mwene Zambi; ni yena Mwene Zambi makakumba Asiria. Muukasa jita ni Asiria mu limbo lia Afeke ndoo ni muze hiwaakumba.”

¹⁸ Hohene Elisha yambila mwe mwanangana ande mivwi yikwo ayilambe hashi. Mwanangana yayilamba hashi yisuho yitatu, mba yalitwamina.

¹⁹ Elisha yevwa wuli, yambila mwanangana ngwenyi: “Te Chakutamba kulamba mivwi hashi yisuho yitano hanji yisambano ukakumbe Asiria liakulu, alioze haliabwila muwakumba shina lume yisuho yitatu.”

²⁰ Elisha yafwa, yaamufunda. Amoabe te kaakunjila mu Israele mwaka ha mwaka ni kwasa jita.

²¹ Limwe tangwa muze atu anafundu umwe mutu, yaamona mbunga ya tujita twa Moabe kaaneza. Mba yambila mwe mufu mu fuka lia Elisha. Mwe mufu yahinduka, yamana, yabwa nawa ni mwono.

Jita hakachi ka Aisraele ni Asiria

²² Hazaele mwanangana wa Siria yabinjisa Aisraele matangwa eswe a kuyula cha Jehoahaze,

²³ alioze Mwene Zambi yeevwila Aisraele keke. Kazangile ko aanongese, alioze yaakwasa mumu ha Usendo wenyi ni Abrahama, ni Isake, ni Yakoba. Kavulamine ko atu jenyi.

²⁴ Muze Hazaele mwanangana wa Siria hafwa, mwanenyi Benhadade yamuhinga.

²⁵ Hohene mwanangana Jehoashe wa Aisraele yakumba Benhadade yisuho yitatu, yatambula membo waze atambwile Benhadade ha mwaka wa kuyula cha Jehoahaze, tato ya Jehoashe.