1 Korintu 7 - Mukanda Wa Zambi 1970

Yihula hakutwala ku umbachiso

¹ Haliabwila ngunakumbulula ku maliji waze nwasonekene. Te chibema nyi mutu kambachile kwenyi pwo.

² Alioze utanji unji uliko. Kashika, lunga mweswe chamutamba kumbata pwo lienyi, ni pwo mweswe chamutamba kubwa ni lunga lienyi.

³ Lunga chamutamba kumanununa ndako yenyi kuli mukwo pwo. Pwo neye chamutamba kumanununa ndako yenyi kuli mukwo lunga.

⁴ Pwo kahashile kuyula mujimba wenyi mwene, alioze lunga mahasa kuuyula. Chimuwika nawa, lunga kahashile kuyula mujimba wenyi mwene, alioze pwo mahasa kuuyula.

⁵ Yena pwo chibwe lunga, kanda nuhandununa mihela, shina muze hinwalitesa kulemba kuli Zambi ha shimbu limwe likepe. Alioze kulutwe bwenu nawa hamuwika. Nyi ka, tangwa likwo kunuchi kuhasa kuliyula, munulimbuka mu yeseko ya Sakwonga.

⁶ Maliji wano kaali ngwe kunukwasa, hi Shimbi ko.

⁷ Alioze ngunanyongo ngwami, chinalite kachi atu eswe kubwa ngwe yami. Alioze mutu mweswe kali ni mana jenyi aze amuhele Zambi, umuwika mana wano, mukwo mana waze.

⁸ Haliabwila ngunahanjika kuli waze kanda achimbata ni kuli waze haanafwisa malunga hanji mapwo, ngwami, chinalite kutwama chizechene ngwe yami.

⁹ Alioze, nyi kunwahashile kulihumikiza, limbatenu kwenu, mumu chinalite kumbata, hi chibema ko kubwa ni mbunge yinasasaminya ha kulinga utanji.

¹⁰ Kuli waze haanalimbata ngunaahe Shimbi, alioze hi Shimbi ya yami mwene ko, yili Shimbi ya Mwene Yesu. Ngwami, pwo kanda ahichika lunga lienyi.

¹¹ Alioze, nyi hamuhichika kulu, kanda aya ulo weka; chamutamba kuhiluka kuli lunga lienyi. Lunga neye kanda alakula pwo lienyi.

¹² Kuli atu akwo ngunambe (yami hi Mwene Yesu ko) ngwami, nyi lunga, mukwa Kristu, kali ni pwo hi mukwa Kristu ko, pwo neye nyi kanazange kutwama ni lunga lienyi, lunga kanda alakula pwo yoze.

¹³ Chimuwika nawa, nyi pwo, mukwa Kristu, hanalimbata ni lunga hi mukwa Kristu ko, lunga neye nyi kanazange kutwama nenyi, pwo kanda akatuka kuli lunga yoze.

¹⁴ Mumu Zambi kakutayiza lunga yoze hi mukwa Kristu ko, mu kulinunga ni pwo lienyi. Chimuwika nawa, Zambi kakutayiza pwo yoze hi mukwa Kristu ko, mu kulinunga ni lunga lienyi mukwa Kristu. Nyi kuchabwile chocho, ana jo maabwa ngwe waze kaanyingikine Zambi. Alioze Zambi kakwatayiza.

¹⁵ Nyi yoze hi mukwa Kristu ko mazanga kushiha ulo ni mukwa Kristu, mwechenu achilinge. Ku ndako ngwe yize, yoze mukwa Kristu, chibwe pwo hanji lunga, mahasa kulinga ngwe chize anazange, mumu Zambi hananutambika kutwama mu uhwimino.

¹⁶ Mumu ngwe kuchi yena pwo, mukwa Kristu, Unanyingika ngwe, muuhasa kulamwina lunga lie? Chimuwika nawa yena lunga, mukwa Kristu, ngwe kuchi Unanyingika ngwe, muuhasa kulamwina pwo lie?

Twamenu chizechene ngwe anutambikile Zambi

¹⁷ Mutu mweswe chamutamba kutwama nikulita ni chawana chize Mwene Yesu amuhele, nikulita ni chize Zambi amutambikile. Chenacho nakulongesa mu Yikungulwila yeswe.

¹⁸ Nyi mutu te kali kulu ngalami muze atayijile kutambika cha Zambi, chamutamba kubwa lume ngalami. Nyi mutu te chilima, muze atayijile kutambika cha Zambi, kanda alipwisa ngalami.

¹⁹ Kubwa ngalami hanji chilima hi Chuma ko. Chuma chinene kwononokena Shimbi ja Zambi.

²⁰ Mutu ni mutu chamutamba kutwama ngwe chize abwile muze atayijile kutambika cha Zambi.

²¹ Yena wabwile ndungo muze Zambi akutambikile? Kanda ulinyenga, alioze nyi mana uli no a kutusuka mu undungo, chilinge.

²² Mumu ndungo yoze atambikile Mwene Yesu, hanabu mutu wenyi wakutusuka. Chimuwika nawa, mwenyaho yoze atambikile Kristu, kali ndungo yenyi.

²³ Zambi hananulande ni ndando yinji. Kashika, kanda mwalumuka ndungo ja atu.

²⁴ Akwetu, mutu mweswe atwame ngwe chize abwile muze Zambi amutambikile, alioze aliendele ni Zambi.

Yihula hakutwala kuli waze kanda achimbata ni twamishi akwo

²⁵ Haliabwila, ngunahanjika kuli waze kanda achimbata ngwami, Chishi Shimbi kuli Mwene Yesu, alioze ngunalongesa ngwe mutu yoze Mwene hanevwila keke, yoze nunahase kufuliela.

²⁶ Alioze, mumu ha lamba lia matangwa wano, ngunanyongo ngwami, lunga chamutamba kutwama chizechene.

²⁷ Uli ni pwo, nyi? Kanda umulakula. Hanji kuushi pwo, nyi? Kanda umbata.

²⁸ Alioze, nyi muumbata pwo, kuwavulumwine. Nawa, nyi mwana pwo malimbata ni lunga, kavulumwine. Alioze waze anambata maakabwa ni lamba tangwa ha tangwa mu mwono wo. Ngunazange kunufunga ku lamba lize.

²⁹ Akwetu, ngunambe ngwami, matangwa haakeha kulu. Kashika, chize ku tangwa lino, malunga waze haanambata abwe ngwe kaambachile ko.

³⁰ Waze akulila abwe ngwe waze keeshi kwivwa chinyengo. Waze akuseha abwe ngwe waze keeshi kwivwa chiseke, waze akulanda abwe ngwe kaabwile ko nayo yize alanjile.

³¹ Waze akulinga milimo yo ya hano hashi abwe ngwe kaayilingiile ko, mumu tushilikilo twa hashi hano, ngwe chize ali haliabwila, keechi kalinduluka.

³² Chazangile nulibikale. Lunga yoze kanda achimbata, wakuhondangana milimo ya Mwene Yesu, mumu kaakweseka kuwahisa Mwene.

³³ Alioze lunga yoze hanambata kakuhondangana milimo ya hano hashi, mumu kakuzanga kuwahisa pwo lienyi.

³⁴ Kali ni mbunge jaali. Mwana pwo, hanji pwo yoze kanda achilimona ni lunga, kakuhondangana milimo ya Mwene, mumu kakuzanga kulihana kuli Mwene mujimba ni mbunge yenyi. Alioze pwo yoze uli ku ulo, kakuhondangana milimo ya hano hashi, mumu kakuzanga kuwahisa lunga lienyi.

³⁵ Ngunahanjika maliji wano ha kunukwasa. Chanuhele Shimbi, alioze ngunazange nulinge ngwe chinalite. Ngunazange nulihane ku milimo ya Mwene Yesu ni mbunge yimuwika.

³⁶ Tutalenu ku ndako ya mwana pwo ni mwana lunga waze haanalilakenya, alioze haabatula ngwo, kutuchi kulimbata. Nyi mwe mwana lunga hamona ngwenyi, chikalu kulihumikiza hakutwala kuli mwana pwo, nyi habwa ni usolo kuhiana, ni kananyongo kulimbata, chibema alimbate ngwe chize anazange, kavulumwine.

³⁷ Alioze, nyi mwana lunga yoze kakulihumikiza, nawa, nyi habatula mu mbunge yenyi ngwenyi, chichi kumumbata, nyi chili kuzanga cha iye mwene lume, hi zango lia mutu mukwo ko—kalinga chibema nyi kambachile ko.

³⁸ Chenacho, yoze unambata pwo lienyi kanalingi kanawa, alioze yoze keshi kumbata, kanalingi kanawa kuhiana.

³⁹ Pwo yoze uli ku ulo kanakashiwa kuli lunga lienyi ha shimbu heswe lize lunga lienyi ali ni mwono. Alioze, nyi lunga lienyi hafwa, mba hatusuka, mahasa kulimbata ni yoze mazanga. Alioze chamutamba kulimbata ni mukwa Kristu.

⁴⁰ Alioze pwo yoze mevwa chiseke kuhiana, nyi kayile ko nawa ku ulo. Acho chili kunyonga cha yami, ni yami ngunanyongo ngwami, nguli ni Mwiku wa Zambi.