1 MIANANGANA 1 - Mukanda Wa Zambi 1970

Mukwa munanyi Eliya ni mwanangana Ahazia

¹ Muze mwanangana Ahabe wa Israele hafwa, akwa chifuchi cha Moabe yaakatukila Aisraele.

² Mwanangana Ahazia te kali ha fulumba lia zuwo lienyi mu limbo ha Samaria, yaholoka hashi, yalemana kuhiana. Mba yatuma tunganda ni kuhula Balzebube, zambi ya mu limbo ha Afilistia, Ekrone, hanga anyingike kumahinduka, nyi ka.

³ Alioze kanganda ka Mwene Zambi yambila Eliya, mukwa munanyi wa ku limbo ha Tishbe, aye ni kutakana ni tunganda twa mwanangana Ahazia ni kwahula ngwenyi: “Mumu yika nunayi ni kuhula Balzebube, zambi ya Ekrone? Nunanyongo ngwenu, mu Israele kumushi Zambi, nyi?

⁴ Lwezenu mwanangana, Mwene Zambi kanambe ngwenyi: ‘Kuuchi kuhinduka, kumuufwa!’ ” Eliya yalinga ngwe chize amwambile kuli Mwene Zambi.

⁵ Mba tunganda yaahiluka kuli mwanangana. Neye yahula ngwenyi: “Kuchi mba nwahiluka?”

⁶ No yaamukumbulula ngwo: “Twalitakananga ni umwe mutu, neye yatulweza ngwenyi: ‘Hilukenu nulweze mwanangana, Mwene Zambi kanambe ngwenyi, mumu yika hinwatuma tunganda ni kuhula Balzebube, zambi ya Ekrone? Nunanyongo ngwenu, mu Israele kumushi Zambi, nyi? Kunuchi kuhinduka; kumunufwa!’ ”

⁷ Mwe mwanangana yaahula ngwenyi: “Mwe mutu kuchi abwa?”

⁸ Ayo ngwo: “Kanazala kazaku wa ngona ni muya wa lambu mu zalilo yenyi.” Mwanangana ngwenyi: “Nyi chocho, kali Eliya!”

⁹ Mba yatuma mwata hamwe ni tujita makumi atano ni kusaka Eliya. Mwe mwata yawana Eliya kanatwama ha mulundu, yamwamba ngwenyi: “Mutu wa Zambi, mwanangana kanakutambika, tatuye.”

¹⁰ Eliya yakumbulula ngwenyi: “Nyi nguli mutu wa Zambi, kahia kahulumuke mwilu hanga kanwoche yena ni tujita twe!” Shimbu lizeliene kahia yikahulumuka, yikocha mwata hamwe ni tujita twenyi.

¹¹ Mwanangana yatuma mwata mukwo hamwe ni tujita akwo makumi atano, neye yakanduka, yalweza Eliya ngwenyi: “Mutu wa Zambi, mwanangana kanakutambika, tatuye nikawashi!”

¹² Eliya ngwenyi: “Nyi nguli mutu wa Zambi, kahia kahulumuke mwilu hanga kanwoche yena ni tujita twe!” Shimbu lizeliene, kahia yikahulumuka, yikocha mwata ni tujita twenyi.

¹³ Mwanangana yatuma nawa mwata mukwo hamwe ni tujita akwo makumi atano. Neye yakanduka ha mulundu, yaliumba hashi ku meso ja Eliya, yamulembela ngwenyi: “Vulie mutu wa Zambi! Tuvwile kama keke yami ni tujita twami, kanda utushiha!

¹⁴ Mumu kunakeza miata aali akwo hamwe ni tujita two, yaawema kahia ka mwilu; alioze yami nguvwile kama keke!”

¹⁵ Kanganda ka Mwene Zambi yambila Eliya ngwenyi: “Yako hamwe nenyi, kanda wivwa woma.” Mba Eliya yaya nenyi kuli mwanangana,

¹⁶ yamulweza ngwenyi: “Mwene Zambi kanambe ngwenyi: ‘Muze hiwatuma tunganda ni kuhula Balzebube zambi ya Ekrone, ngwe mu Israele kumushi Zambi yoze muhula, kuuchi kuhinduka; kumuufwa!’ ”

¹⁷ Ahazia yafwa ngwe chize Eliya ambile nikulita ni liji lia Mwene Zambi. Te keshi mwana wa lunga, kashika mwanakwo Jorame yamuhinga ha mwaka wa muchaali wa kuyula cha Jehorame, mwana wa Yehosafate, mu Yuda.

¹⁸ Yitanga yikwo ya mwanangana Ahazia haanayisoneka mu mukanda wa Sango ja Mianangana ja Aisraele.