1 Korintu 8 - Mukanda Wa Zambi 1970

¹ Haliabwila ngunahanjika hakutwala ku yifwo yize mavungu akwo akulambula ku mahamba. Maliji waze nwakwamba ngwenu: “Yetu eswe tuli ni yinyingi,” kaali amwenemwene. Yinyingi ngwe yize yakulengumwisa mutu, alioze zango liakumutakamisa.

² Yoze Wakulinyonga ngwenyi, ngunanyingika chimwe Chuma, chamwenemwene mutu yoze kanyingikine chize chamutamba kunyingika.

³ Alioze yoze wakuzanga Zambi, Zambi neye kakumunyingika.

⁴ Kashika, hakutwala ku yifwo yize mavungu akwo akulambula ku mahamba, tunanyingika ngwetu, hamba hi Chuma chamwenemwene ko. Zambi kali umuwika lume.

⁵ Chibwe kwali waze akwavuluka ngwo: “mazambi,” chibwe kaatwama mwilu hanji hano hashi, nawa chibwe “mazambi” oke naye, hanji “mianangana” oke naye,

⁶ hindu yetu Zambi umuwika lume tukwete, Tata yoze watangile yuma yeswe. Tuli ni mwono ha kumuchichimieka. Chenacho nawa Mwene umuwika uliko, Yesu Kristu. Zambi yatanga yuma yeswe ni ndundo ja Yesu; ni yetu nawa, tuli ni mwono mumu hali iye.

⁷ Alioze hi eswe ko akwete yinyingi yize. Atu amwe haanejilila kuhiana kulia yifwo ya mahamba. Chibwe haliabwila, muze anali, kaakunyonga ngwo, yifwo yize yili ya mahamba. Manyonga jo alelu, ni kaakunyonga ngwe yifwo yize yakwavulumwisa.

⁸ Alioze kulia kuchichi kututwala kuli Zambi. Chibwe kutwalile kutuchi kufulwa, chibwe tulie kutuchi kuyuka.

⁹ Alioze kanyamenu, kuchina kutusuka chize nuli nacho kanda chivulumwisa atu akwo alelu mu ufulielo.

¹⁰ Mumu, nyi yoze mulelu mu manyonga jenyi makumona yena “mukwa yinyingi” unali mu zuwo lia mahamba, kuma iye kechi kahamuka ha kulia yifwo yize haalambula ku mahamba, nyi?

¹¹ Mba yoze mulelu, mukwetu yoze Kristu hanamufwila, kumakatoka mumu ha “yinyingi” ya yena!

¹² Chenacho, munuvulumuna Kristu iye mwene muze munuvulumwisa akwenu ni kulemeka manyonga jo alelu.

¹³ Nyi mukwetu mavulumuna ha chikuma cha kulia, chichi kalia nawa yifwo nichimwe, hanga chichi kuvulumwisa mukwetu.