1 MIANANGANA 11 - Mukanda Wa Zambi 1970

Mwanangana wa pwo Atalia wa Yuda

¹ Muze Atalia, naye ya mwanangana Ahazia, hevwa ngwo, hashiha mwanenyi, yahana Shimbi akashihe akwa jiko eswe a mwanangana.

² Shina lume Joashe mwana wa Ahazia mwe achinyishine. Atalia kambile kumushiha hamwe ni akwo eswe, alioze yamulamwina tato pwo Jehosheba, mwana wa mwanangana Jehorame, ndumbu ya Ahazia. Yamwanda hamwe ni ndeji yenyi, yamusweka mu chibatulo cha muchima cha mu zuwo lia Zambi, yamusweka hanga Atalia kechi kamushiha.

³ Jehosheba yafunga mwe mwana miaka yisambano, yamusweka mu zuwo lia Zambi ha miaka yize te Atalia akuyula.

⁴ Alioze ha mwaka wa muchishimbiali hako Jehoyada yatambika miata ja tujita waze te akufunga mwanangana ni waze te akufunga zuwo lia mwanangana ngwenyi, eze ku zuwo lia Zambi. Kwenako yaashingisa kulinga chize te anazange. Yaalweza Joashe, mwana wa mwanangana Ahazia,

⁵ yaaha Shimbi jino ngwenyi: “Muze munwiza ku milimo ya ha tangwa lia kuhwima, Chihanda chimuwika cha ku yihanda yitatu chaatamba kufunga zuwo lia mwanangana,

⁶ Chihanda chikwo chaatamba kufunga chikolo cha Sure, Chihanda chikwo chaatamba kubwa kunyima lia tufunga akwo ku chikolo.

⁷ Mbunga jaali waze akukoleka ku milimo ha tangwa lia kuhwima chaatamba kufunga mwe mwanangana ku zuwo lia Zambi.

⁸ Chanutamba kufunga mwanangana Joashe ni mikwale ku moko, chanutamba kubwa hamwe nenyi kweswako maya. Mweswawo manukundama numushiha.”

⁹ Miata yaalinga nikulita ni Shimbi ja Jehoyada, yaamunehena atu jo waze akulinga milimo ya ha tangwa lia kuhwima ni waze akukotoka.

¹⁰ Jehoyada yaaha miata a tujita makunga ni kebwe ya mwanangana David yize yabwile mu zuwo lia Zambi.

¹¹ Yalonga tujita ajingilike zuwo lia Zambi ni mikwale ku moko, afunge mwanangana.

¹² Mba Jehoyada yatuhwisa Joashe, yamujika chipangula ku mutwe, yamwaha mukanda wa Shimbi ja kuyula najo, yamuwayisa maji nikumupwisa mwanangana. Atu yaasakwila koshi, yaatwa ngunda ngwo: “Vulie mwanangana! Vulie mwanangana!”

¹³ Mwanangana wa pwo Atalia yevwa chize atu anatu ngunda, mba yazomboka fuji ku zuwo lia Zambi kuze te anakunguluka mbunga.

¹⁴ Yamona ko mwanangana mwaha kanamana ku nguji ku chikolo cha zuwo lia Zambi, nikulita ni ndako ya mianangana ha matangwa waze. Miata ni akwa kwimba yitavwi te kaanamujingilika. Atu eswe yaatwa ngunda ni kwimba yitavwi. Atalia yatanuna mahina jenyi ni kubihilila, yakololoka ngwenyi: “Puunga! Puunga!”

¹⁵ Hako Jehoyada kazangile ko kushihila Atalia mu yiize ya zuwo lia Zambi, kashika yambila miata ja tujita ngwenyi: “Mutuhwisenu mukachi ka tufunga. Mweswawo meseka kumulamwina numushiha.”

¹⁶ No yaamukwata, yaamutwala ku zuwo lia mwanangana, yaamushihila ku chikolo cha Kavwalu.

Hako Jehoyada yalulika wanangana wa Yuda

¹⁷ Hako Jehoyada yashinjika mwanangana Joashe ni atu akolese Usendo ni Zambi, no yaalakenya ngwo, kumaabwa lume atu ja Mwene Zambi. Yakolesa nawa Usendo hakachi ka mwanangana ni atu.

¹⁸ Mba atu yaaya ku zuwo lia hamba Bale, yaalinungwina hashi, yaabuzula ye yilumbilo ni e mahamba, yaashiha Matana, mwe hako wa Bale, yaamushihila kwe kulutwe lia chilumbilo. Jehoyada yasa tujita hanga afunge zuwo lia Zambi,

¹⁹ mba iye, ni miata ja tujita, ni tufunga twa mwanangana, ni tufunga twa zuwo lia mwanangana, yaachiza mwanangana ku zuwo lia Zambi, yaamutwala ku zuwo lia mwanangana. Atu eswe yaamukaula. Joashe yanjilila ku chikolo cha Tufunga, yatwama ha chitwamo chenyi cha wanangana.

²⁰ Atu eswe yaawahilila kuhiana, ni mwe mu limbo yimuhola lume kuluu, mumu te haashiha Atalia ku zuwo lia mwanangana.

²¹ Joashe te habwa ni miaka shimbiali muze amupwishile mwanangana.