1 MIANANGANA 12 - Mukanda Wa Zambi 1970

Joashe, mwanangana wa Yuda

¹ Ha mwaka wa muchishimbiali wa kuyula cha Jehu mwanangana wa Israele, Joashe yaamupwisa mwanangana wa Yuda, yayula ku Yerusaleme miaka makumi awana. Naye te Zibia wa ku limbo lia Bersheba.

² Ha matangwa eswe a mwono wenyi yalinga chize akuzanga Mwene Zambi, mumu te kakumulongesa kuli hako Jehoyada.

³ Chibwe chocho, kabuzwile ko yilumbilo ha milundu haze te atu akuwayila mazambi eka. Te maachilambwila ho milambu ni kwocha yuma ya vumba libema.

⁴ Joashe yatambika mahako, yaalweza akafunge mbongo ja milambu ya mu zuwo lia Zambi, jize ja milambu ya tangwa ha tangwa ni jize atu te akulambula ku zango lio ene.

⁵ Hako mweswe yabwa ni chiyulo cha kutambula mbongo jize akulambula atu, ni je mbongo jize te akululika najo zuwo lia Zambi haze hanafu.

⁶ Alioze ndoo ha mwaka wa makumi aali ni wa muchitatu wa kuyula cha Joashe hindu e mahako te kanda achilulika zuwo lia Zambi.

⁷ Hohene Joashe yatambika Jehoyada ni mahako akwo, yaahula ngwenyi: “Mumu yika kunushi kululika zuwo lia Zambi? Kunuchi kufunga nawa mbongo jize nwakutambula. Alioze chatamba kujihana alulike najo zuwo lia Zambi.”

⁸ Mahako yaachitayiza, yaatayiza nawa ngwo, keechi kalulika zuwo lia Zambi.

⁹ Mba Jehoyada yalinga mushete, yasa chituwa ha chifuko, yanangika we mushete hehi ni chilumbilo, ku kwoko lia chindume muze atu akunjilila mu zuwo lia Zambi. Mahako waze akulingila ku chikolo cha zuwo lia Zambi yaasa mo mbongo jeswe jize te akuneha akwa kuwayila.

¹⁰ Muze te akumona mbongo hijoka mu mushete, mukwa kusoneka wa mwanangana ni mwata wa mahako te kaakwiza ni kusa je mbongo ja prata mu tuku ni kujipezala.

¹¹ Muze haasoneka kwoka cha mbongo, te kaakujihana kuli akwa lutwe waze akutala kululika cha zuwo lia Zambi. No te kakufweta najo akwa kusonga mabaya ni tungi,

¹² ni akwa kushinguna, ni akwa kubula mawe, te kaakulanda najo nawa mitondo ni mawe ni yuma yikwo yeka ni yeka ya kululika nayo zuwo lia Zambi.

¹³ Alioze kaanjile ko mbongo nijimwe akafwete najo akwa kufula yuma ya prata ngwe misenge, ni mbashila, ni yitavwi, ni yikashi yakutumbieka ndeya, chibwe yikashi yikwo ya prata hanji oru.

¹⁴ Mbongo jeswe yaajanda akafwete akwa milimo ni kulanda yuma ya kululieka nayo lie zuwo lia Zambi.

¹⁵ Akwa lutwe waze te akutala kululika cha zuwo lia Zambi abwile akwa kushishika. Kashika kaalwile ko nawa mbongo jize alingile najo milimo.

¹⁶ Alioze mbongo ja milambu ya kuhilwisa ni kuwezela ni ja milambu ya milonga kaajisele ko mu mushete, mumu te ja mbala ja mahako.

¹⁷ Ha matangwa waze mwanangana Hazaele wa Siria yasa jita ni akwa Gate, yaakumba. Mba yanyonga kwasa jita ni akwa Yerusaleme.

¹⁸ Kashika mwanangana Joashe wa Yuda yanda milambu yeswe yize mianangana waze aliangile, Yehosafate, ni Jehorame, ni Ahazia, alambwile kuli Mwene Zambi. Joashe yawezaho nawa milambu ya iye mwene ni oru yeswe ya mu mushete ya zuwo lia Zambi ni ya mu zuwo lia mwanangana. Yayituma yeswe chawana kuli mwanangana Hazaele. Mba Hazaele yakatuka ni tujita twenyi ku Yerusaleme, yaaya kwo.

¹⁹ Yitanga yikwo ya mwanangana Joashe haanayisoneka mu mukanda wa Sango ja Mianangana ja Yuda.

^20-21 Miata a mu wanangana wa Joashe yaamutwama punga. Aali a kuli ayo, Jozakare mwana wa Shimeate, ni Johozabade mwana wa Shomere yaamushihila mu zuwo lize atungile haze haasa mavu ku chivumbuko cha Yerusaleme, ku jila yize yakuya ku Sila. Yaamufunda mu mafuka ja mianangana mu Limbo lia David. Mwanenyi Amazia yamuhinga.