1 Korintu 9 - Mukanda Wa Zambi 1970

Chiyulo ni milimo ya kanganda ka Kristu

¹ Yami hi nguli mukwa kutusuka ko, nyi? Hanji hi nguli kanganda ka Yesu ko, nyi? Hanji Chamwene Yesu, Mwene wetu, nyi? Hi nuli mihuko ya milimo yami ko, yize nakulingila Mwene, nyi?

² Chibwe amwe maanyonga ngwo, hi nguli kanganda ka Yesu ko, chamwenemwene yenu chanutamba kutayiza ngwenu, nguli kanganda ka Yesu. Yenwene, mu kuliendela chenu ni Mwene, nuli chinyingi chize chinalweze ngwo, nguli kanganda ka Yesu.

³ Kuli waze akungusopesa, nakulisambisa ngwe chino ngwami,

⁴ yetu kutushi chiyulo cha kutambula kulia hanji kunwa ku milimo yetu, nyi?

⁵ Kutushi chiyulo mutu ni mutu cha kumbata pwo mukwa Kristu ha kwendangana nenyi, ngwe chize akulinga tunganda akwo, ni ana akwo ja Mwene Yesu, ni Petulu, nyi?

⁶ Hanji, shina yami ni Barnaba chatutamba kulinga milimo ha kulikwasa, nyi?

⁷ Iya hanevu kama ngwo, kajita kakulilanjila yuma ya kwasa nayo jita iye mwene? Hanji ngwo, njimi keshi kulia mihuko ya vinyu yize atumbile? Hanji ngwo, kafunga keshi kunwa yamwa ya mapanga jenyi, nyi?

⁸ Chishi ni yeseko yino ya tangwa ha tangwa wika, mumu ni je Shimbi ja Mose che jinambe.

⁹ Mumu hichinasonewa mu mukanda wa Shimbi ja Mose ngwo: “Kanda usa kata ku kanwa lia ngombe muze anazungula mbuto.” Zambi kananyongena ngombe wika, nyi?

¹⁰ Zambi kahanjikile ko maliji wano hakutwala kuli yetu, nyi? Chamwenemwene, maliji wano haanasonewa mumu hali yetu! Yoze wakulima munda ni yoze wakuzungula mbuto maahasa kusa ko mbunge ngwo, maatambula Chihanda cho cha mbuto.

¹¹ Hitunatumbu mbuto ya uzambi muli yenu. Kuchi, twakuyuka kuhiana muze twakutambula mihuko yenu ya hashi hano, nyi?

¹² Nyi akwo maahasa kutambula yawana kuli yenu, kuma yetu hi kuhiana ko, nyi? Alioze kutwahulile nichimwe. Hitunalihumikiza, hanga kutuchi kusa chikwiko nichimwe mu kwambujola Sango Jibema ja Kristu.

¹³ Hanji kunwanyingikine ngwenu, waze akulingila mu zuwo lia Zambi kaakutambula yakulia yo ku zuwo lia Zambi, nyi? Kunwanyingikine ngwenu, waze akulingila ku chilumbilo kaakutambula chawana cho cha yakulia yize akusa ha chilumbilo, nyi?

¹⁴ Chimuwika nawa, Mwene Yesu hanambe ngwenyi, waze akwambujola Sango Jibema maakatambula fweto yo ku Sango Jibema.

¹⁵ Alioze kanda ngwita kama Chuma nichimwe, ni mwene chasonekene ngwami, nungukwase. Chinalite ngufwe, alioze hi chibema ko umwe alelese kulisambisa chami.

¹⁶ Chahashile kulisambisa mumu nakwambujola Sango Jibema, mumu Changutamba kuchilinga. Lamba kuli yami nyi chambujolele Sango Jibema!

¹⁷ Nyi nalinga milimo ku upale wa yami mwene, kachi mungusa ko mbunge ha kutambula fweto. Alioze hi chocho ko, mumu kuyili milimo yize anguhele Zambi ha kuyilinga, Changutamba kuyilinga.

¹⁸ Mba kevwe fweto yami yika? Yili uwahililo wa kwambujola Sango Jibema. Chishi kuhula fweto, nikulita ni chiyulo chami, ha milimo yino.

¹⁹ Nguli mukwa kutusuka, hi nguli ko ndungo ya mutu niumwe. Alioze nakulipwisa ndungo ya atu eswe ha kukoka atu anji ahiana.

²⁰ Muze nakulinga milimo hakachi ka Ayuda, nakulipwisa ngwe Kayuda ha kwakoka. Chibwe Chishi mu chiyulo cha Shimbi ja Mose, nakulipwisa ngwe nguli mu chiyulo chize, muze nakulinga hakachi ka waze ali mu chiyulo cha Shimbi jize. Nakuchilinga ha kwakoka.

²¹ Kuli waze hi Ayuda ko, nakulipwisa ngwe hi nguli Kayuda ko. Nguli ngwe yoze keshi mu chiyulo cha Shimbi ja Mose, ha kukoka waze hi Ayuda ko. Chambile ngwe Chishi mu chiyulo cha Shimbi ja Zambi, mumu nguli mu chiyulo cha Shimbi ja Kristu.

²² Kuli alelu mu ufulielo, nakulipwisa nawa ngwe mulelu ha kwakoka. Atu eswe waze nakubwa no, nakulipwisa nawa ngwe ayo, hanga ngulamwine amwe hakachi ko ni mana eka ni eka.

²³ Nakulinga yuma yino yeswe mumu ha Sango Jibema, hanga ngutambule Chihanda cha yiwape yajo.

²⁴ Nunanyingika ngwenu, mu kuzomboka cha kuheha, eswe kaakuzomboka, alioze shina umuwika wika wakutambula chawana. Kashika Zombokenu hanga nukakumbe.

²⁵ Mumu mweswe yoze wakuzanga kukumba mu kuheha, kakulieseka kuhiana. Chino kakuchilinga ha kutambula chipangula chize kuchishi kulinduluka, alioze yetu twakulingila chipangula chize chakulinduluka.

²⁶ Kashika, muze nakuzomboka, nakutondekeza meso ku songo. Kashika nguli ngwe mukwa kumbufula yoze keshi kumbufula mu tetela.

²⁷ Nakumwesa mujimba wami lamba, nakuuyula kuhiana, kuchina muze hinambujola kuli akwo, Zambi makalituna yami mwene.