1 Korintu 4 - Mukanda Wa Zambi 1970

Tunganda twa Kristu

¹ Chanutamba kutunyongena ngwe tuli tuvumbi twa Kristu, ngwe Zambi hanatwehe chiyulo cha kunyingikisa umwenemwene wa yijimbikilo yenyi.

² Ni mukwa kuyula chamutamba kubwa mukwa kushishika kuli mwata wenyi.

³ Kuli yami, hi Chuma ko, chibwe yenu hanji atu akwo maangubatwila. Chibwe yami mwene chahashile kulibatwila.

⁴ Manyonga ja mu mbunge yami keeshi kunguhisa, alioze chibwe chize chahashile kulisambisa. Mwene Yesu mwe wakungubatwila.

⁵ Kashika, kanda nubatwila niumwe, muze tangwa kanda lichiheta. Ubatwilo wakusula chatamba kushimbwila ndoo muze Mwene Yesu makeza. Iye makasolola mu pangu yuma yize yahengamine mu milima, makasolola manyonga waze ahengamine mu mbunge ja atu. Mba Zambi makachichimieka mutu ni mutu chize chinalite.

⁶ Akwetu, mu yuma yino yeswe hingunanwehe chilweza cha yami ni Apolo, hanga nuhase kulilongesa chishima chize chinambe ngwo: “Kanda nushiha Shimbi jize hijinasonewa.” Niumwe kuchamutambile kulengumuka hakutwala kuli mutu umuwika ni kulelesa mukwo.

⁷ Iya wakupwishile mulemu Wahiana atu akwo? Yuma yika uli nayo yize kuwatambwile kuli Zambi? Nyi Chenacho, kuchi mba wakulisamba ha chize uli nacho ngwe kuwachitambwile?

⁸ Kunwayuka kulu yuma yeswe! Nuli kulu pichi! Hinunabu kulu mianangana, chibwe yetu hi tuli mianangana ko! Ngunazange yenu nubwe mianangana chamwenemwene, hanga ni yetu nawa tubwe mianangana hamwe ni yenu.

⁹ Mumu ngunamono ngwe yetu tunganda twa Kristu, Zambi hanatuse mu muhela wakusula. Tuli ngwe waze haanakase ha kwashiha ku meso ja atu eswe. Tunganda a mwilu eswe ni akwa hashi eswe kaakututala.

¹⁰ Yetu tuli yihepuke mumu hali Kristu, alioze yenu kunwakanyama mu kulinunga nenyi! Yetu tuli alelu, alioze yenu kunwatakama! Yetu kaakutulelesa, alioze yenu kaakunulemesa!

¹¹ Chibwe ndoo ni haliabwila twakwivwa zala ni pwila, twakubwa ni uvu. Atu kaakutulamba. Tuli yihengwahengwa.

¹² Twakuhondangana ni moko jetu mu kukwasa mwono wetu. Muze akutushinga, twakwawahisa. Muze akutuhungumiona, twakulihumikiza.

¹³ Muze akutusaula, twakwakumbulula ngwe masepa. Kaakutupwisa ngwe yikongwakongwa. Ndoo ni haliabwila tuli ngwe yiswaswa ya hano hashi!

¹⁴ Hinanusonekena chino, hi ha kunukolesa sonyi ko, alioze ha kunukanyamisa ngwe ana jami mu ufulielo.

¹⁵ Mumu, chibwe nuli ni tununu kumi twa ndeji waze akunulela mu mwono wenu mu kulinunga ni Kristu, hindu tatenu umuwika wika nukwete. Mwe tatenu yami, mumu nanulongesele Sango Jibema.

¹⁶ Kashika, ngunaliumbu kuli yenu ngwami, ngwimbululenu.

¹⁷ Ha kunukwasa ngunanutumina Timoteu. Kali mwanami mu ufulielo, mukwa kushishika mu kuliendela ni Mwene Yesu. Maka nwiwulula Shimbi jize nakukaula mu mwono Waha mu kulinunga ni Kristu, Shimbi jize nakulongesa kweswe mu Yikungulwila yeswe.

¹⁸ Amwe hakachi kenu nunalengumuka, nunanyongo ngwenu, chichi kwiza ni kunutala.

¹⁹ Alioze, nyi Mwene mapala, mungunuheta nikawashi. Ha ola yize chichi kunyingika wika yize akwamba akwa kulengumuka, alioze mungunyingika nawa yuma yize maahasa kulinga.

²⁰ Mumu Wanangana wa Zambi hi maliji ko, alioze ndundo.

²¹ Kuchi nunazange? Ngwize ni mutondo kuli yenu, hanji ni mbunge ya zango ni uhomboloji?