1 Korintu 6 - Mukanda Wa Zambi 1970

Akwa Kristu kanda atwala akwo ku meso ja ngaji

¹ Nyi umwe hakachi kenu kali ni mulonga ni mukwa Kristu mukwo, kuchi mahamuka ha kuya ni kusopa mulonga uze ku meso ja ngaji waze hi akwa Kristu ko? Kuchamutambile kuusopela hakachi ka akwa Kristu, nyi?

² Kunwanyingikine ngwenu, akwa Kristu maakabatwila akwa hashi, nyi? Mba, nyi munukabatwila akwa hashi, kuchi kevwe kunwahashile kubatula milonga yikepe, nyi?

³ Hanji kunwanyingikine ngwenu, mutukabatwila tunganda a mwilu, nyi? Mba nyi chinabu chocho, kuchi kutwahashile kubatula milonga ya mwono uno?

⁴ Nyi munubwa ni milonga ngwe yino, chanutamba kuyitwala kuli alelu mu Chikungulwila akayibatule, nyi?

⁵ Ngunahanjika chino ha kunukolesa sonyi. Kuma, hakachi kenu kuheshi mukwa mana niumwe yoze mahasa kubatwila akwa Kristu waze ali ni milonga, nyi?

⁶ Chinalite umwe mukwa Kristu kutwala mukwo ku meso ja ngaji waze hi akwa Kristu ko, nyi?

⁷ Nyi munulisuma milonga yenwene, nuli ni kapalia. Kuchalitele kuhiana kutayiza atu kunulinga yibi, nyi? Kuchalitele kuhiana kutayiza atu kunwiya yuma yenu, nyi?

⁸ Alioze yenwene nwakulilinga yibi, nwakuliya yuma hakachi kenu. Chenacho nwakulilinga, chibwe nuli akwa Kristu.

⁹ Kunwanyingikine ngwenu, yivulumunyi keechi kanjila mu Wanangana wa Zambi, nyi? Kanda nulionga, chibwe atu waze akulinga utanji ni twamishi, chibwe akwa kukombelela mahamba, chibwe waze akulinga utanji ni waze haanalimbata, chibwe akwa utumwa,

¹⁰ chibwe eji, chibwe akwa kwivwa chipululu, chibwe akwa kuzengewa, chibwe akwa kutukana, chibwe akwa kuhianyisa ndando—wano eswe keechi kanjila mu Wanangana wa Zambi.

¹¹ Amwe hakachi kenu nwabwile chizechene, alioze hinunalibemesa ku shili. Zambi hananupwisa akwa kulinanga kanda akwa ululi, mu jina lia Mwene Yesu Kristu ni Mwiku wa iye mwene, Zambi.

Fungenu mijimba yenu ha kuchichimieka Zambi

¹² Umwe mamba ngwenyi: “Ngunahase kulinga yeswe yize ngunazange.” Ewa, alioze yeswe hi yibema ko. Chibwe yami ngunahase kwamba ngwami: “Ngunahase kulinga yeswe yize ngunazange.” Alioze chichi kutayiza Chuma nichimwe kunguzeyesa ngwe nguli ndungo yacho.

¹³ Mukwo mamba ngwenyi: “Yakulia yili mumu ha jimo, ni jimi lili mumu ha yakulia.” Ewa, alioze Zambi makayihwisa yeswe yaali. Mujimba wa mutu hi ha kulinga nawo utanji ko, alioze ha kuchichimieka nawo Mwene Yesu, ni Mwene Yesu kali mwenya mujimba.

¹⁴ Zambi hanahindwisa Mwene Yesu ku kufwa, ni yetu nawa makatuhindwisa ku ndundo jenyi mwene.

¹⁵ Ngunanyingika ngwenu, mijimba yenu yili yihanda ya mujimba wa Kristu. Changutamba kuchiza Chihanda cha mujimba wa Kristu ni kuchipwisa Chihanda cha mujimba wa chitanji, nyi? Ka lume!

¹⁶ Kuma kunwanyingikine ngwenu, lunga yoze unalinungu ni chitanji, kanabu nenyi mujimba umuwika, nyi? Mumu hichinasonewa mu Mukanda wa Zambi ngwo: “Eswe aali maakabwa mujimba umuwika.”

¹⁷ Alioze yoze unalinungu ni Mwene Yesu kanalinungu nenyi mu mwiku umuwika.

¹⁸ Chinenu utanji. Uvulumwino weswe uze mutu akulinga, uli haze lia mujimba wenyi, alioze yoze wakulinga utanji, kakubihisa mujimba wenyi mwene.

¹⁹ Kunwanyingikine ngwenu, mijimba yenu yili zuwo lia Mwiku wa Zambi, uze watwama muli yenu, uze anuhele Zambi, nyi? Hi nuli a yenwene ko, nuli a mbala a Zambi.

²⁰ Zambi hananulande ni ndando yilemu. Kashika fungenu mijimba yenu ha kuchichimieka nayo Zambi.