1 Korintu 5 - Mukanda Wa Zambi 1970

Utanji mu Chikungulwila

¹ Atu eswe kaanachambulula ngwo, utanji uli hakachi kenu, utanji ngwe uze keeshi kuulinga chibwe hakachi ka waze hi akwa Kristu ko. Mumu kaanambe ngwo, umuwika hakachi kenu kali ni pwo lia tato.

² Kuchi mba nunalengumuka? Te chanutamba kubwa ni chinyengo, ni lunga yoze unakalinga Chuma ngwe chize, kachi nunakamutuhwisa hakachi kenu!

^3-4 Alioze yami, chibwe nguli kusuku ni yenu mu mujimba, mu manyonga nguli hamwe ni yenu. Mu jina lia Mwene Yesu hinamubatwila kulu, ngwe kwenako nguli, mutu yoze unakalinga chibi chino. Muze munulikungulula, ni yami mungubwa ko mu manyonga jami, ndundo ja Mwene wetu Yesu Kristu mujibwa ko hakachi ketu,

⁵ mba chanutamba kukunjika mutu yoze kuli Sakwango, akashihe mujimba wenyi, hanga Zambi akalamwine mwono wenyi ha Tangwa lia Mwene Yesu.

⁶ Hichibema ko kulisuta! Kunwanyingikine chishima chino ngwo: “Yitumbo yikepe yakufutunwisa mwaha weswe,” nyi?

⁷ Chanutamba kuchiza yitumbo yize yikulu ya shili hanga nubwe abema. Mba munubwa ngwe mwaha uze kuushi yitumbo. Talenu, nuli kulu ngwe mwaha uze kuushi yitumbo, mumu Kristu, Mwana Panga wetu wa Kubalika, hanafu ngwe mulambu.

⁸ Kashika, muze tunali mbolo ha chiwanyino chetu cha Kubalika, kanda tulia mbolo yize yikwete yitumbo yikulu, yitumbo ya shili ni ya utanji, alioze mbolo yize kuyishi yitumbo yayo, mbolo yibema ni yamwenemwene.

⁹ Mu mukanda uze ngunakunutumina, ngunakanusonekena ngwami, kanda nuliendela ni yitanji.

¹⁰ Alioze chasonekene hakutwala kuli yitanji a hano hashi, hanji akwa kwivwa chipululu, hanji eji, hanji akwa kukombelela mahamba. Nyi chocho, chanutamba kukatuka hano hashi!

¹¹ Alioze ngunakamba ngwami, kanda nuliendela ni yoze wakulivuluka ngwenyi, mukwa Kristu, hindu kali chitanji, hanji mukwa kwivwa chipululu, hanji mukwa kukombelela mahamba, hanji mukwa kutukana, hanji mukwa kuzengewa, hanji mwiji. Mutu ngwe yoze, chibwe kulia, kanda nulia hamwe nenyi.

^12-13 Mumu hi nichami ko kubatwila waze hi akwa Kristu ko. Zambi iye mwene makaabatwila. Alioze kunwahashile kubatwila waze ali mu Chikungulwila, nyi? Ngwe chize hichinasonewa mu Mukanda wa Zambi ngwo: “Chizenu chingulungulu hakachi kenu.”