1 MIANANGANA 10 - Mukanda Wa Zambi 1970

Jehu yashiha vungu lia Ahabe

¹ Ahabe te kakwete ana a malunga makumi shimbiali waze atwama mu limbo lia Samaria. Jehu yasoneka mikanda, yayituma kuli miata a mu limbo lize, ni kuli akwa lutwe ja limbo, ni kuli tufunga twa vungu lia Ahabe. Yasoneka ngwenyi:

² “Nuli ni ana ja mwene wenu, ni matemba, ni tuvwalu, ni yitwa ya jita, ni membo akukoleka.

³ Tongolenu umwe hakachi ka ana a malunga ja mwanangana wenu yoze unatela kumupwisa mwanangana, asenu jita numufunge.”

⁴ Alioze miata ja mu Samaria yeevwa mwongo, yaamba ngwo: “Kamba kama mianangana waze aali kaahashile kulimika ni Jehu. Ngwe kuchi yetu mutuhasa?”

⁵ Chenacho mwata wa zuwo lia mwanangana ni mwata wa limbo, hamwe ni akwa lutwe ja mu limbo ni tufunga, yaatuma mukanda uno kuli Jehu ngwo: “Yetu tuli tuvumbi twenu, hitwatayiza cheswe chize munwamba. Kutwahashile kutongola mwanangana niumwe. Linga kwe cheswacho chinakubemena.”

⁶ Jehu yaasoneka nawa mukanda ukwo ngwenyi: “Nyi nunalikundu ni yami, hinwatayiza kufunga Shimbi jami, hamene ngunehenenu mitwe ya ana ja Ahabe ku Jezrele ha ola yinoyene.” E ana a malunga ja mwanangana Ahabe te kaakwafunga kuli akwa lutwe a mu Samaria.

⁷ Muze te haatambula mukanda wa Jehu, miata ja mu Samaria yaashiha ana malunga ja mwanangana Ahabe makumi shimbiali, yaasa mitwe yo mu yisoka, yaayituma kuli Jehu mu Jezrele.

⁸ Muze haalweza Jehu ngwo, mitwe ya ana ja Ahabe haayineha, Jehu yatuma maliji hanga ayilumbike milumba yaali ku chikolo cha limbo, yikabombe ko ndoo chichamene.

⁹ Chichamene yaheta ku chikolo, yambila atu waze abwile ko ngwenyi: “Yami natwamine mwanangana Jorame punga ni kumushiha. Yenu kunushi kwenu ni mulonga ha chikuma chino. Alioze aya mba ashiha wano eswe?

¹⁰ Chino chinalumbunuka ngwo, maliji eswe ahanjikile Mwene Zambi hakutwala ku vungu lia Ahabe kumaakamanunuka. Mwene Zambi halinga chize alakenyene nikulita ni maliji a mukwa munanyi wenyi Eliya.”

¹¹ Mba Jehu yashiha usoko wa Ahabe akwo eswe waze te atwama mu Jezrele, tujita, ni masepa, ni mahako; niumwe wa kuli ayo wasalile ni mwono.

Jehu yashiha usoko wa mwanangana Ahazia

¹² Jehu yakatuka ku limbo lia Jezrele, yaya ku limbo lia Samaria. Mu jila kuma kuze akuvuluka ngwo: “Musumba wa tufunga,”

¹³ yalitakana ni amwe usoko wa mwanangana Ahazia, yaahula ngwenyi: “Yenu aya?” No yaakumbulula ngwo: “Tuli usoko wa Ahazia, tunayi ku Jezrele ni kumeneka ana ja mwanangana wa pwo Jezebele ni atu akwo a ku jiko lia mwanangana.”

¹⁴ Jehu yambila tujita twenyi ngwenyi: “Akwatenu a mwono!” No yaakwata, yaashihila hakamwihi ni wina wa Betekede. Kwoka cho te makumi awana ni aali, kaahichikile ko niumwe ni mwono.

Jehu yashiha usoko akwo wa mwanangana Ahabe

¹⁵ Jehu yaya nawa, mu jila yatakana ni Jonadabe mwana wa Rekabe. Jehu yamumeneka yamwamba ngwenyi: “Yena uli hamwe ni yami ni mbunge yimuwika, nyi?” Jonadabe ngwenyi: “Ewa mwane.” Jehu ngwenyi: “Nyi chocho, neha kwoko lie.” Yaalikwata mu moko, Jehu yamunyinyisa mu temba,

¹⁶ ngwenyi: “Tweya hamwe ni yami, ukalimwene yena mwene chize nakulingila Zambi.” Eswe aali yaaya hamuwika ku limbo lia Samaria.

¹⁷ Muze haaheta ko, Jehu yashiha usoko wa Ahabe eswe, kahichikile ko chibwe umuwika. Liji lino Mwene Zambi alakenyene mukwa munanyi Eliya.

Jehu yashiha akwa kukombelela Bale

¹⁸ Jehu yakungulula akwa Samaria yaamba ngwenyi: “Mwanangana Ahabe te kakulingila Bale hakepe, alioze yami mungumulingila kuhiana.

¹⁹ Tambikenu akwa munanyi ja Bale eswe hamuwika, ni akwa kuwayila jenyi eswe ni mahako jenyi eswe, kanda kusala niumwe. Mumu mungulambula mulambu unene kuli Bale. Mweswawo mahona ko maamushiha.” (Wano te mana a Jehu a kukoka waze te akuwayila Bale hanga aashihe.)

²⁰ Mba Jehu yahana Shimbi ngwenyi: “Hisenu tangwa lia kuwayila ni kulemesa Bale.” No yaatongola lie tangwa.

²¹ Mba Jehu yatuma liji mu chifuchi cheswe cha Israele, hanga waze akuwayila Bale eze. Niumwe wa kuli ayo kahonene ko nikwiza. Eswe yaanjila mu zuwo lia Bale, yaazala mo.

²² Mba Jehu yambila hako yoze te wakuhana mahina a chijila hanga atetele.

²³ Mwabwamuze, Jehu iye mwene yanjila mu zuwo lia Bale hamwe ni Jonadabe mwana wa Rekabe, yambila atu waze abwile mo ngwenyi: “Nusa chinyingi mubwa lume waze akuwayila Bale, hi waze ko akuwayila Mwene Zambi.”

²⁴ Mba Jehu ni Jonadabe yaanjila ni kukunjika milambu ya kwocha ni milambu yikwo kuli Bale. Te hahichika malunga makumi nake haaze nikwalweza ngwenyi: “Chatamba kushiha atu wano eswe. Yoze machinyisa mutu umuwika maamushiha iye.”

²⁵ Muze Jehu hakunjika ye milambu, yambila tufunga ni miata ngwenyi: “Njilenu nwashihe eswe; niumwe kanda achina!” No yaanjila ni mikwale, yaashiha eswe, yaambila haze. Mba yaanjila mu chibatulo cha lie zuwo lia Bale,

²⁶ yaatuhwisa luhamba luze lwabwile mo, yaalwocha.

²⁷ Chenacho alwochele ni kubuzula lie zuwo. Yaalipwisa lia kubihishila ndoo ni musono.

²⁸ Chenacho Jehu ahwishile kuwayila cha Bale mu Israele.

²⁹ Alioze yembulula ndako jibi ja Jeroboame, yoze washinjile Aisraele kuwayila makuji a ngombe a oru waze amikine ku limbo lia Betele ni ku limbo lia Dane.

³⁰ Mwene Zambi yambila Jehu ngwenyi: “Hiwalinga ku vungu lia Ahabe Chuma cheswe chize nazangile kulinga. Kashika ngunakulakenya ngwami, vungu lie maakabwa mianangana mu Israele ndoo ku Chisemuko cha muchiwana.”

³¹ Alioze Jehu kafungile ko Shimbi ja Mwene Zambi, Zambi ya Aisraele, ni mbunge yenyi yeswe. Alioze yembulula ndako jibi ja Jeroboame, yoze wavulumwishine Aisraele.

Kufwa cha Jehu

³² Ha matangwa waze Mwene Zambi yabutuka kukehesa njiza ja Israele. Mwanangana Hazaele wa Siria yakumba chifuchi cheswe cha Israele

³³ ku chivumbuko cha Yordau, ndoo ku sude ku limbo lia Ereore ku lwiji Arnone, yifuchi yeswe ya Gileade ni Bashane, kuze te kwatwama mavungu ja Gade ni Rubene, ni Chihanda cha vungu lia Manase.

³⁴ Yitanga yikwo ya mwanangana Jehu ni hamu lienyi, haanayisoneka mu mukanda wa Sango ja Mianangana ja Israele.

³⁵ Neye yafwa, yaamufunda mu Samaria. Mba mwanenyi Jehoahaze yamuhinga.

³⁶ Jehu yayula Aisraele ku Samaria miaka makumi aali ni nake.